Klei Aê Diê Blŭ: Y‑Đaniel 7:9-21
Êlan kliăng: “Leh anăn arăng srăng jao ƀuôn ala mtao, klei dưi kiă kriê, leh anăn klei prŏng jih jang ƀuôn ala mtao ti gŭ jih adiê kơ phung doh jăk, phung ƀuôn sang Pô Ti Dlông Hĭn. Ƀuôn ala mtao Ñu srăng jing ƀuôn ala mtao dôk hlŏng lar, leh anăn jih jang phung kiă kriê srăng mă bruă leh anăn gưt kơ Ñu.’” (Y‑Đaniel 7:27).
Klei êmuh ksiêm mĭn: Si Anăn iêu kơ Khua Yang, khua pô hưn êlâo Y‑Đaniel yua? Si mblang kơ dŭm Anăn iêu anăn? Ya Anăn iêu ba klei čang hmăng leh anăn bi mđĭ ai kơ drei ară anei hin?
Klei bi êdah kơ pă drei hlô dliê leh anăn sa ki jhat ƀai bi ala kơ đơ ƀuôn ala mtao kgŭ bi rai leh anăn bi hrô mlih hdơ̆ng diñu, amâo djŏ jing kluôm jih rup hruê êdei Khua Yang čiăng bi êdah kơ khua pô hưn êlâo Y‑Đaniel ôh. Klei bi êdah dlăng kbưi hĭn kơ ƀuôn ala mtao dôk bhiâo anăn čiăng dlăng phă tlâo Anăn iêu kơ Khua Yang. Êlâo hĭn, leh klei bi êdah kơ pă drei hlô dliê, khua pô hưn êlâo Y‑Đaniel ƀuh mtam “Pô Dôk Hdĭp Mơ̆ng Ênuk Đưm dôk gŭ ti jhưng mtao” (êlan 9, 22). Dua blư̆ ƀuh Anăn iêu anei jing dua blư̆ djŏ tuôm hŏng “klei phat kđi” Ñu srăng phat kđi phung hlô dliê anăn (êlan 10 leh anăn 22). Pô Dôk Hdĭp Mơ̆ng Ênuk Đưm dôk hlŏng lar jing Pô phat kđi.
Klei bi kngăr jăk mơak hĭn kơ jih jang jing rup “Sa čô msĕ si Anak Mnuih hriê mbĭt hŏng knam mơ̆ng adiê” (êlan 13) čiăng mkŏ mjing sa Ƀuôn Ala Mtao dôk nanao hlŏng lar amâo dưi bi rai (êlan 14-15). “Anak Mnuih” jing ênhă êlan Klei Mmuñ Hđăp 8:4 leh anăn Y‑Êsêkiêl 2:1 čiăng lač kơ mnuih mang, ƀiădah anak mnuih “hriê mbĭt hŏng knam mơ̆ng adiê” leh anăn kiă kriê kluôm jih jang lăn čar bi êdah klei myang Khua Yang (Klei Mmuñ Hđăp 104:3; Ê-sai 19:1). Kyuanăn, Pô anei bi mguôp mbĭt dŭm knuih mnuih mbĭt hŏng klei jing sa čô yang. Êdei anei, Khua Yang Yêsu yua leh Anăn iêu Anak Mnuih čiăng lač kơ Ñu Pô lu hĭn kơ Anăn iêu mkăn. Ñu ăt lač mơh sa hruê “Anak Mnuih… lŏ hriê ti knam hlăm adiê” (Y‑Markôs 14:62). Kyuanăn, “sa čô mnuih msĕ si Anak Mnuih” tinei jing rup kơ Anak Mnuih jing Khua Yang Yêsu hriê čiăng mkŏ mdơ̆ng Ƀuôn Ala Mtao Ñu dôk nanao hlŏng lar.
Êngao kơnăn, khua pô hưn êlâo Y‑Đaniel ăt hưn mdah pă blư̆ kơ “Pô Ti Dlông Hĭn”. Anăn iêu anei dua blư̆ djŏ hŏng ki mgao, blŭ bi kdơ̆ng hŏng Khua Yang leh anăn dưi hŏng phung doh jăk Ñu (êlan 25), leh anăn dua blư̆ djŏ hŏng bruă phung doh jăk mă tŭ ƀuôn ala mtao leh anăn kiă kriê mbĭt hŏng Khua Yang (êlan 18, 22, 27). Kyuanăn Anăn iêu anei brei ƀuh hlăm sa gưl, Khua Yang lui kơ phung khua mtao lăn ala bhiâo anei dưi ngă. Ñu brei klei dưi kơ phung mưč, leh anăn jao phung doh jăk hlăm kngan diñu, ƀiădah Ñu jing Pô Ti Dlông Hĭn kiă kriê, phung jing dŏ Ñu srăng mă tŭ klei mưn hŏng klei năng hruê êdei.
Tơdah ƀuh klei bi êdah bŏ hŏng klei rŭng răng srăng truh kơ lăn ala hruê ti anăp, khua pô hưn êlâo Y‑Đaniel ƀuh wăt Khua Yang jing Pô Ti Dlông Hĭn mơh. Ti krah rup klei ruă tưp, klei truh hlăm yan adiê leh anăn klei bi mlih amâo dưi thâo êlâo kơ kđi čar lăn ala, ya klei drei ƀuh? Akâo kơ Khua Yang brei drei dôk kjăp ai tiê ti anăp jih jang klei bi mlih prŏng ti lăn ala, kyuadah Khua Yang drei jing Pô Ti Dlông Hĭn.
Ya Anăn iêu kơ Khua Yang drei ară anei?
Wah lač: Ơ Khua Yang, bi mni kơ Ih kyuadah Ih jing Pô phat kđi, Pô mkŏ mdơ̆ng Ƀuôn Ala Mtao dôk kjăp nanao leh anăn Pô brei klei mưn kơ hlei pô dôk sĭt suôr hŏng Ih. Akâo Ih đru kâo dlăng nanao phă Khua Yang čiăng dôk kjăp hĭn hlăm klei đăo leh anăn klei čang hmăng.
Dlăng Klei Aê Diê Blŭ hlăm tlâo thŭn: Klei Mmuñ Hđăp 68:1-35
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
