Henplais 12:4-6
Nqe cim:
“Rau qhov tus Tswv qhuab ntuas txhua tus uas nws hlub, thiab nws nplawm txhua tus uas nws coj los ua nws tub” (Henplais 12:6).
Lus nug rau sawvdaws xav:
– Tus uas tus Tswv hlub yog leejtwg? Homphiaj tus Tswv qhuab ntuas yog dabtsi?
– Vim licas tus Tswv ho cia tus Nws hlub raug txomnyem?
– Peb yuav tsum muaj tus cwjpwm licas thaum tus Tswv qhuab ntuas?
Vajtswv Txojlus qhia paub hais tias Nws hlub txhua tus neeg hauv qab ntuj (Yauhas 3:16). Vim hlub Nws tsis xav cia ib tug neeg twg raug puastsuaj mus tiamsis xav kom txhua tus tig los lees kev txhaum (II Petus 3:9). Txawm yog tus Tswv hlub txhua tus tibneeg los tsuas yog tus uas txais yuav tus Tswv txojkev hlub los ntawm kev ntseeg Tswv Yexus xwb thiaj tau suav hais tias yog Vajtswv menyuam (Yauhas 1:12). “Tus Tswv qhuab ntuas txhua tus uas Nws hlub”, txhua tus nws hlub no tsis yog hais txog txhua tus tibneeg tiamsis yog hais txog cov uas tau txais yuav Tswv Yexus tseeb lawm, xubthawj ces yog cov ntseeg neeg Henplais nyob tiam thib ib, thiab tomqab ntawd yog txhua tus ntseeg.
Vim licas tus Tswv ho qhuab ntuas tus Nws hlub? Nyob hauv lus Kilis, lo lus “qhuab ntuas” tseem muaj lub ntsiab hais tias “qhuab ntuas menyuam”. Hais tau hais tias, homphiaj ntawm kev “qhuab ntuas” yog pab kom “pauv hloov”, rov ua kom yog tej yam uas tau ua txhaum lawm. Nyob ntawm no, tus sau siv nqe Vajluskub hauv Pajlug 3:12: “Tus Tswv qhuab ntuas tus uas Nws hlub ib yam li leej txiv qhuab ntuas tus tub uas nws cia siab rau” los hais. Qhov uas tus Tswv qhuab ntuas tus Nws hlub zoo li niam txiv qhuab ntuas menyuam yog muaj homphiaj pab menyuam paub txog nuj nqis ntawm tej kev txhaum nws ua, ceebtoom menyuam txhob ua txhaum ntxiv, thiab pab menyuam kawm tau zaj kawm rau nws lubneej.
Muaj ib lo lus luag pheej nug yog “vim licas tus Tswv cia Nws cov menyuam raug txomnyem?” Nyob hauv feem kawg ntawm Henplais 11, peb twb kawm tau ib lub vimchiv lawm, ntawd yog lawv tiv kev txomnyem, vim “lub ntiajteb no tsis phim rau lawv nyob”, lawv txaus siab tiv kev txomnyem mus txog tuag kom tau “txojsia uas zoo dua” nyob hauv Tebchaws ibtxhis tsis yog nyob hauv ntiajteb ibvuag no. Nyob hauv ntu Vajluskub hnub no, peb kawm tau ib lub vimchiv ntxiv, ntawd yog vim “tus Tswv qhuab ntuas txhua tus uas Nws hlub”. Tej zaug peb raug txomnyem vim peb tabtom raug tus Tswv qhuab ntuas kom peb loj hlob dua qub, qhov nyuaj yog peb puas zeem paub li ntawd xwb.
Thaum zeem paub hais tias yus tabtom tau tus Tswv qhuab ntuas, peb tsis txhob “saib tsis taus”, txhob xav hais tias ntawd tsuas yog tej “teebmeem”, “swb yam no mam pib lwm yam” lossis yws tus Tswv. Yuav tsum ua tibzoo ntsuam xyuas tus kheej tes haujlwm thiab lub siab, puas muaj yam txhaum twg cheemtsum hloov pauv. Nrog rau qhov ntawd, peb kuj “txhob poob siab”, qaug zog, nkees thiab tso tseg tsis koom txojkev sibtw. Cia li saib ntsoov tus ntoo khaublig uas Vajtswv Leejtub tau ris peb lub txim kom peb txhob hnov qab tus Tswv txojkev hlub loj npaum cas, txawm yog peb raug Nws qhuab ntuas.
Thov Vajtswv,
Tus Tswv, thov ua Koj tsaug vim Koj hlub nyuam yaus txhua sijhawm, tsis hais thaum tabtom raug Koj qhuab ntuas. Thov pab nyuam yaus zeem paub Koj lub siabnyiam thaum ntsib kev sim siab txomnyem. Nyuam yaus tuav Yexus Khetos lub npe thov, Amees.
Peb puas ua saib tsis taus, yws, poob siab thaum paub tias tus Tswv qhuab ntuas peb?
Nyeem Vajluskub hauv peb lub xyoo: Levis Kevcai 9
Kênh Youtube BHKTHN:
