II Xwmtxheej Vajntxwv 21:16-19
Nqe cim:
“Nimno kuv cia nej xaiv saib nej yuav txojsia lossis yuav kev tuag, nej yuav tej lus foom koob hmoov lossis tej lus foom tsis zoo; kuv thov lub ntuj lub teb nrog ua timkhawv rau tej uas hnub no nej xaiv. Nej cia li xaiv txojsia.” (II Kevcai 30:19).
Lus nug rau sawvdaws xav:
– Cov Filitees thiab cov Alav ua rau cov Yudas puastsuaj li cas?
– Vajntxwv raug mob dabtsi?
– Vim li cas tus Tswv cia tej ntawd tshwmsim?
– Peb kawm tau yam dabtsi hais txog qhov uas tus Tswv ua li Nws hais?
Tagnrho tej uas tus Tswv hais rau Vajntxwv Yehaulas los ntawm tus cevlus Eliyas puavleej muaj tseeb. Nws “tshoov” cov Filitees nyob sab hnubpoob thiab cov Alav nyob sab hnubpoob yav qabteb tuaj ua rog rau Yehaulas. Ob haivneeg no coj nyiaj, coj khoom, coj tej tsiaj tuaj pub cov neeg Yudas tiam Yehausafas kav (II Xwmtxheej Vajntxwv 17:11) tiamsis nimno tuaj “tua cov Yudas, huab tej khoom hauv vajntxwv lub loog, ntes nws cov pojniam thiab nws cov tub huv tibsi mus, tsuas tseg Ahaxiyas uas yog Yehaulas tus tub ntxawg xwb” (nqe 17). Qhov no ua hiam ntau txojsia rau qhov cov neeg raug kaw puavleej raug tua tuag tas. Vajntxwv Yehaulas muab nws cov kwvtij txheeb tua tuag povtseg, nws cov tub los kuj raug tua tas tshuav tus tub ntxawg xwb. Tseb dab tsi yuav tau sau yam ntawd thiab tus Tswv ua raws li tej uas Nws hais (Yelemis 17:10). Thaum kawg, Vajntxwv Yehaulas raug mob plab. Mob tau ob xyoos, “nws tus mob pheej huam loj zuj zus mus txog hnub uas vajntxwv tuag” (nqe 19). Nov yog qhov xaus tu siab tshaj plaws ntawm ib tug neeg “ua txhaum rau tus Tswv” thiab “tso tus Tswv uas yog nws cov yawgkoob tus Vajtswv tseg.” (nqe 6, 10).
Tus Tswv ua raws li Nws hais, Vajntxwv Yehaulas tus tub ntxawg tseem nyob tsis tuag yog vim tus Tswv tej lus cog tseg rau Vajntxwv Daviv “Daviv cajces yuav tau ua vajntxwv mus li.” (nqe 7). Tus Tswv ncua sijhawm ntev rau Vajntxwv Yehaulas tig los lees txim. Nws rau txim rau vajntxwv hnyav zuj zus, ua rau cov Edoos thiab cov Linas ntxeev siab, tom qab ntawd tso tus cevlus Eliyas sau ntawv mus ceebtoom, thiab tso tej kev puastsuaj los raug nws thiab nws tej khoom txhua yam. Tus Tswv txib tus cevlus Eliyas sau ntawv xa mus qhia rau vajntxwv paub tej kev puastsuaj tsis yog nyob nyob cia li muaj tiamsis yog tus Tswv rau txim kom vajntxwv tso kev txhaum tseg. Thaum kawg nws mob tau ob xyoos kho tsis tau. Tiamsis txij thaum pib mus txog thaum xaus, txawm yog mob pw saum txaj los vajntxwv kuj tsis lees txim li.
Tus Tswv muab txojsia thiab koob hmoov, kev tuag thiab kev puastsuaj tso rau ntawm Nws haivneeg (II Kevcai 30:15) thiab Nws yeej yuav ua raws li Nws tau coglus tseg. Vajntxwv Yehaulas tsis kam lees txim, xaiv txojkev tuag thiab kev puastsuaj, vajntxwv thiab nws tsevneeg thiaj raug tej ntawd. Nov yog zaj kawm tseemceeb heev rau peb txhua tus. Tsis txhob saib tsis taus tus Tswv uas hais li cas Nws ua li ntawd tej lus ceebtoom. Cia li lees txim thaum tseem muaj sijhawm.
Thov Vajtswv,
Tus Tswv, nyuam yaus ua Koj tsaug vim Koj yog tus uas hais li cas ua li ntawd mus ibtxhis tsis hloov. Thov Koj qhia kom nyuam yaus zeem paub yam uas ua tsis haum Koj siab, lees txim, tso tseg los ua lub neej rau Koj tau ntsejmuag. Amees.
Muaj yam dabtsi peb cheemtsum lees txim thiab tso tseg mus?
Nyeem Vajluskub hauv peb lub xyoo: Tes Haujlwm 24
Kênh Youtube BHKTHN:
