Pajlug 18:9
9 Tus neeg tubnkeeg zoo ib yam li tus neeg uas ua kom muaj kev puastsuaj.
Lus nug rau sawvdaws xav:
– Vajntxwv Xalumoos muab leejtwg hu ua “tus ua kom muaj kev puastsuaj”? Vim licas?
– Niaj hnub nimno tej zaum peb ho yog “tus ua kom muaj kev puastsuaj” nyob sab twg?
– Peb tau qhuab ntuas licas txog qhov uas siv tej sijhawm thiab koob hmoov sab ntsujplig tus Tswv muab pub rau tus kheej?
Thaum hais txog “tus ua kom muaj kev puastsuaj” peb pheej xav txog cov neeg phem siv tej lus hais lossis ua tej yam phem kom lwm tus ntsib teebmeem, tiamsis nqe Pajlug no qhia pom hais tias: “Tus neeg tubnkeeg zoo ib yam li tus neeg uas ua kom muaj kev puastsuaj”, kuj txhais hais tias tus ntawd yog “tus ua kom muaj kev puastsuaj”, tsis tas yuav hais lus lossis ua tej yam txhaum cai tiamsis “tubnkeeg” xwb kuj yog lawm. “Tubnkeeg” muaj lub ntsiab hais tias “tog mus rau ib qib qis dua”, lossis “tsis kub siab”, “tsis quavntsej”, lossis “tsis xyuamxim”. Nyob hauv Yaxayas 5:24 lo lus “kub hnyiab” uas yog tej quavnyab npleg thiab puamkhab “kub hnyiab” hauv cub hluav taws siv los hais txog kev “tubnkeeg”. Thaum Yausuas nqua hu cov Yixalayees yuav tsum maj nroos mus txeeb kom tau lub tebchaws Kana-as, nws siv lo lus muaj ntsiab zoo li lo lus “tubnkeeg” uas yog lo lus “Nej tseem yuav tos txog thaum twg nej mam li mus” (Yausuas 18:3).
Tej zaum Vajntxwv Xalumoos tabtom xav txog ib tug tub uas nyob hauv tsev neeg tsis kub siab ua liaj ua teb, ua rau sau tsis tau qoobloo thiab lub cuabyig raug tshaib nqhis. “Tus neeg tubnkeeg” pheej teb hais tias: “Kuv tsis ua dabtsi rau lub cuabyig puastsuaj!”, tiamsis Vajntxwv Xalumoos hais tias: “Tsis kub siab lossis tso haujlwm tseg ua tsis tiav lossis tubnkeeg ces yog tus uas ua rau muaj kev puastsuaj ntag”.
Yog li ntawd, “tus neeg tubnkeeg” tsis yog tsuas ua rau tus kheej lub neej puastsuaj xwb, tiamsis tseem ua rau ntau yam zoo ntawm lwm tus ibncig kuj raug kev puastsuaj thiab, vim nws yuav dhau los ua lub nra hnyav rau kwvtij zej zog thaum nws tsuas xav txog tus kheej, xaiv tej haujlwm sib ua, tsis quavntsej ua muaj nqis rau lwm tus. “Tus neeg tubnkeeg” yog“tus tubtxib uas tsis tsimtxiaj” nyob hauv Mathais 25:14-30, thiab raug rau txim hynav heev, raug “pov rau sab nraum qhov uas tsaus ntuj nti, nws yuav quaj tom hniav qawv qhov ntawd”. Tus tubtxib no tsis ua yam txhaum, tiamsis raug txim vim tsis ua yam tsimnyog ua, nws “tubnkeeg” tsis ua tes haujlwm tus tswv muab cob.
Qhov twg thiaj yog lub luag haujlwm tus Tswv muab cob? Yam dabtsi thiaj yog tej koob hmoov tus Tswv pub rau peb siv los ua haujlwm rau Nws thiab rau Pawg Ntseeg? Yuav tsum muaj zeem muag licas rau lub luag haujlwm thiab tej koob hmoov tus Tswv muab cob? Niaj hnub nimno muaj coob leej nquag nrhiav nyiaj, siv zog ua kom tau nce qib hauv tes haujlwm, tiamsis ho “tub nkeeg” ua tej haujlwm sab ntsujplig thiab tub nkeeg ua tus Tswv haujlwm nrog lwm tus. Tshaj ntawd, muaj coob leej tseem siv tej koob hmoov tus Tswv pub los ua kom luag qhuas tus kheej heev dua qhuas tus Tswv, siv raws tus kheej siab nyiam heev dua siv raws tus Tswv siab nyiam. Muaj coob tug tabtom qab siab thaum “tub nkeeg” ua tus Tswv tes haujlwm vim xav hais tias tus kheej muaj koob muaj npe hauv Pawg Ntseeg. Cov neeg zoo li ntawd tabtom ua rau nws dhau mus ua “tus ua kom muaj kev puastsuaj” – ua rau tus ntawd lub neej sab ntsujplig raug kev puastsuaj, ua rau lawv tej menyuam raug kev puastsuaj thaum tej menyuam xyaum lawv lub neej “tub nkeeg”, thiab ua rau Pawg Ntseeg ntsib kev puastsuaj.
Thov Vajtswv,
Tus Tswv, thov pab nyuam yaus zeem paub tej koob hmoov thiab lub luag haujlwm Koj muab pub rau nyuam yaus thiab thov pab nyuam yaus ncaj ncees rau kev siv tej koob hmoov no los ua tiav tes haujlwm Koj muab cob. Amees.
Peb puas tabtom “tub nkeeg” ua tes haujlwm tus Tswv muab cob?
Nyeem Vajluskub hauv peb lub xyoo: Hanpakus 2
Kênh Youtube BHKTHN:
