Khiavdim 34:25-26; Khiavdim 12:3-11; 23:19)
Nqe cim:
“Nej tsis txhob muab ncuav xyaw keeb nqa tuaj fij thaum nej tua tsiaj fij rau kuv. Nej tsis txhob tseg tej nqaij uas nej tua ua Kevcai Hla Dhau mus txog tagkis kaj ntug.” (Khiavdim 34:25).
Lus nug rau sawvdaws xav:
- Tus Tswv qhia Nws haivneeg yam dabtsi?
- Txhua yam ntawd txhais tau li cas?
- Tej uas tus Tswv ua ntsig txog li cas rau peb tiam no?
Hauv nqe 25-26, tus Tswv qhia rau Nws haivneeg peb yam: Tim ib, cov ntshav ntawm tus tsiaj tua ua Kevcai Hla Dhau yuav tsum muab fij nrog cov ncuav tsis xyaw keeb zoo ib yam li hmo uas ua kevcai hla dhau hauv tebchaws Iziv. Vim muaj tus tsiaj cov ntshav pleev ntawm qhovrooj, cov Yixalayees tej tub hlob thiaj tsis tuag thaum tus timtswv mus dhau. Tus tsiaj tua ua Kevcai Hla Dhau piv txog Tswv Yexus yuav los cawm tibneeg ntiajteb; yog li tus tsiaj cov nqaij tau suav hais tias dawbhuv, yuav tsum noj cov nqaij kom tas hmo ntawd thiab muab cov uas seem noj tsis tas coj mus faus ua ntej pom kev, tsis pub kom tsw. Nimno lub ncuav ci thiab khob dej liab hauv tus Tswv Rooj Mov pivtxog tus Tswv lub cev raug txomnyem thiab tus Tswv cov ntshav ntws los ntxuav peb tej kev txhaum. Yog li, peb yuav tsum ua tib zoo saib thaum txais lub ncuav thiab khob dej, tshuaj saib yus tus kheej raws li tus Tswv Txojlus qhia thiab hwm tus Tswv.
Tim ob, tus Tswv haivneeg yuav tsum fij tej qoobloo rau tus Tswv ua Nws tsaug. Thawj cov qoobloo uas zoo tshaj plaws thiab qab tshaj muab coj tuaj fij rau tus Tswv, qhia tawm yus lub siab hlub Nws, fij rau Nws yam muaj nqis tshaj. Fij thawj cov qoobloo kuj yog qhia paub, ntseeg hais tias tus Tswv yuav pub muaj noj haus txaus. Tus Tswv yuav txais yuav Nws haivneeg lub siab, tom qab ntawd Nws pub rau cov povthawj noj tej qoobloo no. Tus Tswv hmov tshua txog cov neeg uas ua tus Tswv tes haujlwm (Levis Kevcai 23:17-20; Teev Npe 18:12-13). Nimno, los ntawm lub siab ua tus Tswv tsaug, peb fij rau Nws tej uas muaj nqis tshaj xws li Nyablaj zaj nkauj 374 hais: “Muab qhov zoo tshaj fij rau tus Tswv, lub neej hluas thiab dag zog… lub siab ua tsaug pehawm Nws xwb, fij yam zoo tshaj pub rau Nws.” Dua li ntawd, Pawg Ntseeg kuj yuav tsum hmov tshua txog cov neeg uas tu tus Tswv pab yaj lub neej kom lawv muaj lub siab tiaj tus ua haujlwm.
Tib peb, tus Tswv haivneeg tsis txhob hau cov nqaij xyaw kuamis. Qhov no yog tej uas lwm haivneeg ua thaum fij khoom rau lawv tej dab mlom. Tus Tswv txoj kevcai txwv cov Yixalayees “Nej tsis txhob mus coj cov neeg uas ibtxwm nyob hauv lub tebchaws ntawd tej kevcai; kuv muab cov neeg ntawd ntiab tawm mus, nej thiaj tau mus nyob hauv lub tebchaws ntawd. Lawv pheej ua tej kev phem kev qias kuv thiaj ntxub lawv heev.” (Levis Kevcai 20:23). Nimno, cov ntseeg Yexus yog cov neeg uas tau tus Tswv xaiv los ua haivneeg dawbhuv, ua raws li tus Tswv Txojlus, tsis txhob mus caum tej zaj uas neeg suav hais tias tseemceeb, tej uas yog ntiajteb li.
Thov Vajtswv,
Tus Tswv, thov Koj pab kom nyuam yaus totaub Koj Txojlus thiab ua lub neej raws li Koj qhia txhua hnub. Thov Koj pab kom nyuam yaus muaj txojkev sib raug zoo nrog Koj, nrog Pawg Ntseeg, tej txheebze thiab cov tsis ntseeg. Amees.
Peb puas tau muaj txojkev sib raug zoo nrog tus Tswv, Pawg Ntseeg thiab tsevneeg?
Nyeem Vajluskub hauv peb lub xyoo: Amaus 9
Kênh Youtube BHKTHN:
