Klei Aê Diê Blŭ: Klei Bi Hriêng 18:9
Êlan kliăng: “Hlei pô alah hlăm bruă ñu jing ayŏng adei hŏng pô bi rai. (Klei Bi Hriêng 18:9)
Klei êmuh ksiêm mĭn: Mtao Salômôn pia kơ hlei jing “pô bi rai”? Ya ngă? Hruê anei mâo mơ̆ ya nah tĭng kdriêk drei jing hĕ “pô bi rai”? Si klei mñă drei kơ klei yua mmông găl leh anăn klei brei myang Aê Diê brei kơ drei?
Tơdah lač kơ “pô bi rai” drei khăng bi mĭn kơ phung ngă klei jhat ƀai hlăm klei blŭ amâodah bruă ngă soh wê ba klei huĭ hyưt kơ arăng, ƀiădah êlan Klei Bi Hriêng anei brei ƀuh “ayŏng adei hŏng pô bi rai”, ăt jing “pô bi rai” mơh, amâo guôn mâo klei blŭ amâodah klei ngă soh wê ôh ƀiădah anăn jing “pô alah hlăm bruă ñu ”. “Alah” čiăng lač “hroh trŭn ti gŭ hĭn kơ hnơ̆ng čuăn”, amâodah “jing pô amâo uêñ”, “amâo mđing”, amâodah “amâo răng”. Hlăm Y‑Êsai 5:24 boh blŭ yua “pui čuh” agha rơ̆k krô leh anăn “pui ƀơ̆ng” adrăng čiăng lač kơ klei “alah” “phưi tha”. Hlăk Y‑Yôsuê iêô mthưr phung ƀuôn sang Israel brei plah mă bi djăl čar Kanaan, ñu yua boh blŭ mâo klei mblang msĕ hŏng boh blŭ “bi kdung” “kĭ kơ̆” jing “alah” (Y‑Yôsuê 18:3).
Năng ai mtao Salômôn dôk bi mĭn kơ rup sa čô mnuih hlăm gŏ sang alah ngă bruă pưk hma kyuanăn truh yan puôt wiă amâo mâo boh hrui ôh leh anăn atăt gŏ sang truh kơ klei ư̆ êpa. “Pô alah hlăm bruă ñu” khăng blŭ mgang: “Kâo amâo ngă klei jhat bi rai gŏ sang anei ôh!”, ƀiădah mtao Salômôn lač: “klei amâo uêñ amâodah phưi tha amâo ngă bi leh bruă amâodah alah yơh jing klei bi rai”.
Snăn, “pô alah” mă bruă amâo djŏ knŏng bi rai klei hdĭp ñu pô ƀiădah wăt ñu bi rai jih klei jăk siam phung riêng gah mơh, kyuadah ñu srăng jing klei ktrŏ bi suăi kơ êpul êya kyuadah knŏng mĭn uêñ hjăn kơ ñu pô, knŏng ruah bruă hdjul mơak kơ ñu pô ƀiădah amâo mđing uễn klei tŭ dưn kơ jih jang mnuih ôh. “Pô alah hlăm bruă ñu” jing “sa čô dĭng buăl ƀai leh anăn alah” hlăm Y‑Mathiơ 25:14-30, leh anăn tŭ klei bi kmhal ktrŏ snăk, “hwiê hĕ dĭng buăl amâo yuôm anăn hlăm anôk mmăt ti tač; tinăn srăng mâo klei čŏk hia leh anăn klei kriêt êgei”. Pô dĭng buăl anei amâo mâo ngă klei soh wê ôh, ƀiădah ñu tŭ klei bi kmhal kyuadah amâo mâo ngă ôh bruă năng ngă, ñu “alah” ngă bruă khua ñu jao kơ ñu.
Ya jing bruă klam Khua Yang dôk jao, talăng, klei brei čiăng kơ drei yua hlăm klei mă bruă kơ Khua Yang leh anăn kơ Phung Sang Aê Diê? Si knhuah drei wĭt ngă hŏng bruă klam leh anăn klei brei Aê Diê jao? Lu mnuih hruê anei kriăng snăk hlăm klei duah prăk, gĭr ktưn nanao čiăng đĭ kyar hĭn hlăm bruă knuă, ƀiădah “alah” hlăm bruă klei hdĭp myang leh anăn klei mă bruă kơ Aê Diê mbĭt hŏng phung ayŏng amai adei drei. Kdlưn hĭn mơh, đa mâo pô yua klei pap Aê Diê brei pioh mpŭ mni kơ ñu pô hĭn kơ mpŭ mni kơ Aê Diê, yua klei brei anăn tui si ñu pô čiăng hĭn kơ klei Aê Diê čiăng. Lu lĭn mnuih adôk êđăp ênang snăk tơdah “alah” hlăm bruă Aê Diê jao, kyua mĭndah ñu ba lu klei tŭ dưn leh kơ Phung Sang Aê Diê. Mnuih msĕ snăn dôk bi mjing ñu “pô bi rai” – bi rai klei hdĭp mngăt ñu pô, wăt bi rai klei hdĭp phung anak čô ñu dôk tui hlue knhuah dôk hdĭp “alah” diñu, leh anăn wăt bi rai Phung Sang Aê Diê mơh.
Si ngă drei dôk “alah” hlăm bruă Aê Diê jao mơ̆?
Wah lač: Ơ Khua Yang, akâo Ih đru kâo thâo kral klei brei leh anăn bruă klam Khua Yang jao kơ kâo leh anăn akâo Ih đru kâo sĭt suôr hlăm klei yua klei brei anei čiăng dưi bi leh bruă Khua Yang jao.
Dlăng Klei Aê Diê Blŭ hlăm tlâo thŭn: Y‑Haƀakuk 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
