Klei Aê Diê Blŭ: Hêbrơ 12:4-6
Êlan kliăng: “Kyuadah Khua Yang mkra mjuăt hlei pô Ñu khăp, leh anăn čăm hŏng giê grăp čô anak Ñu jum” (Hêbrơ 12:6)
Klei êmuh ksiêm mĭn: Hlei jing pô Khua Yang khăp? Ya klei kñăm čiăng kơ klei mkra mjuăt jing? Ya ngă Khua Yang lui phung Ñu khăp tŭ klei knap mñai? Si knuih brei drei mâo tơdah tŭ klei Khua Yang mkra mjuăt?
Klei Aê Diê Blŭ brei thâo Aê Diê khăp kơ jih jang mnuih ti lăn ala (Y-Yôhan 3:16). Kyuadah Ñu khăp kyuanăn Ñu amâo čiăng sa čô mnuih rai tuč ôh ƀiădah Ñu čiăng jih jang mnuih kmhal kơ klei soh sơăi (II Y-Pêtrôs 3:9). Wăt tơdah Aê Diê khăp kơ jih jang mnuih, ƀiădah knŏng hlei pô lŏ wĭt ngă djŏ hŏng klei khăp Ñu hŏng klei đăo kơ Khua Yang Yêsu yơh dưi jing anak Ñu sĭt (Y-Yôhan 1:12). “Khua Yang mkra mjuăt hlei pô Ñu khăp” lač hlăm trăn Klei Aê Diê Blŭ anei amâo djŏ čiăng lač kơ jih jang mnuih ôh, ƀiădah lač knŏng kơ hlei pô đăo sĭt kơ Khua Yang Yêsu, tal êlâo hĭn jing phung đăo Hêbrơ hlăm ênuk tal sa, êdei tinăn jing jih jang phung đăo kơ Krist.
Ya ngă Khua Yang mkra mjuăt hĕ pô Ñu khăp? Hlăm boh blŭ phŭn klei Grek, boh blŭ lŏ mblang jing “mkra mjuăt” lŏ mblang jing “bi hriăm anak čô” mơh. Blŭ mdê hĭn, klei kñăm čiăng kơ klei “mjuăt” jing pioh “mkra”, lŏ mkra bi djŏ ya klei soh leh, amâo lŏ djŏ pruê̆ êlan ôh. Tinei pô čih hră Hêbrơ hrêč yua Klei Bi Hriêng 3:12, “Kyuadah Yêhôwa mkra hlei pô Ñu khăp, msĕ si sa čô ama ngă kơ anak ñu khăp.” Klei Khua Yang mkra mjuăt pô Ñu khăp jing msĕ si amĭ ama mkra mjuăt phung anak čiăng kơ digơ̆ thâo săng kơ boh jhat mơ̆ng klei soh digơ̆ ngă leh, đru digơ̆ thâo răng amâo lŏ ngă soh ôh, leh anăn đru anak thâo mă klei hriăm kơ gơ̆ pô.
Mâo sa klei êmuh amâo tuôm mdei êmuh ôh jing “ya ngă Khua Yang lui hĕ phung anak čô Ñu tŭ klei knap mñai?” Hlăm kdrêč knhal tuč Hêbrơ 11, drei hriăm leh kơ sa klei lŏ wĭt lač, anăn jing: digơ̆ tŭ klei knap mñai kyuadah “lăn ala amâo năng kơ diñu ôh”, digơ̆ tŭ ư srăng tŭ klei knap mñai tơl djiê “čiăng dưi lŏ hdĭp klei hdĭp jăk hĭn” hlăm Ƀuôn ala mtao hlŏng lar Aê Diê amâo djŏ ti lăn ala anôk jưh bhiâo anei ôh. Hlăm trăn Klei Aê Diê Blŭ hruê anei, drei lŏ mâo thiăm sa klei wĭt lač mơh, anăn jing kyuadah “Khua Yang mkra mjuăt hlei pô Ñu khăp.” Năng ai drei tŭ klei knap mñai kyuadah Khua Yang dôk mkra mjuăt drei čiăng kơ drei dưi đĭ hriê kơ prŏng hĭn, klei čiăng lač jing – drei mâo klei djăl thâo ƀuh hĕ amâodah hơăi đuč.
Tơdah thâo kral kơ drei pô Khua Yang dôk mkra mjuăt, đăm drei “ngă klei amâo uêñ”, čiăng lač đăm dlăng hơăi mang kơ klei anăn ôh leh anăn lač anăn jing knŏng “klei truh đuč”, “amâo dưi êlan anei drei ngă êlan mkăn”, amâodah blŭ duñ duñ ƀuah kơ Khua Yang. Brei drei lŏ ksiêm bi nik kơ bruă drei ngă leh anăn kơ ai tiê drei, mâo mơ̆ klei soh čiăng drei lŏ mkra hĕ. Mbĭt hŏng klei anăn, đăm drei “êdu ai” ôh, tơl drei jing awăt, êgah êmăn leh anăn ti knhal tuč drei lui yơh, amâo lŏ gĭr ôh hlăm klei bi lông êran. Dlăng bĕ kơ kyâo bi kal anôk Anak Aê Diê mâo knŏng sa čô tŭ leh klei bi kmhal kyua drei čiăng drei amâo wơr ôh si ngă klei Khua Yang khăp kơ drei, wăt hlăm klei Khua Yang mkra mjuăt.
Drei ngă klei amâo uêñ, ƀuah amâodah êdu ai mơ̆ tơdah thâo kơ Khua Yang mkra mjuăt drei?
Wah lač: Ơ Khua Yang, kâo lač jăk kơ Ih kyuadah Ih khăp kơ kâo nanao, wăt hlăm klei Ih mkra mjuăt, đru kâo djăl thâo săng tơdah bi tlă anăp hŏng klei knap mñai čiăng kâo thâo kral klei Ih čiăng leh anăn hŏng klei luă gŭ mă tŭ klei Ih bi hriăm. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Bruă Lêwi 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
