I Petus 3:1-2
1 Ib yam nkaus li ntawd, nej cov uas yog pojniam, nej yuav tsum mloog nej cov txiv lus, txawm yog nej cov txiv muaj qee leej tsis ntseeg Vajtswv Txojlus los thaum lawv pom nej coj nej lub neej zoo, lawv yuav los ntseeg tsis tas nej yuav hais ib los li, 2rau qhov lawv yeej yuav pom qhov uas nej coj nej lub neej zoo thiab hwm lawv.
Lus nug rau sawvdaws xav:
– Timthawj Petus muab txojcai tseemceeb twg rau tus pojniam ntseeg Yexus?
– Txojcai no yoojyim lossis khwv ua? Vim licas?
– Yog ib tug pojniam ntseeg Yexus, peb tabtom ua raws txojcai no licas?
Vajtswv yog tus tsim txhua yam, tsis hais kev sib yuav, puav leej mus raws li ib txojcai teeb tseg. Vim li ntawd, Vajluskub Tshiab thiaj pheej hais txog cov neeg nyob hauv lub cuabyig lub luag haujlwm thiab lawv qhov chaw sawv.
Thaum hais txog tus pojniam, Timthawj Petus qhia hais tias: “Ib yam nkaus li ntawd, nej cov uas yog pojniam, nej yuav tsum mloog nej cov txiv lus” (nqe 1). Lo lus “mloog” hauvpaus lus yog “hwm, tso yus nyob hauv lwm tus qab tswjhwm”. Vim licas tus pojniam yuav tsum mloog lossis hwm tus txiv? Vim kuj zoo ib yam li kev ua neej hauv ib pab pawg neeg, lub cuabyig kuj tau tus Tswv tsim muaj ib txojcai, yog saib tsis taus txojcai no yuav ua rau lub cuabyig ntsib teebmeem. Ib zaj pivtxwv tshwjxeeb yog nyob hauv Ixaj thiab Lenpekas lub cuabyig, yog lub cuabyig uas muaj ntau kev ntxhov siab, ob kwvtij ua yeebncuab vim Lenpekas tswj lub cuabyig mus raws tus kheej lub siab nyiam.
Muaj ib lo lus nug hais tias puas yog tus pojniam tsuas hwm tus txiv uas tsimnyog hwm thiab ua qauv zoo xwb? Nyob hauv nqe 1 qhia ntxiv hais tias: “txawm yog nej cov txiv muaj qee leej tsis ntseeg Vajtswv Txojlus”. Qhov ntawd muaj lub ntsiab hais tias txawm yog tus txiv tsis ntseeg Vajtswv los kuj yuav tsum hwm huv tibsi! Qabhau ntawm kev hwm tus txiv yog dabtsi? Vajluskub qhia hais tias: “…txawm yog nej cov txiv muaj qee leej tsis ntseeg Vajtswv txojlus los thaum lawv pom nej coj nej lub neej zoo, lawv yuav los ntseeg tsis tas nej yuav hais ib los li, rau qhov lawv yeej yuav pom qhov uas nej coj nej lub neej zoo thiab hwm lawv” (nqe 1b-2). Hais tau hais tias, tus pojniam uas hwm tus txiv yuav hloov tau tus txiv lub neej. Txawm yog tus txiv tsis ntseeg los yuav muaj sijhawm los ntseeg dhau ntawm tus pojniam kev ua neej, lossis tus txiv uas twb ntseeg Yexus lawm tiamsis tseem muaj tus cwjpwm tsis zoo yuav muaj kev pauv hloov thaum pom tus pojniam kev ua neej. Yog li ntawd hwm tus txiv tsis yog lub neej ua tiag uv txhua yam tiamsis yog lub neej ruaj khov ntawm tus pojniam uas loj hlob sab ntsujplig.
Vim licas pojniam pheej nyuaj hauv kev hwm tus txiv? Vim coob tug pojniam, txawm yog cov ntseeg, los yeej tsis ua lub neej raws li Vajtswv Txojlus qhia, tiamsis ua lub neej raws li neeg ntiajteb tej kev xav. Thiab teebmeem loj dua yog qhov uas lawv xav yuamkev hais tias “hwm” tus txiv yog txo tus kheej qis, thiab xav hais tias tus muaj hwjchim loj hauv lub cuabig yog tus uas nrhiav tau nyiaj ntau dua, muaj zog dua, txawj coj dua,… Tiamsis peb yuav tsum feeb meej ob lo lus uas yog kev muaj nqis thiab lub luag haujlwm. Txhua tus tibneeg puav leej muaj nqis tib yam nkaus tabmeeg Vajtswv (Kalatias 3:28), tiamsis tus Tswv cia tus pojniam thiab tus txiv nyob hauv lub luag haujlwm sib txawv. Niamtxiv muaj nqis ib yam tiamsis lub luag haujlwm yeej sib txawv ntau heev.
Thov Vajtswv,
Tus Tswv, thov qhia thiab pab cov pojniam uas ntseeg Koj txawj qhia tshwm lub neej hwm Koj dhau ntawm kev hwm tus txiv kom ua tau tus qauv zoo thiab muaj qabhau rau lub cuabyig. Amees.
Yog ib tug pojniam, nej puas hwm tus txiv zoo li Vajtswv Txojlus qhia lawm tau?
Nyeem Vajluskub hauv peb lub xyoos: Mathais 7:13-8:27
Kênh Youtube BHKTHN:
