Yelemis 45:1-5
Nqe cim:
“Koj pheej yuav nrhiav kev tau zoo rau koj xwb no los? Koj tsis txhob ua li ntawd; kuv yuav tso kev puastsuaj los raug neeg ntiajteb; tiamsis txawm yog koj nyob qhov twg los koj yuav dim thiab tau txojsia. Kuv yog tus Tswv uas hais li ntawd” (Yelemis 45:5).
Lus nug rau sawvdaws xav:
– Vim licas Npalus qaug zog thiab cheemtsum tej lus txhawb zog?
– Tus Tswv coglus yuav pub rau nws yam dabtsi?
– Yuav ua cas peb thiaj muaj kev txaus siab thiab kaj siab hauv lub neej?
Lub npe Npalus txhais hais tias “tau koob hmoov”. Ncaj rau xyoo tim plaub uas Yehauyakees ua vajntxwv, tus Tswv hais kom tus cevlus Yelemis sau tus Tswv tej lus rau hauv ib thooj ntawv thiab Yelemis tau xaiv Npalus ua tus teev ntawv, Yelemis thiaj piav txhua yam uas tus Tswv qhia rau nws lawm rau Npalus sau rau hauv ib thooj ntawv (Yelemis 36:1-4). Npalus koom tes nrog tus cevlus Yelemis hauv kev ua haujlwm, vim li ntawd nws paub meej txhua lo lus tus Tswv hais txog cov Yudais thiab tej uas lawv yuav raug. Tiamsis txog sijhawm no, thaum uas txhua yam tshwmsim li tus Tswv tej lus lawm, ces Npalus ho hnov qaug zog thiab hais lus nroo hais tias: “Kuv tiv tsis taus lawm! Kuv twb raug kev txomnyem los tus Tswv tseem tsub kev nyuaj siab ntxiv rau kuv. Kuv niaj hnub quaj qaug zog tas tsis tau so li!” (nqe 3). Tus Tswv uas puv npo kev hlub tau nplig Npalus siab hais tias txawm neeg ntiajteb yuav raug puastsuaj los Nws yuav pub rau Npalus tau txojsia. Thiab tus Tswv nug Npalus ib lo hais tias: “Koj pheej yuav nrhiav kev tau zoo rau koj xwb no los?”, ntawd kuj yog ib los lus qhuab ntuas kom Npalus txiav txim siab “tsis txhob ua li ntawd” (nqe 5).
Paub tseeb hais tias tus Tswv tej lus nplig siab yeej ua rau Npalus tej kev ntxhov siab yaj xam mus lawm. Yog tus uas sau tus Tswv tej lus hais txog tus Tswv kev txiav txim rau haivneeg Yudais, paub tseeb hais tias Npalus kuj ntseeg hais tias yuav muaj tiav li tej lus cev tseg ntawd. Tiamsis txog thaum muaj tiav lawm, Npalus nyuaj siab thiab mob siab vim nws pom lub tebchaws puas tsus, cov txheeb ze sib cais, thiab tus kheej lub neej yav tom ntej tsaus nti. Kuj zoo ib yam li lwm tus tub hluas, Npalus yeej muaj zaj npau suav kos tseg rau nws lub neej yav tomntej thiab npaj siab ua raws li nws xav. Raws li Npalus lub peevxwm, tej yam ntawd yeej tsis yog yam nyuaj ua. Tiamsis nimno yuav ua cas nrhiav pom kev tau meejmom, tau zoo thaum lub tebchaws puas tsus thiab tsis paub hnub twg txojsia tu. Tus Tswv tej lus nplig siab ua rau Npalus puv npo kev cia siab thiab txaus siab txawm thaum ntawd nws tabtom ntsib teebmeem.
Vajtswv Txojlus cogtseg rau peb hais tias: “Rau qhov nqi zog ntawm txojkev txhaum yog kev tuag, tiamsis txoj koob hmoov uas Vajtswv pub dawb yog txojsia ntev dhawv mus ibtxhis uas los ntawm Yexus Khetos tus uas yog peb tus Tswv los” (Loos 6:23). Nyob hauv lub neej ntxhov hnyo, thaum tig saib mus rau lo lus cogtseg no yuav ua rau peb muaj kev txaus siab thiab kaj siab kom peb tsis xav txog “nrhiav kev tau zoo” rau tus kheej tiamsis yuav paub tig nrhiav tus Tswv thiab ua raws Nws Txojlus qhia.
Thov Vajtswv
Vajtswv! Koj paub nyuam yaus tus kheej thiab yam uas nyuam yaus tabtom ntsib. Thov pab nyuam yaus cia siab thiab muab lub neej cob rau ntawm Koj, txhob nrhiav kev tau zoo rau nyuam yaus tus kheej. Amees.
Yam zoo rau tus kheej uas peb tabtom nrhiav yog dabtsi? Peb puas tas siab tas ntsws ntseeg tej uas Vajtswv Txojlus coglus yuav pub rau peb lawm tau?
Nyeem Vajluskub hauv peb lub xyoos: Lukas 21:5-38
Kênh Youtube BHKTHN:
