Yelemis 37:11-16
Nqe cim:
“Cov kwvtij, nej yuav tsum ua siab ntev ib yam li cov cev Vajtswv lus uas tus Tswv tau txib los qhia sawvdaws. Txawm yog lawv raug kev tsimtxom heev npaum li cas los lawv tseem ua siab ntev nyiaj tej kev tsimtxom ntawd.” (Yakaunpaus 5:10).
Lus nug rau sawvdaws xav:
- Yelemis ntsib xwmtxheej li cas thaum nws los hauv nws lub zos?
- Iliyas ua li cas rau tus cev lus Yelemis? Vim li cas?
- Cov nomtswv ua dab tsi ntxiv rau Yelemis?
- Vim dab tsi Yelemis thiaj tiv qees kev tsimtxom?
- Yelemis ua qauv rau peb txog yam dab tsi?
Cov tubrog Loos ntshai Iziv cov tubrog, lawv thim rov tsis vij lub nroog Yeluxalees lawm, Yelemis thiaj tau kev tawm hauv Yeluxalees rov mus hauv nws lub zos uas nyob hauv xeem Npeeyamees cheebtsam av saws nws tsev neeg feem av uas yuav ntawm Hanamees los (Yelemis 32:8). Thaum nyuam qhuav los txog ntawm roojvag nroog, Yelemis ntsib tus saib lub nroog uas yog Iliyas tabtom ua haujlwm ncig saib lub nroog, liam txim hais tias, Yelemis mus nrog cov tubrog Npanpiloos lawm, nws ntes Yelemis cab mus cuag cov nomtswv, tsis mloog Yelemis hais daws nws zaj li. Cov nomtswv tau muab Yelemis tsimtxom, nplawm thiab cab mus kaw rau hauv tus teev ntawv Yaunathas lub tsev txheej hauv av (nqe 15-16).
Qhov uas Iliyas rau txim rau Yelemis yog nws ua raws li nws xav xwb, vim nws ntxub Yelemis ntawm qhov uas Yelemis kom haiv neeg Yudas cia li yeem swb cov tubrog Npanpiloos (Yelemis 21:9), thiaj xav hais tias Yelemis tab tom khiav mus thawj cov tubrog Npanpiloos lawm. Thiab tseem xav hais tias, tej lus uas Xibfwb Yelemis hais tawm yuav ua rau cov Yudais qaug zog. Yog li ntawd, ib txhia neeg Yudais uas xav pab nws haiv neeg thiab pab Vajtswv lub nroog Yeluxalees thiaj suav hais tias tus cev lus Yelemis yog lawv tus yeebncuab, vim Yelemis cev lus tawm tsam yam uas lawv ntshaw. Tiamsis cov ua thawjcoj hauv lub tebchaws ntawd tsis paub hais tias, twb yog vim lawv tej kev txhaum uas tsis mloog Vajtswv lus ntag thiaj ua rau Vajtswv cov tub txib raug kev txomnyem li ntawd.
Tus cev Vajtswv lus Yelemis muaj lub siab tawv hais tus Tswv tej lus rau sawvdaws thiab hais meej txog nws yog tus tsis tau ua txhaum (nqe 14), lossis nws npaj nroog tiv kev tsimtxom qhia txog tus Tswv txojkev tseeb. Yelemis lub neej yog ib tug qauv zoo rau sawvdaws xyaum raws. Niaj hnub nimno yuav qhia txog qhov tseeb tsis yog yuav yoojyim hauv txhua lub sijhawm. Keebkwm ntawm pawg ntseeg txhua tiam, yeej muaj ntau tus npaj nroos tiv kev tsimtxom vim tus Tswv lub npe los lawm. Thov tus Tswv pab kom peb kam tuaj Vajtswv tog, qhia qhov tseeb txhua lub sijhawm, txawm yuav zoo li cas los xij.
Thov Vajtswv,
Vajtswv tus uas muaj kev hlub! Xibfwb Yelemis uas yog Koj tus tub txib yog ib tug ua qauv zoo rau nyuam yaus xyaum txog tiv kev tsimtxom vim qhia qhov tseeb. Thov pab nyuam yaus sawv ruaj ntawm qhov tseeb txawm yuav ntsib tsimtxom los txhob thim. Amees.
Peb puas kam sawv nrog tus Tswv qhia tawm qhov tseeb lawm tau?
Nyeem Vajluskub hauv peb lub xyoo: Pajlug 28
Kênh Youtube BHKTHN:
