II Xwmtxheej Vajntxwv 24:15-22
Nqe cim:
“Tus neeg uas ua tib zoo mloog thaum luag qhuab ntuas yuav tau txojsia, tiamsis tus neeg uas tsis lees yuav luag tej lus ntuas yuav raug kev puastsuaj” (Pajlug 10:17).
Lus nug rau sawvdaws xav:
- Vajntxwv Yau-as tau ua txhaum yam dabtsi?
- Tim dabtsi vajntxwv Yau-as thiaj ua tej kev txhaum li ntawd?
- Tsimnyog peb ua li cas thaum Vajtswv lossis tibneeg ntuas peb?
Vajntxwv Yau-as lub neej pib ntawm ib tug neeg “ua raws Vajtswv siab nyiam” (II Xwmtxheej Vajntxwv 24:2) ntxee ua tus neeg tsis mloog Vajtswv lus, tig mus rau tibneeg thiab dhau mus ua neeg pe mlom (nqe 15-18). Yog tim dabtsi? Tej zaum tim ntau lub vimchiv.
Tej zaum vajntxwv Yau-as ua zoo yog tim muaj tus pov thawj Yehauyadas ua tus qauv zoo. Lossis hais dua lwm seem, Yau-as txoj kev ntseeg tsuas yog txawb rau ntawm Yehauyadas xwb tsis yog txawb rau ntawm Vajtswv. Thaum tsis muaj tus ua chaw ruaj rau vajntxwv cog kev ntseeg lawm, nws thiaj mus ua txhaum. Peb txoj kev ntseeg cog rau qhov twg? Tej zaum peb nquag ua Vajtswv haujlwm tom Tuamtsev, tiamsis tus kheej tsis nco nrhiav kev sib txuas nrog Vajtswv.
Tej zaum vajntxwv kev mloog Vajtswv lus tsuas yog ua kom tas cai xwb tsis yog muaj tawm hauv lub siab tuaj. Lossis hais dua lwm seem, tej haujlwm zoo uas vajntxwv ua yog tsuas ua raws li kev xav xwb tsis yog tas siab ua tiag tiag. Kev xav tej zaum coj tau mus rau kev mloog lus, tiamsis yuav tsum yog lub siab txawj mloog lus thiab thiaj yuav muaj kev paub fwm Vajtswv. Tus Tswv tej lus thiab kev ua raws li Vajtswv siab nyiam yuav tsum yog nyob hauv thiab ua hauv lub siab tuaj (Ntawv Nkauj 119:9-11), tsis li ntawd ces peb yeej tsis muaj tus yamntxwv zoo thooj Yexus Khetos ib zaug li.
Tej zaum yog vajntxwv Yau-as xav khiav tawm ntawm tus pov thawj Yehauyadas tus duab ntxoov ntxoo tig mus ua lub neej qhia tshwm txog nws. Tej no yog lub vimchiv rau Yau-as muab Xakhaliyas tua, tsis nco txog Yehauyadas txiajntsig. Thaum peb nrhiav kev ua rau luag paub txog tus kheej yog lub sijhawm peb poob mus rau kev khav txiv thiab qhov ntawd yuav ua rau peb dig muag sab ntsujplig.
Tej zaum yog vajntxwv Yau-as tsis nco Vajtswv thiab lwm tus tej txiajntsig. Vajntxwv tsis nco hais tias nws muaj sia nyob yog Vajtswv ua tus pub, thiab tsis nco txog tej neeg uas tau muab txojsia los tiv thaiv thiab cob qhia vajntxwv dhau los.
Vajtswv txojkev hlub tseem muaj pub rau Yau-as, Nws txib tej cev lus los ntuas Yau-as, tiamsis vajntxwv tsis yuav cov cev lus tej lus ntuas (nqe 19). Tsis tas li ntawd xwb, vajntxwv tseem nrog sawvdaws muab pobzeb ntaus Xakhaliyas uas yog tus pov thawj Yehauyadas tus tub tuag kiag lawm thiab (nqe 20-21). Vajntxwv Yau-as tau ua kev txhaum loj heev, qhia tshwm nws yog tus neeg muaj lub siab phem uas tsis nco luag txiajntsig (Mathais 23:35). Cov neeg tsis paub nco luag txiajntsig yuav ua rau nws ruam, khav txiv, tsis xav mloog Vajtswv Txojlus thiab tsis ua raws Vajtswv tej lus ntuas.
Thov Vajtswv,
Tus Tswv, thov Koj pab tswj nyuam yaus lub siab kom paub ua neej txo fwjchim mloog Koj tej lus ntuas, thiab zeem paub yam uas Koj pub, kom nyuam yaus ua lub neej nco ntsoov koj txiajntsig. Amees.
Peb puas paub txo fwjchim mloog Vajtswv tej lus ntuas lawm tau?
Nyeem Vajluskub hauv peb lub xyoo: Yaxayas 65:8-66:4
Kênh Youtube BHKTHN:
