Daniyees 7:9-21
Nqe cim:
“Luag yuav muab lub ntiajteb tej tebchaws uas muaj vajntxwv kav, tej hwjchim thiab tej kev vammeej cob rau tus Vajtswv uas muaj Hwjchim Loj kawg nkaus haivneeg tuav. Vajtswv haivneeg yuav muaj hwjchim kav mus ibtxhis. Tagnrho tej nomtswv uas nyob hauv ntiajteb no yuav ua lawv qhev thiab yuav mloog lawv lus” (nqe 27).
Lus nug rau sawvdaws xav:
– Tus cevlus Daniyees siv cov npe twg los tis rau tus Tswv?
– Cov npe ntawd muaj ntsiab lus licas?
– Lub npe twg yog lub uas ua rau koj muaj kev cia siab thiab txhawb tau koj lub zog nimno?
Zaj yogtoog pom plaub tus tsiaj thiab ib tug kub me me, hais txog cov tebchaws sawv tuaj rhuav kom puastsuaj thiab sib hloov kav xwb nws tsis yog tagnrho daim duab uas tus Tswv qhia rau tus cevlus Daniyees paub yav tom ntej. Zaj yogtoog no xam pom deb dua cov tebchaws uas nyob ib ntus ntawd, nws taw qhia txog tus Tswv peb lub npe hu. Thawj qhov, tom qab uas pom plaub tus tsiaj, Daniyees pom “tus uas muaj sia nyob ibtxhis txawm los zaum saum cov zwmtxwv” (nqe 9,22). Lub npe no hais txog ob zaug yog ob zaug uas tus Tswv “txiav txim” rau cov tsiaj ntawd (nqe 10 thiab nqe 22). Tus muaj sia nyob ibtxhis Nws yog tus uas txiav txim.
Qhov uas peb xav tsis thoob yog tus duab “muaj ib tug zoo li tus neeg. Nws txawm los ze rau ntawm kuv; muaj ib co huab los roos nws” (nqe 13) txhim tsa ib lub Tebhcaws nyob mus ibtxhis tsis puastsuaj li (nqe 14-15). Lo lus “neeg” no yog tus neeg uas Phau Ntawv Nkauj 8:4 thiab Exekees 2:1 hais txog, tiamsis tus neeg no “muaj ib co huab los roos” thiab kav tagnrho cov tebchaws Nws yog tus Tswv uas muaj hwjchim loj (Phau Ntawv Nkauj 104:3; Yaxayas 19:1). Yog li ntawd, tus neeg no ib ke yog neeg ib ke yog tswv. Tom qab no, Tswv Yexus siv lub npe Neeg Leej Tub hais txog Nws tus kheej ntau dua. Nws kuj hais txog ib hnub “Neeg Leej Tub… nrog huab nrog cua los saum ntuj los!” (Malakaus 14:62). Yog li ntawd, “muaj ib tug zoo li tus neeg” ntawm no yog tus duab pivtxog Neeg Leej Tub uas yog Tswv Yexus yuav los tsim tsa Nws lub Tebchaws nyob mus ibtxhis tsis kawg.
Dua li ntawd, tus cevlus Daniyees kuj hais plaub zaug txog lub npe “Vajtswv tus uas muaj Hwjchim Loj kawg nkaus”. Lub npe no hais ob zaug ntsig txog tus kub ua phem ua qias, hais lus twm Vajtswv thiab tsimtxom Vajtswv haivneeg (nqe 25), thiab hais ob zaug ntsig txog Vajtswv haivneeg muaj tebchaws thiab nrog tus Tswv kav (nqe 18, 22, 27). Yog li ntawd, lub npe no qhia paub muaj ib ntu sijhawm, tus Tswv yuav cia tej nomtswv vajntxwv hauv ntiajteb no kav ib ntus. Nws cia lawv thuam thiab ua saib tsis taus Vajtswv haivneeg, tiamsis Nws yog tus muaj Hwjchim Loj kav tagnrho txhua yam, cov neeg uas yog Nws tug yuav tau koob hmoov thaum dhau tej ntawd.
Thaum pom zaj yogtoog uas hais txog lub ntiajteb yuav los tom ntej no, tus cevlus Daniyees kuj pom tus Tswv yog tus uas muaj Hwjchim Loj kawg nkaus. Nyob rau ntu muaj tej kab mob kis, dej nyab, toj pob txhub thiab tej kev hloov pauv ntawm lub ntiajteb, peb pom yam dabtsi? Thov Vajtswv pub rau peb sawv ruaj khov thaum muaj tej kev tshwmsim hauv lub ntiajteb, vim peb tus Tswv yog tus uas muaj Hwjchim Loj kawg nkaus.
Tus Tswv uas hnub no nyob hauv koj tus kheej muaj lub npe hu licas?
Thov Vajtswv,
Vajtswv, ua Koj tsaug vim Koj yog tus uas txiav txim, yog tus tsim tsa lub Tebchaws ruaj khov thiab yog tus uas pub tau koob hmoov rau cov neeg uas ua ncaj ncees rau Koj. Thov Koj pab kom nyuam yaus niaj hnub ntsia ntsoov Koj kom nyuam yaus txojkev ntseeg ruaj khov thiab muaj kev cia siab. Amees.
Nyeem Vajluskub hauv peb lub xyoo: Phau Ntawv Nkauj 68.
Tshooj Youtube BHKTHN: https://www.youtube.com/c/bhkthn
