Klei Aê Diê Blŭ: II Klei Yăl Dliê 24:15-22
Êlan kliăng: “Hlei pô tŭ klei bi hriăm dôk hlăm êlan nao kơ klei hdĭp, ƀiădah hlei pô hngah klei mkra srăng klah đuĕ.” (Klei Bi Hriêng 10:17)
Klei êmuh ksiêm mĭn: Ya klei soh prŏng mtao Y‑Jôas ngă leh? Ya mta phŭn knhal tlă anăp atăt mtao Y‑Jôas truh kơ klei ngă soh anei? Si knhuah drei dôk mâo hŏng klei Khua Yang leh anăn pô mkăn ngă leh kơ drei?
Klei hdĭp mtao Y‑Jôas dơ̆ng mơ̆ng sa čô “ngă klei djŏ ti anăp Yêhôwa” (II Klei Yăl Dliê 24:2) jing hĕ sa čô mnuih lui wir Klei Aê Diê Blŭ, wir phă mnuih leh anăn kkuh kơ rup yang mơ̆ng hlăk khua ngă yang Y‑Jêhôida djiê (êlan 15-18). Ya ngă? Năng ai mâo lu mta phŭn knhal.
Năng ai jih klei jăk mtao Y‑Jôas ngă êlâo anăn kyua tưp jăk mơ̆ng khua ngă yang Y‑Jêhôida. Blŭ mdê, klei đăo mtao Y‑Jôas dưm ti dlông Y‑Jêhôida msĕ si “anôk dưh knang klei đăo” amâo djŏ ôh dưm ti dlông Yêhôwa Aê Diê Pô. Hlăk amâo lŏ mâo ôh anôk dưh knang snăn mtao lĕ buh mtam. Ti anôk drei dôk dưm klei đăo drei? Lu blư̆ drei uêñ đei leh anăn hur har kơ mta bruă anei bruă dih hlăm Sang Aê Diê ƀiădah wơr bĭt hĕ mta yuôm bhăn hĭn jing klei bi mguôp hjăn păn pô hŏng Khua Yang.
Năng ai klei mtao Y‑Jôas gưt asăp jing klei gưt asăp hŏng klei mĭn hĭn kơ gưt asăp mơ̆ng ai tiê. Blŭ mdê, jih bruă jăk mtao Y‑Jôas ngă knŏng jing klei wĭt ngă mơ̆ng klei mĭn amâo djŏ mơ̆ng ai tiê ôh. Klei sĭt nik hlăm klei mĭn dưi atăt kơ klei gưt asăp, ƀiădah knŏng tơdah klei sĭt nik dôk hlăm ai tiê leh anăn klei gưt asăp jing klei gưt asăp mơ̆ng ai tiê, hlăk anăn kơh čăt đĭ ai tiê huĭ mpŭ kơ Aê Diê sĭt. Klei Blŭ mơ̆ng Aê Diê leh anăn klei Ñu čiăng brei drei mă tŭ hlăm ai tiê (Klei Mmuñ Hđăp 119:9-11), tơdah amâo snăn, drei amâo dưi bi mđĭ knuih klă kluôm phung đăo kơ Krist ôh.
Năng ai kyua mtao Y‑Jôas čiăng tlaih mơ̆ng “êyui” prŏng đei khua ngă yang Y‑Jêhôida čiăng hưn mdah ênoh yuôm klei ñu pô jing. Anăn yơh jing phŭn knhal klei mtao Y‑Jôas amâo hdơr knga ôh hlăk ñu bi mdjiê Y‑Sakari. Bruă tui duah ênoh yuôm kơ hjăn pô srăng ngă kơ pô anăn jing mgao, leh anăn tơdah jing mgao snăn pô anăn srăng jing bum ală mngăt myang.
Năng ai kyuadah mtao Y‑Jôas wơr bĭt klei pap Aê Diê leh anăn phung mkăn. Mtao wơr bĭt hĕ klei hdĭp ñu mâo mơ̆ng Aê Diê brei leh anăn wăt mâo leh dŭm klei hdĭp amâo lŏ tĭng yap ôh klei huĭ hyưt, hmiêt mkăp săn asei mlei čiăng răng mgang, khăp hơiêng leh anăn mtô bi hriăm mtao.
Klei jăk Aê Diê ăt bi êdah hŏng bruă yua phung khua pô hưn êlâo truh čiăng bi mhuĭ mtao Y‑Jôas, ƀiădah mtao hngah amâo čiăng mđing hmư̆ ôh (êlan 19), wăt lŏ bi mdjiê Y‑Sakari, anak khua ngă yang Y‑Jêhôida hĭn êjai (êlan 20-21). Anei jing sa klei soh jhat ƀai prŏng snăk kyua bi êdah klei ai tiê khăng, klei jhat ƀai mơ̆ng sa klei hdĭp amâo thâo hdơr knga (Y‑Mathiơ 23:35). Ai tiê amâo thâo hdơr knga ngă kơ mnuih jing mluk mgu, mgao, amâo lŏ hmư̆ ôh asăp Khua Yang leh anăn gưt hlue.
Si ngă drei luă gŭ mđing hmư̆ klei ƀuah mơ̆ng Aê Diê leh anăn Klei Ñu Blŭ mơ̆?
Wah lač: Ơ Khua Yang, akâo Ih kiă kriê ai tiê kâo hlăm klei luă gŭ, thâo mđing hmư̆ asăp Khua Yang, leh anăn thâo kral nanao klei jăk jĭn Aê Diê brei kơ kâo čiăng hdĭp thâo hdơr knga kơ Ih.
Dlăng Klei Aê Diê Blŭ hlăm tlâo thŭn: Y‑Êsai 65:8–66:4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
