Klei Aê Diê Blŭ: Y‑Yêrêmi 37:11-16
Êlan kliăng: “Ơ phung ayŏng amai adei, ksiêm bĕ phung khua pô hưn êlâo blŭ leh hlăm anăn Khua Yang, si diñu tŭ klei knap mñai leh anăn diñu gĭr jing klei bi hmô kơ diih.” (Y‑Yakơ 5:10)
Klei êmuh ksiêm mĭn: Ya klei truh kơ Khua pô hưn êlâo Yêrêmi leh ñu wĭt kơ ƀuôn sang? Ya klei kahan gak Y‑Irijah lač Khua pô hưn êlâo Y‑Yêrêmi ngă soh? Ya ngă? Si phung khua ngă? Ya klei ngă kơ Khua pô hưn êlâo Y‑Yêrêmi tŭ kơ klei dleh dlan? Ya klei bi hmô ñu bi hriăm drei kơ klei dleh dlan?
Kyua huĭ êpul kahan Pharaôn, kyua anăn êpul kahan Kaldê pŏk mlar kwang dar êngao kơ ƀuôn prŏng Yêrusalem, ƀri klei găl anăn Khua pô hưn êlâo Y‑Yêrêmi wĭt kơ ƀuôn sang jing krĭng Benjamin čiăng mă kdrêč ngăn drăp pô, anei năng ai jing kdrêč lăn Khua pô hưn êlâo Y‑Yêrêmi blei ti Anathôt hlue si Klei Yêhôwa mtă (Y‑Yêrêmi 32:8). Khădah snăn, leh mrâo truh ti ƀăng jang ƀuôn prŏng Benjamin, Khua pô hưn êlâo Y‑Yêrêmi lŏ bi tuôm hŏng kahan gak Y‑Irijah dôk hiu dlăng tinei. Y‑Irijah lač Y‑Yêrêmi tui đuĕ mbĭt hŏng phung Kaldê, anăn mă leh ñu leh anăn ba kơ phung khua, amâo uêñ kơ klei Khua pô hưn êlâo Y‑Yêrêmi bi kdơ̆ng. Phung Khua ngêñ snăk kơ Khua pô hưn êlâo Y‑Yêrêmi, diñu čăm gơ̆ leh anăn ba krư̆ gơ̆ hlăm sang khua čih hră Y‑Jônathan (êlan 15‑16)
Y‑Irijah čhal leh anăn mă Khua pô hưn êlâo Y‑Yêrêmi mơ̆ng klei ñu bi mĭn: Leh Khua pô hưn êlâo Y‑Yêrêmi lač hŏng djuê ana ñu Yêhôwa mtă kơ diñu brei tŭ klei amâo dưi ti anăp phung Ƀaƀilôn (Y‑Yêrêmi 21:9), snăn ăt hlăk êjai êpul kahan Kaldê kbiă mơ̆ng ƀuôn prŏng Yêrusalem, hlăk anăn amâo lŏ ƀuh ôh Y‑Yêrêmi, kyua diñu bi mĭn ñu dôk hlăm hdră tŭ klei amâo dưi hŏng phung roh čiăng nao kơ Ƀaƀilôn duah klei êđăp ênang kơ ñu pô. Thiăm hlăm anăn, diñu huĭ kơ klei gơ̆ lač srăng hmaĭ kơ ai tiê phung kahan Yuđa ngă kơ diñu êdu ai. Kyua anăn, phung čŏng lač pô dôk ngă bruă kyua mnuih ƀuôn sang, kyua ƀuôn prŏng Yêhôwa srăng dôk bi kdơ̆ng truh knhal tuč, dlăng leh kơ Khua pô hưn êlâo Y‑Yêrêmi msĕ si mnuih roh, kyua ñu amâo djŏ knŏng hưn êlâo mklăk hŏng klei diñu čang hmăng ôh ƀiădah ară anei lŏ mâo bruă ngă năng đing leh đuĕ mơ̆ng Yêrusalem. Ƀiădah phung khua gĭt gai lăn čar amâo thâo ôh kyua ai tiê khăng, amâo gưt asăp Yêhôwa ngă leh klei rŭng răng kơ phung dĭng buăl Aê Diê sĭt suôr.
Khua pô hưn êlâo Y‑Yêrêmi ktang hiu hưn klei Yêhôwa mtă, leh anăn ktang mgang klei hdĭp pô doh jăk (êlan 14), ăt msĕ mơh ñu srăng klam klei dleh dlan čiăng hiu hưn klei sĭt nik Aê Diê. Anei klă sĭt jing klei bi hmô kơ sa čô mnuih mă bruă Aê Diê năng kơ grăp čô drei tui hlue. Hruê anei čiăng hiu hưn klei sĭt nik, amâo djŏ ôh grăp mnĭt mông ăt ênưih sơăi. Hƀuê ênuk Sang Aê Diê brei ƀuh mâo leh lu mnuih srăng klam klei dleh dlan kơ Anăn Aê Diê. Akâo kơ Khua Yang brei drei jhŏng dôk tĭng kơ Aê Diê čiăng lač nanao klei sĭt nik wăt tơdah mông găl amâodah amâo găl.
Drei jhŏng dôk tĭng kơ Aê Diê čiăng lač klei sĭt nik mơ̆?
Wah lač: Ơ Aê Diê Pô bŏ hŏng klei khăp! Klei bi hmô mơ̆ng Khua pô hưn êlâo Y‑Yêrêmi, dĭng buăl sĭt suôr Aê Diê klă sĭt mđĭ ai kâo tui hlue. Akâo Ih đru kâo dôk tĭng klei sĭt nik, jhŏng lač klei sĭt nik wăt tơdah tlă anăp hŏng klei dleh dlan, bi kdơ̆ng.
Dlăng Klei Aê Diê Blŭ hlăm tlâo thŭn: Klei Bi Hriêng 28:1‑28
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
