Klei Aê Diê Blŭ: I Y-Pêtrôs 3:1-2
Êlan kliăng: “Msĕ mơh, Ơ phung mô̆, brei diih đup gưt kơ ung diih, čiăng kơ wăt tơdah mâo đa đa ung amâo gưt ôh kơ klei blŭ, phung mô̆ dưi atăt diñu kơ klei đăo, amâo djŏ hŏng klei blŭ ôh, ƀiădah hŏng klei dôk dơ̆ng ƀơ̆ng huă, êjai diñu ƀuh klei diih dôk dơ̆ng ƀơ̆ng huă hŏng klei mpŭ kơ Aê Diê leh anăn klei doh jăk.” (I Y-Pêtrôs 3:1-2)
Klei êmuh ksiêm mĭn: Ya klei mtă yuôm khua ƀĭng kna Y-Pêtrôs brei kơ phung mô̆ đăo kơ Krist? Klei mtă anei ênưih ngă amâodah dleh ngă? Ya ngă? Jing sa čô mô̆ đăo kơ Krist, si drei dôk ngă tui si klei mtă anei?
Jih jang mnơ̆ng mơ̆ng Aê Diê hrih mjing, wăt klei jing ung mô̆, mâo pruê̆ êlan čuăn leh. Kyuanăn, Klei Bi Mguôp Mrâo khăng lač kơ anôk bruă mâo kơ grăp čô hlăm gŏ sang.
Lač kơ phung mô̆, khua ƀĭng kna Y-Pêtrôs mtô snei: “Ơ phung mô̆, brei diih đup gưt kơ ung diih” (êlan 1). “Đup gưt” tui si klei mblang phŭn čiăng lač “mdưm drei pô ti gŭ klei dưi pô mkăn”. Ya ngă brei mô̆ đup gưt kơ ung? Kyuadah msĕ si hlăm ƀuôn sang, gŏ sang ăt mâo sa pruê̆ êlan mơ̆ng Khua Yang mkŏ mjing mơh, klei amâo mpŭ pruê̆ êlan anei srăng atăt gŏ sang truh kơ klei huĭ hyưt. Sa klei bi hmô êdah klă jing gŏ sang Y-Isăk leh anăn H’Rêƀêka, sa gŏ sang mâo lu klei mčah rai, ayŏng adei bi roh kyuadah H’Rêƀêka gai gŏ sang tui si klei mĭn ñu pô čiăng.
Boh klei čiăng ksiêm tinei, si ngă djŏ mơ̆ phung mô̆ knŏng đup gưt kơ phung ung năng đup gưt, phung ung mâo klei bi hmô jăk? Klei mtô hlăm êlan 1 čuê lač snei: “čiăng kơ wăt tơdah mâo đa đa ung amâo gưt ôh kơ klei blŭ”. Klei anei čiăng lač brei đup gưt wăt kơ phung amâo mâo đăo mơh! Boh tŭ dưn mơ̆ng klei đup gưt anăn ya jing? “…wăt tơdah mâo đa đa ung amâo gưt ôh kơ klei blŭ, phung mô̆ dưi atăt diñu kơ klei đăo, amâo djŏ hŏng klei blŭ ôh, ƀiădah hŏng klei dôk dơ̆ng ƀơ̆ng huă, êjai diñu ƀuh klei diih dôk dơ̆ng ƀơ̆ng huă hŏng klei mpŭ kơ Aê Diê leh anăn klei doh jăk” (êlan 1b-2). Blŭ mdê, knhuah hdĭp phung mô̆ đup gưt kơ ung mâo klei dưi bi mlih phung ung. Wăt tơdah ung amâo mâo đăo ăt mâo myun dưi đăo kơ Khua Yang mơh kyua knhuah hdĭp mơ̆ng mô̆, amâodah đa phung ung đăo leh dưn mơh ƀiădah adôk mâo knuih jhat ăt srăng mâo klei bi mlih mơh tơdah ƀuh klei mô̆ dôk dơ̆ng ƀơ̆ng huă. Snăn klei đup gưt kơ ung amâo djŏ ôh jing sa knhuah hdĭp êdu ai, tŭ gĭr, ƀiădah jing sa knhuah hdĭp ktang kjăp mơ̆ng sa čô mô̆ mâo klei khue prŏng hlăm klei hdĭp myang.
Ya ngă phung mô̆ dleh đup gưt kơ ung? Kyuadah lu phung mô̆, wăt tơdah đăo leh dưn, ƀiădah amâo mâo hdĭp tui si Klei Aê Diê Blŭ mtô ôh, ƀiădah hdĭp hlue si klei mĭn lăn ala. Leh anăn huĭ hyưt hĭn mơh mâo đa klei mĭn čhuai tơdah lač klei “đup” kơ ung jing klei bi mtrŭn ênoh yuôm klei hdĭp pô, leh anăn pô mâo klei dưi hĭn hlăm gŏ sang jing pô duah prăk lu hĭn, jhŏng ktang hĭn, mâo klei thâo gĭt gai hĭn… ƀiădah brei drei thâo bi kah klă dua mta klei mĭn ênoh yuôm hŏng anôk bruă. Jih jang mnuih mâo ênoh yuôm sơăi ti anăp Aê Diê (Galati 3:28), ƀiădah Khua Yang mdưm anôk bruă mdê mdê kơ phung mô̆ leh anăn kơ phung ung. Ung mô̆ mâo klei mtăp mđơr sơăi kơ ênoh yuôm ƀiădah amâo mâo mtăp mđơr ôh kơ anôk bruă.
Jing sa čô mô̆, si ngă diih đup gưt kơ ung diih msĕ si Klei Aê Diê Blŭ mtô mơ̆?
Wah lač: Ơ Khua Yang, akâo Ih bi hriăm leh anăn đru phung mô̆ đăo kơ Krist bi êdah klei hdĭp đup gưt kơ Khua Yang hŏng klei thâo đup gưt kơ ung, čiăng ngă klei bi hmô jăk leh anăn ba klei jăk mơak kơ gŏ sang.
Dlăng Klei Aê Diê Blŭ hlăm tlâo thŭn: Y-Mathiơ 7:13-8:27
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
