Klei Aê Diê Blŭ: Klei Bi Hriêng 30:5-6
Êlan kliăng: “Jih klei Aê Diê blŭ mâo klei sĭt leh, Aê Diê jing khil kơ hlei pô kđap hlăm Ñu.” (Klei Bi Hriêng 30:5)
Klei êmuh ksiêm mĭn: Y-Agur bi êdah ya mta kơ Klei Aê Diê Blŭ? Ya klei ñu mtă brei răng kơ klei lŏ thiăm kơ Klei Aê Diê Blŭ? Ya klei bi hriăm drei mâo tơdah wah lač brei kơ ala čar?
Klei Bi Hriêng 30:5 jing klei lŏ wĭt lač kơ klei êmuh lông dlăng hlăm êlan 4: Mnuih amâo dưi thâo kral Aê Diê sĭt ôh tơdah Aê Diê amâo bi êdah ôh Ñu pô hlăm Klei Ñu Blŭ. Y‑Agur lač “jih klei”, čiăng lač grăp Klei Blŭ Aê Diê, mâo klei bi doh leh sơăi, bi hmô hŏng klei bi doh msei hlăm pui êdai. Kyuadah grăp Klei Aê Diê Blŭ mâo klei bi doh msĕ snăn, kyuanăn Klei Aê Diê Blŭ jing sĭt hlăm klei Aê Diê bi êdah kơ Ñu pô leh anăn kơ klei sĭt nik Ñu (Klei Mmuñ Hđăp 12:6). Klei Aê Diê Blŭ jing yuôm bhăn amâo djŏ knŏng kyua klei mtô mơ̆ng Klei Blŭ anăn, amâodah kyua klei anăn jing klei sĭt nik ôh, ƀiădah wăt kyua Pô blŭ leh Klei Blŭ anăn jing Aê Diê pô. Amâodah lač snei, klei Yang Mngăt Jăk kñăm čiăng prŏng hĭn jing yua Klei Aê Diê Blŭ čiăng atăt ba drei kơ Anak Aê Diê, Pô brei kơ drei klei Aê Diê bi mtlaih. Wăt tơdah hdruôm hră Klei Aê Diê Blŭ thâo mĭn leh anăn yuôm bhăn dưn, ăt kăn dưi bi mtlaih drei rei. Hdruôm hră Klei Aê Diê Blŭ bi wir drei kơ Yang Krist, Pô Bi Mtlaih. Kyuanăn, amâo dưi bi ktlah ôh Klei Aê Diê Blŭ Bi Êdah mơ̆ng Klei Blŭ Jing Kđeh amâodah Klei Blŭ (Y-Yôhan 1:1,14). Êgao hĭn kơnăn, “pô kđap” hlăm Aê Diê jing pô khăp, gưt leh anăn hdĭp tui si klei Ñu Blŭ, gơ̆ srăng mâo klei Aê Diê răng mgang lŏ bi kdơ̆ng wĭt hŏng klei pô roh bi kdơ̆ng leh anăn mplư (Klei Mmuñ Hđăp 119:11).
Kyuadah Klei Aê Diê Blŭ mâo klei bi doh leh jing jăk klă leh anăn klă ênŭm, kyuanăn Y‑Agur mâo klei ghă ktang tĭt “đăm lŏ thiăm ôh kơ klei Ñu blŭ” (êlan 6). Ñu mĭn kơ jih jang klei hưn êlâo leh anăn Klei Aê Diê Blŭ arăng čih leh hlŏng truh kơ ênuk ñu. Ƀiădah, mâo sa klei mtă brei răng msĕ snăn mơh ti knhal tuč kluôm hdruôm hră Klei Aê Diê Blŭ jing đăm lŏ thiăm sa mta klei kơ Klei Aê Diê Blŭ ôh (Klei Bi Êdah 22:18-19). Aê Diê srăng “ƀuah” hlei pô bi mlih Klei Ñu Blŭ, leh anăn hlei pô lŏ thiăm jih jang klei mnuih mĭn kơ Klei Aê Diê Blŭ pô anăn jing pô luar.
Hdruôm hră Klei Aê Diê Blŭ brei drei thâo jih jang klei drei čiăng thâo kơ Pô Myang leh anăn êlan drei srăng hdĭp tui si klei Ñu čiăng (Klei Mtô Mñă Klei Bhiăn 29:29). Hdruôm hră Klei Aê Diê Blŭ brei kơ drei klei mngač msĕ mơh, čiăng atăt ba drei kơ Khua Yang hlăm klei bi mguôp klei bi mtlaih leh anăn êbat hŏng Khua Yang hŏng klei gưt asăp hŏng klei mơak leh anăn mâo boh tŭ dưn (II Y-Timôthê 3:16-17). Sa boh ala čar, sa Phung Sang Aê Diê, sa boh gŏ sang srăng mâo klei jăk jĭn sĭt tơdah phung gĭt gai mpŭ kơ Klei Aê Diê Blŭ, kiă kriê leh anăn atăt gai lăn čar, Phung Sang Aê Diê, gŏ sang tui si klei mtă mơ̆ng Klei Aê Diê Blŭ. Brei drei hŏng jih ai tiê wah lač brei kơ jih jang phung khua gĭt gai ala čar, kơ phung khua pô mtô čiăng kơ digơ̆ thâo kral sĭt Klei Aê Diê Blŭ leh anăn ngă bruă gĭt gai hlăm klei gưt kơ Klei Ñu Blŭ.
Si ngă drei thâo săng mơ̆ kơ klei yuôm kơ klei phung khua gĭt gai thâo kral Klei Aê Diê Blŭ?
Wah lač: Ơ Khua Yang, đru kâo khăp hŏng jih ai tiê leh anăn wah lač brei kơ phung khua gĭt gai Ih mjing leh čiăng kơ digơ̆ thâo sĭt kơ digơ̆ jing knŏng mnơ̆ng yua dôk hlăm kngan Ih, leh anăn ngă bruă gĭt gai Ih jao leh hŏng klei gưt asăp kơ Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Kôlôs 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
