Klei Aê Diê Blŭ: Klei Mtô Mñă Klei Bhiăn 33:6-25
Êlan kliăng: “Anei jing klei jăk jĭn Y-Môis, mnuih Aê Diê hơêč hmưi leh kơ phung anak Israel êlâo ñu djiê” (Klei Mtô Mñă Klei Bhiăn 33:1)
Klei êmuh ksiêm mĭn: Ya jing klei čih phŭn hlăm kdrêč anei? Jih jang klei Y-Môis hơêč hmưi kơ grăp găp djuê phung Israel bi êdah si ngă klei mĭn sa čô mnuih mă bruă kơ Aê Diê? Čiăng jing sa čô mă bruă kpă ênuah, ya drei srăng ngă?
Klei čih phŭn hlăm kdrêč anei čih yăl dliê kơ klei Y-Môis hơêč hmưi kơ grăp găp djuê phung Israel. Anei jing klei sa čô ama hlăm mngăt hơêč hmưi kơ phung anak ñu hlăm mngăt êlâo ñu djiê. Ktuê răk jih jang klei hơêč hmưi anei, drei ƀuh anei amâo djŏ knŏng klei hơêč hmưi jăk ôh, ƀiădah wăt bi êdah klei thâo săng klă kơ klei jing mdê mdê grăp găp djuê phung Israel mơh. Klei anei êlưih kơ drei thâo săng kyuadah êjai pă pluh thŭn Y-Môis atăt ba leh digơ̆, ñu thâo klă kơ jih jang klei dleh dlan knap mñai digơ̆ tuôm, jih jang klei digơ̆ čiăng, klei digơ̆ khăng kŏ, klei digơ̆ amâo gưt asăp. Ñu jing pô thâo klă ya jing klei jăk hĭn kơ klei hdĭp digơ̆ leh anăn ñu đru bi kah mbha djăp mta klei hŏng digơ̆ jih ai tiê.
Y-Môis thâo wăt tơdah ñu amâo nao mbĭt ôh hŏng phung ƀuôn sang kơ Čar Aê Diê Ƀuăn, sĭt nik Aê Diê srăng yua pô mkăn atăt ba digơ̆, ƀiădah phung ƀuôn sang amâo dưi găn êa krông Yurdan ôh tơdah amâo mâo Aê Diê nao mbĭt. Dưi lač, jih jang klei hơêč hmưi jing klei bi wir phung ƀuôn sang kơ klei bi mguôp sĭt suôr hŏng Aê Diê, knang kơ Aê Diê đru leh anăn brei klei jăk jĭn kơ klei hdĭp ti anăp. Klei drei bi kčŭt snăk jing truh ti mnĭt mmông knhal tuč klei hdĭp, Y-Môis amâo uêñ mĭn kơ klei ñu pô čiăng ôh, ƀiădah klei ñu uêñ mĭn jing phung ƀuôn sang srăng mâo klei hdĭp jăk hlăm Čar Aê Diê Ƀuăn, leh anăn hdĭp djŏ hŏng klei digơ̆ jing phung ƀuôn sang Aê Diê mơ̆.
Sa čô mă bruă kpă ênuah jing sa čô mnuih mĭn nanao kơ klei čiăng bi mđĭ bruă sang Aê Diê, mĭn kơ klei hdĭp myang phung đăo hĭn kơ klei tŭ dưn kơ ñu pô (Philip 2:4). Grăp čô drei jing phung mă bruă kơ Khua Yang sơăi, leh anăn kiă kriê phung biăp điêt amâodah prŏng Khua Yang jao leh. Čiăng jing sa čô mnuih mă bruă kpă ênuah msĕ si Y-Môis, klei yuôm hĭn jing klei bi mguôp drei hŏng Khua Yang. Kyuadah Khua Yang yơh jing Pô ruah leh anăn iêô leh drei kơ klei mă bruă, kyuanăn tơdah drei kƀah klei bi mguôp hŏng Khua Yang, drei amâo srăng dưi săn asei, myơr jih klei hdĭp mă bruă kơ phung biăp Ñu jao leh ôh. Leh anăn klei yuôm lŏ čuê jing brei drei tui kru Khua Yang Yêsu, Pô lui leh klei jing mđơr hŏng Aê Diê, săn asei mlei, tŭ klei jing dĭng buăl, jing sa čô mnuih, tŭ klei djiê ti kyâo bi kal čiăng bi mtlaih jih jang mnuih (Philip 2:5- 11). Bi mguôp bĕ hŏng Khua Yang leh anăn tui knuih Ñu čiăng dưi jing sa čô mă bruă kpă ênuah.
Hŏng si ai tiê drei dôk mă bruă kơ phung biăp Aê Diê jao leh kơ drei?
Wah lač: Ơ Khua Yang, Pô iêô leh kâo kơ klei mă bruă hlăm bruă điêt prŏng mdê mdê. Đru kâo mâo klei bi mguôp sĭt suôr hŏng Ih, tui kru jơ̆ng Ih čiăng hŏng jih ai tiê mă bruă kơ phung biăp Ih jao leh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êsai 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
