I Timautes 1:1-3
Nqe cim:
“Timautes, kuv sau tsab ntawv no tuaj rau koj. Kuv hlub koj ib yam li koj yog kuv tus tub, rau qhov koj thiab kuv wb ntseeg ib yam nkaus. Thov Vajtswv tus uas yog peb Leej Txiv thiab peb tus Tswv Yexus Khetos foom koob hmoov rau koj, hlub koj thiab pab kom koj tau zoo nyob kaj siab lug.” (I Timautes 1:2)
Lus nug rau sawvdaws xav:
– Lo lus hu tias “koj yog kuv tus tub” qhia tau hais tias Timthawj Paulus muaj qabhau li cas hauv Timautes lub neej sab kev ntseeg?
– “Koob hmoov, kev hlub thiab kev kaj siab” tseemceeb li cas rau Timautes?
– Peb kawm tau dabtsi hauv zaj kawm no?
Thaum pib tsab ntawv I Timautes, Timthawj Paulus qhia txog nws tus kheej tias yog “Yexus Khetos… ib tug timthawj”, thiab tus uas txais tsab ntawv yog Timautes uas yog nws “tus tseem tub hauv txojkev ntseeg” (HMOWSV). Lo lus hais no qhia tau tias Timthawj Paulus yog ib leej txiv thiab ib tug cob qhia sab kev ntseeg rau tus hluas Timautes. Peb kawm tau peb zaj kawm rau peb tus kheej.
Qhov xubthawj, Timthawj Paulus sau tsab ntawv rau tus hluas Timautes uas yog nws “tus tseem tub hauv txojkev ntseeg”. Nqe 3 qhia tias Timautes tau Timthawj Paulus txib kom nyob pab saib xyuas Pawg Ntseeg Efexus thiab tiv thaiv kom tsis txhob muaj kev qhia cuav kis mus ntxiv. Timautes tsis yog ib tug ntseeg tshiab lossis muaj kev ntseeg tsawg, tiamsis nws yog ib tug tub yug yaj! Tsis muaj leej twg uas yuav khav tau hais tias nws twb nkag siab txhua yam lawm. Txawm yog tus uas loj hlob hauv tus Tswv lossis tus thawj coj sab kev ntseeg, los yeej tseem yuav tsum ua “tus tseem tub hauv txojkev ntseeg” ntawm lwm tus uas loj hlob dua yus. Peb txhua tus kuj yuav tsum muaj nyias tus tub hauv kev ntseeg kom tau cob qhia thiab saib xyuas sab ntsujplig.
Qhov thib ob, Timthawj Paulus tau hlub tshua thiab txhawb zog rau nws tus tub hauv txojkev ntseeg los ntawm kev sau tsab ntawv rau nws (nqe 2). Txawm ob leeg nyob qhov chaw sib deb, los kev hlub tshua thiab txhawb zog ntawm Timthawj Paulus thiab nws “tus tseem tub hauv txojkev ntseeg” yeej tsis tu. Los ntawm tsab ntawv uas Timthawj Paulus sau, nws txhawb thiab qhuab ntuas Timautes txog tej yam uas cheemtsum. Niaj hnub nim no peb muaj ntau txoj haukev sib txuas lus dua, thov tus Tswv pab kom peb siv tau txhua txoj haukev ntawd los sib txhawb hauv txojkev ntseeg.
Qhov thib peb, Timthawj Paulus xav kom nws tus tub hauv txojkev ntseeg cia siab rau tus Tswv txoj koob hmoov. Tus xibhwb hluas Timautes tau nws leej txiv sab ntsujplig tso nyob hauv Pawg Ntseeg Efexus ncaj rau lub sijhawm uas muaj coob leej tabtom qhia tej yam uas yuam kev hauv Pawg Ntseeg (nqe 3). Nyob hauv lub tsamthawj uas muaj kev sim siab li ntawd, yam uas Timthawj Paulus xav kom Timautes muaj tsis yog kev txawjntse lossis kev txawj daws teebmeem, tiamsis yog “koob hmoov, kev hlub thiab kev kaj siab” ntawm Vajtswv (nqe 2). Muaj coob tus ntawm peb cia siab rau Vajtswv txoj koob hmoov thiab kev hlub tshua thaum peb los ntseeg tshiab, tiamsis tom qab ntawd, peb ua neej ntseeg thiab ua Vajtswv haujlwm los ntawm tus kheej lub peevxwm thiab lub zog lawm xwb. Timthawj Paulus qhia pom Vajtswv txoj koob hmoov thiab kev hlub yeej yog lub zog uas pab Timautes tawmtsam txhua yam kev sim siab hauv lubneej thiab kev ua haujlwm. Thiab txoj kev kaj siab yeej yog qhov khoom plig muaj nqis tshaj plaws uas tus Tswv pub rau peb, txawm peb yog leej twg thiab tabtom ntsib tej teebmeem dabtsi.
Thov Vajtswv,
Tus Tswv, thov pab kom nyuam yaus txo hwjchim thiaj tau kev coj thiab taw qhia ntawm cov uas loj hlob sab ntsujplig. Thov pab kom nyuam yaus paub hlub thiab txhawb zog rau tus tub sab ntsujplig uas Koj tau tso rau nyuam yaus. Nyuam yaus tuav Yexus Khetos lub npe thov, Amees.
Leejtwg yog peb leej txiv thiab leejtwg yog peb leej tub ntawm sab ntsujplig? Peb sib txhawb hauv txojkev ntseeg zoo li cas?
Nyeem Vajluskub hauv peb lub xyoos: II Xwmtxheej 30
Kênh Youtube BHKTHN:
