Klei Aê Diê Blŭ: I Y-Timôthê 1:1-3
Êlan kliăng: “Čih mơĭt kơ Y-Timôthê, anak kâo sĭt hlăm klei đăo. Brei ih mâo klei jăk, klei pap, leh anăn klei êđăp ênang …” (I Y-Timôthê 1:2a)
Klei êmuh ksiêm mĭn: Klei pia “anak kâo sĭt hlăm klei đăo” brei ƀuh si bruă klam Khua ƀĭng kna Y-Pôl hlăm klei hdĭp myang êkei êdam Y-Timôthê? Si “Klei jăk, klei pap, leh anăn klei êđăp ênang” čiăng êdi hŏng Y-Timôthê? Ya klei drei hriăm mơ̆ng klei hriăm anei?
Kčưm dơ̆ng hră I Ti-mô-thê, Khua ƀĭng kna Y-Pôl čŏng hưn pô jing “Khua ƀĭng kna Khua Yang Yêsu Krist”, leh anăn pô mă tŭ hră jing “Y-Timôthê, anak kâo sĭt hlăm klei đăo”. Klei iêô anei brei ƀuh Khua ƀĭng kna Y-Pôl mâo bruă klam jing ama, pô đru kčĕ hlăm klei hdĭp myang hŏng êkei hlăk ai Y-Timôthê. Drei mâo tlâo klei hriăm kơ pô.
Tal sa, Khua ƀĭng kna Y-Pôl čih hră kơ êkei hlăk ai Y-Timôthê jing “anak hlăm klei đăo” ñu. Êlan 3 brei ƀuh Y-Timôthê mâo Khua ƀĭng kna Y-Pôl jao brei dôk kriê dlăng kơ Phung Sang Aê Diê Êphêsô leh anăn gang mkhư̆ klei đăo soh lar. Êkei hlăk ai Y-Timôthê amâo djŏ jing mnuih mrâo đăo kơ Aê Diê amâodah êdu awăt hlăm klei đăo ôh ƀiădah jing pô kiă phung biăp! Amâo mâo ôh hlei pô čŏng lač kơ ñu pô thâo săng leh kluôm ênŭm. Wăt tơdah jing pô đĭ hriê kơ prŏng leh hlăm Khua Yang amâodah jing pô kiă kriê klei hdĭp myang snăn ăt čiăng nanao mơh jing “anak sĭt hlăm klei đăo” mơ̆ng hlei pô đĭ hriê kơ prŏng hĭn. Grăp čô drei brei mâo sa čô anak hlăm klei đăo čiăng mđĭ ai leh anăn kriê dlăng hlăm klei hdĭp myang.
Tal dua, Khua ƀĭng kna Y-Pôl mđing uêñ, đru kơ anak ñu pô hlăm klei đăo hŏng klei mơĭt hră (êlan 2). Wăt tơdah kbưi kơ lăn ala, ƀiădah bruă mđĭ ai leh anăn bi đru hlăm klei đăo plah wah Khua ƀĭng kna Y-Pôl leh anăn pô jing “anak sĭt hlăm klei đăo” ăt amâo mâo bi kpăk ôh. Hŏng klei mơĭt hră, ñu mđĭ ai, mñă kơ Y-Timôthê ya klei čiăng êdi. Hruê anei drei mâo lu kdrăp mnơ̆ng hĭn, akâo kơ Khua Yang brei drei thâo yua čiăng bi đru hdơ̆ng pô hlăm klei đăo.
Tal tlâo, Khua ƀĭng kna Y-Pôl čang hmăng kơ anak ñu hlăm klei đăo knang kơ klei pap Khua Yang. Khua pô mtô mda asei Y-Timôthê mâo ama hlăm klei hdĭp myang jao kơ ñu brei lŏ dôk ti Êphêsô hlăm boh klei adôk mâo lu phung dôk mtô soh hlăm Phung Sang Aê Diê (êlan 3). Ti krah boh klei dleh dlan lông dlăng anăn, klei Khua ƀĭng kna Y-Pôl čang hmăng kơ Y-Timôthê amâo djŏ jing klei thâo mbruă, klei thâo mdrơ̆ng hŏng klei dleh dlan mâo ôh, ƀiădah jing “klei jăk, klei pap, leh anăn klei êđăp ênang” mơ̆ng Aê Diê (êlan 2). Lu mnuih hlăm phung drei knang kơ klei jăk, klei pap Khua Yang brei hlăk mrâo đăo kơ Khua Yang, ƀiădah êdei anăn, drei hdĭp klei hdĭp phung đăo kơ Krist leh anăn mă bruă hŏng klei thâo săng leh anăn ai ktang hjăn pô. Khua ƀĭng kna Y-Pôl brei thâo klei jăk, klei pap ăt jing klei ktang kơ Y-Timôthê dưi găn klei lông dlăng hlăm klei hdĭp leh anăn klei mă bruă. Leh anăn klei êđăp ênang jing mnơ̆ng jăk mơak hĭn Aê Diê brei kơ drei, wăt tơdah hlei pô drei jing leh anăn ya klei drei dôk tuôm.
Hlei pô jing ama klei hdĭp myang kơ drei leh anăn hlei pô jing anak klei hdĭp myang drei? Si drei bi đru rŭ klei đăo hdơ̆ng pô?
Wah lač: Ơ Khua Yang, akâo kơ Ih đru kâo luă gŭ čiăng lŏ dơ̆ng mâo klei ktrâo lač mơ̆ng phung hriê kơ prŏng hlăm mngăt. Akâo kơ Ih đru kâo ăt mđing uêñ, kriê dlăng phung anak hlăm mngăt Aê Diê ruah leh kơ kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 30
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
