Pajlug 30:5-6
Nqe cim:
“Vajtswv yeej ceev tej lus uas nws tau cog tseg; nws zoo ib yam li daim hlau thaiv hniav ntaj rau txhua tus uas nrhiav txojkev pab.” (Pajlug 30:5)
Lus nug rau sawvdaws xav:
– Ankus hais txog qhov tseemceeb twg ntawm Vajtswv Txojlus?
– Ankus ceebtoom li cas txog qhov uas ntxiv Vajtswv Txojlus?
– Peb tau qhia li cas thaum thov Vajtswv pab rau lub tebchaws?
Pajlug 30:5 yog ib nqe lus teb rau tsib lo lus nug hauv nqe 4: Tibneeg yuav tsis paub Vajtswv yog hais tias tus Tswv tsis qhia tshwm hauv Nws Txojlus.
Ankus hais tias “tej lus”, txhais tau hais tias Vajtswv tej lus “zoo li daim hlau thaiv hniav ntaj”, uas tau muab lim tawm hauv hluavtaws los ua cov tseem hlau. Vim yog Vajtswv tej lus lim tawm tshwjxeeb li no, Nws Txojlus ntseeg siab tau; rau qhov yog Nws qhia tshwm qhov tseeb ntawm Nws (Phau Ntawv Nkauj 12:6). Vajtswv Txojlus muaj nqis heev tsis yog vim tej ntsiab lus qhia zoo xwb, lossis vim ntawd yog qhov tseeb, tiamsis yog vim tus uas hais tej lus ntawd yog kiag Vajtswv ntag. Ua lwm seem lus hais, lub homphiaj tseemceeb ntawm Vaj Ntsujplig yog siv Vajtswv Txojlus coj peb mus cuag Vajtswv Leejtub, Tus uas pub rau peb tau txais Vajtswv txojkev cawm dim. Phau Vajluskub, txawm yog txawj ntse thiab zoo kawg nkaus, los kuj cawm tsis tau peb. Vajtswv Txojlus coj peb mus cuag Yexus Khetos, tus cawmseej. Vim li ntawd, cais tsis tau Vajtswv Txojlus qhia tshwm tawm ntawm Txojlus uas los yug ua neeg (Yauhas 1:1, 14). Dua li ntawd, “tus uas nrhiav” tus Tswv yog tus uas nyiam, mloog thiab ua raws li Vajtswv Txojlus, yuav tau kev tivthaiv, tawmtsam txhua yam kev teebmeem thiab sim siab ntawm tej yeebncuab (Phau Ntawv Nkauj 119:11).
Vim Vajtswv Txojlus twb tau “tshuaj saib mas pom tias muaj tseeb tiag” zoo kawg nkaus thiab txaus lawm, yog li Ankus thiaj txwv “tsis txhob ntxiv ib los rau tus Tswv tej lus” (nqe 6). Ankus xav txog Vajtswv tej lus uas cov cev Vajtswv lus qhia thiab Vajtswv Txojlus uas tau sau ua ntaub ntawv tseg los txog tiam uas nws nyob. Yog li ntawd, thiaj muaj ib lo lus ceebtoom zoo li ntawd thaum xaus phau Vajluskub tias tsis txhob ntxiv Vajtswv Txojlus (Tshwmsim 22:18-19). Vajtswv yuav “cem” tus neeg uas hloov Nws Txojlus, thiab cov neeg uas ntxiv Vajtswv tej lus raws li lawv lub siab nyiam yog cov neeg dag.
Vajtswv Txojlus qhia rau peb paub txhua yam uas cheemtsum txog tus Tswv uas dawbhuv thiab kev ua neej raws li Nws lub siab nyiam (II Kevcai 29:29). Vajtswv Txojlus tseem ua qhov kaj coj peb mus cuag tau Vajtswv, tau kev cawm dim thiab pab tau peb ua neej nrog tus Tswv mus mloog lus (II Timautes 3:16-17). Ib lub tebchaws, ib Pawg Ntseeg, ib tsevneeg yuav tau koob hmoov tiag yog thaum cov thawjcoj saib Vajtswv Txojlus tseemceeb, muab Txojlus ntawd los tswj thiab kav lub tebchaws, Pawg Ntseeg, thiab tsevneeg raws li Vajtswv Txojlus qhia. Peb cheemtsum thov Vajtswv pab kom cov thawjcoj tswj teb kav chaw, cov xibhwb mloog Vajtswv Txojlus.
Thov Vajtswv,
Tus Tswv, thov Koj qhia kom nyuam yaus muaj kev hlub thiab niaj hnub thov Vajtswv pab rau cov thawjcoj uas Koj tsa, kom lawv zeem paub tias lawv yog tej cuabyeej uas Koj siv los ua tes haujlwm Koj txib, lawv paub mloog Koj lus. Nyuam yaus tuav Tswv Yexus lub npe thov. Amees.
Peb puas zeem paub qhov tseemceeb thaum uas cov thawjcoj paub Vajtswv Txojlus?
Nyeem Vajluskub hauv peb lub xyoo: Kaulauxais 4
Kênh Youtube BHKTHN:
