Klei Aê Diê Blŭ: Klei Kbiă 34:25‑26
Êlan kliăng: “Đăm myơr ôh êrah mnơ̆ng ngă yang mpŭ kơ kâo hŏng kpei; kăn brei adôk rei tơl aguah mnơ̆ng ngă yang kơ Klei Knăm Klei Găn” (Klei Kbiă 34:25)
Klei êmuh ksiêm mĭn: Ya klei Aê Diê bi hriăm phung ƀuôn sang Ñu? Si klei yuôm bhăn hlăm djăp mta klei? Si klei Aê Diê mtô djŏ kơ drei hruê anei?
Hlăm êlan 25‑16, Aê Diê mtô phung ƀuôn sang Ñu tlâo klei: tal sa, êrah mnơ̆ng ngă yang hlăm Knăm Klei Găn brei myơr mbĭt hŏng kpŭng amâo kpei msĕ si mlam kbiă mơ̆ng čar Êjip. Kyua êrah mnơ̆ng ngă yang mmia ti boh ƀăng anăn phung anak êkei khua mnuih Israel tlaih djiê hlăk dĭng buăl jăk Aê Diê găn. Mnơ̆ng ngă yang arăng čuh hlăm Knăm Klei Găn jing klei bi hmô mơ̆ng Khua Yang Yêsu srăng tuh êrah čiăng bi tui anak mnuih; kyua anăn kđeh mnơ̆ng ngă yang dưi yap jing doh, kđeh anăn brei dưi ƀơ̆ng hlăm mlam leh anăn dơr kdrêč adôk êlâo kơ adiê truh aguah, ñĕ kơ klei ƀâo brŭ. Hruê anei, kpŭng leh anăn kčok hlăm Klei Ƀơ̆ng Mnăm Sĭt Suôr bi hmô kơ asei Khua Yang êka leh anăn êrah Khua Yang Yêsu tuh leh kyua klei soh drei. Kyua anăn, brei drei răng tơdah djă kpŭng leh anăn kčok, thâo ksiêm dlăng pô hlue si Klei Aê Diê Blŭ mtô čiăng bi êdah ai tiê mpŭ kơ Aê Diê.
Tal dua, phung ƀuôn sang Aê Diê myơr boh hlâo hlang kơ Yêhôwa Aê Diê čiăng bi êdah klei hdơr knga. Boh hlâo hlang jing dŭm mta mnơ̆ng jăk hĭn dưi mđing tal êlâo myơr kơ Aê Diê, bi êdah klei khăp kơ Aê Diê, myơr kơ Ñu klei yuôm hĭn. Myơr boh hlâo hlang ăt bi êdah klei đăo Aê Diê srăng mkăp djăp ênŭm mnơ̆ng ƀơ̆ng kơ diñu hlăm yan anăn. Yêhôwa Aê Diê srăng tŭ mă ai tiê phung ƀuôn sang Ñu, leh anăn Ñu lŏ brei kơ phung khua ngă yang dŭm mta mnơ̆ng anei. Aê Diê mđing nanao kơ klei hdĭp phung mă bruă ti anăp Ñu (Bruă Lêwi 23:17‑20; Klei Yap 18:12‑13). Hruê anei, hŏng ai tiê thâo hdơr kơ Aê Diê, drei myơr kơ Ñu klei yuôm hĭn msĕ si Klei Mmuñ 374:“Myơr bĕ kơ Ñu jing mnơ̆ng yuôm hĭn, Myơr klei ktang ih êjai hlăk ai…Myơr bĕ ai tiê ih hŏng klei khăp, Jao kơ Ñu jih mnơ̆ng yuôm hin.” Êngao anăn, Sang Aê Diê ăt brei mđing kơ klei hdĭp phung kiă kriê Sang Aê Diê čiăng kơ digơ̆ hơĭt ai tiê mă bruă Khua Yang.
Tal tlâo, phung ƀuôn sang Aê Diê đăm tŭk êđai bê hlăm êa ksâo ana gơ̆ ôh. Anei jing bruă phung nah êngao ngă tơdah myơr mnơ̆ng ngă yang kơ phung yang digơ̆. Klei bhiăn Aê Diê kăm phung Israel “Đăm ngă ôh tui hlue klei bhiăn phung găp djuê kâo amra suôt mơ̆ng anăp diih; kyuadah diñu ngă leh jih jang klei anăn, leh anăn kyuanăn kâo bi êmut snăk kơ diñu” (Bruă Lêwi 20:23). Hruê anei, phung đăo kơ Krist jing phung mâo Aê Diê ruah mjing phung doh jăk, phung ƀuôn sang pioh hjăn kơ Aê Diê (I Y‑Pêtrôs 2:9), kyua anăn klei hdĭp drei brei doh jăk, hdĭp hlue si hnơ̆ng čuăn Aê Diê hlăm Klei Aê Diê Blŭ đăm tui tiŏ ôh klei jhat ƀai ti lăn ala.
Drei mkŏ mjing klei bi mguôp sĭt suôr hŏng Aê Diê, Sang Aê Diê leh anăn gŏ sang leh mơ̆ amâodah ka?
Wah lač: Ơ Khua Yang, akâo kơ Ih đru kâo thâo săng Klei Aê Diê Blŭ leh anăn hdĭp tui Klei Aê Diê Blŭ mtô grăp hruê. Akâo kơ Ih đru kâo mkŏ mjing klei bi mguôp sĭt suôr hŏng Ih, bi mơak kơ Ih hlăm klei bi mguôp hŏng Sang Aê Diê, găp djuê anăn phung amâo đăo.
Dlăng Klei Aê Diê Blŭ hlăm tlâo thŭn: Y‑Amôs 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
