II Kevcai 33:6-25
Nqe cim:
“Mauxes uas yog Vajtswv tus neeg tej lus foom koob hmoov rau cov Yixalayees ua ntej nws tuag.” (II Kevcai 33:1)
Lus nug rau sawvdaws xav:
– Tej ntsiab lus tseemceeb hauv tshooj no yog dabtsi?
– Mauxes cov lus foom koob hmoov rau tej xeem qhia paub tus coj lub siab zoo li cas?
– Cia kom ua tau tus neeg ua haujlwm tseeb, peb cheemtsum ua dabtsi?
Tej ntsiab lus tseemceeb hauv tshooj no hais txog tej lus uas Mauxes foom koob hmoov rau cov xeem neeg Yixalayees. Ntawm no yog cov lus kawg ntawm leej txiv sab ntsujplig foom koob hmoov rau cov menyuam sab ntsujplig ua ntej nws tuag. Nyeem cov lus foom koob hmoov no, peb pom tias tsis yog tej lus foom zoo xwb, tseem yog tej lus uas paub meej tej xeem neeg. Qhov no kuj yoojyim totaub vim Mauxes twb coj lawv tau plaub caug xyoo, nws paub meej tej teebmeem uas lawv ntsib, tej kev sim siab uas lawv raug, tej kev uas lawv ntshaw, tawv ncauj, tsis mloog lus. Mauxes yog tus uas paub lawv lub neej meej heev thiab nws qhia lawv los ntawm lub siab tseeb.
Mauxes zeem paub hais tias txawm yog nws tsis tau nrog cov pejxeem mus nyob hauv lub tebchaws uas Vajtswv coglus tseg los tus Tswv yeej yuav siv ib tug neeg coj lawv mus, tus Tswv haivneeg yuav hla tsis dhau tus dej Yauladees yog hais tias tsis muaj Vajtswv nrog lawv mus. Peb hais tau tias tej ntsiab lus hauv cov lus foom koob hmoov yog taw qhia kom cov pejxeem txuas nrog tus Tswv, tos ntsoov tus Tswv txojkev pab thiab Nws tej koob hmoov nyob tom hauv ntej. Yam uas ua rau peb kawm tau yog, Mauxes tsis yog hmov tshua nws tus kheej kev ntshaw xwb, tiamsis yog tus Tswv haivneeg lub neej vammeej nyob hauv lub tebchaws Vajtswv coglus tseg, thiab ua neej kom phim lub meejmom yog Vajtswv haivneeg dawbhuv.
Tus neeg uas ua Vajtswv haujlwm tseeb yog tus uas muab siab npuab Vajtswv thiab saib hlob Vajtswv tes haujlwm, pom tus Tswv haivneeg lub neej sab ntsujplig heev dua li pom lawv tus kheej (Filipis 2:4). Peb txhua tus puavleej yog tus uas ua Vajtswv haujlwm thiab saib xyuas pab yaj loj thiab me uas Vajtswv cob. Cia kom ua tau ib tug neeg ua Vajtswv haujlwm tseeb zoo li Mauxes, qhov tseemceeb tshaj yog peb txuas nrog tus Tswv. Rau qhov tus Tswv yog tus uas xaiv thiab hu peb los ua Nws tes haujlwm, yog peb nrog tus Tswv sib raug zoo tsawg, peb yuav tsis kam fij tus kheej, tsis tas siab ua Vajtswv tes haujlwm li. Thiab qhov tseemceeb txuas ntxiv yog taug Tswv Yexus neev taw, Nws tso lub hwjchim sib luag zog li Vajtswv, los yug ua neeg, tuag txomnyem ntsuav saum ntoo khaublig cawm neeg ntiajteb (Filipis 2:5-11). Cia li txuas nrog tus Tswv thiab taug Nws tus neev taw kom peb ua tau ib tug neeg ua Vajtswv haujlwm tseeb.
Thov Vajtswv,
Tus Tswv, Koj yog tus hu nyuam yaus los ua Koj tes haujlwm loj thiab me tsis sib thooj. Thov Koj pab kom nyuam yaus muaj kev sib raug zoo nrog Koj, taug Koj tus neev taw, tas siab saib xyuas pab yaj. Nyuam yaus tuav Yexus Khetos lub npe thov, Amees.
Peb tabtom ua tes haujlwm saib Vajtswv pab yaj zoo li cas?
Nyeem Vajluskub hauv peb lub xyoo: Yaxayas 7
Kênh Youtube BHKTHN:
