II Hơ’mon 32:1-3
Kơkuh kơ lu bơngai mă mơ̆ng
Năr âu lu bơ̆n gô tơchĕng pơwao ‘bai pơhrăm đei kơ̆l bai: Kơplah Bơngai Tơnăp Tơ’bơ̆p Tơdrong Hơnat Hơnot kiơ̆ kơ lăm Sơ̆p hla bơar Nơ̆r ‘Bok Kei-Dei II Hơ’mon 32:1-3.
1 Đơ̆ng rŏng kơ lu tơdrong noh tơdrong mă Hesekia pơm ‘lơ̆ng tơpăt noh, na Senacherip pơtao Asiri năm mơ̆t lăm char Juđa, wang lu pơlei tih kơjăp wă blah iŏk. 2 Wă Hesekia ‘bôh Senacherip năm wă kơ blah iŏk pơlei Jêrusalem, 3 na sư krao akŭm lu yŏng pơgơ̆r păng lu bơngai yŏng linh nuih kơtang wă bơ̆ tu đak tơ ‘nguaih kơ pơlei; đe noh tơgŭm sư mơ̆n.
Trong tơm ‘bai pơhrăm ‘nâu:
“Mă bơ̆n đei tơdrong gleh pơmat-tat bơ̆n kư̆m hiôk chơt, yua kơ tơdrong pơmat-tat noh wă hơmet tơdrong lui bơ̆n kơjăp khŏm khŏm. 4 Tơdah bơ̆n adrin tơpă tơdrong lui, lei tơdrong lui bơ̆n rai kơjăp. Tơdrong lui noh ăn kơ bơ̆n chang gô khŏm khŏm.” (Rôm 5:3-4)
Nơ̆r jet tơchĕng pơwao:
– Đơ̆ng rŏng kơ pơtao Hesekia keh đang lăm tơdrong jang na tơdrong kiơ truh?
– Yua kơ kiơ Kră Yang ăn tơdrong hơnat hơnot truh?
– Tơdrong pơlong lăng ba ăn tơdrong lơi yua kiơ kơ lu bơ̆n?
Kơkuh kơ đĭ đăng,
Đơ̆ng rŏng kơ pơtao Hesekia đei tơdrong pơm tơnăp đei chih lăm II Hơ’mon đơ̆ng chăl 29 truh tơ 31 na lăm sơnăm mă mơjĭt puăn pơtao Hesekia (II Pơtao 18:13), wă khan lăm sơnăm 701 AD (adrol kơ Kră Yang), pơtao Asiry anăn Sancherip chĕp ba lu linh năm blah rim kơ pơlei dêh Juđa na wă năm blah tơ pơlei Jêrusalem.
Tơdah ‘bơ̆t jơ pơtao Hesekia đei pơgơ̆r na lu sư đei gơ̆p năm blah lei phŏ pơm kơ jơhngơ̆m đei tơdrong ngĭl ngŭl tơpă. Kiơ̆ kơ lăm sơ̆p hla bơar Hơ’mon, pơtao Hesekia đĭ jơhngơ̆m pơm ming tơdrong kơkuh kơ Kră Yang ‘Bok Kei-Dei păng bơ̆jang kơ Kră Yang lăm Hnam Akŭm Kră Yang, păng chă Kră Yang hăm tơdrong pơm kiơ̆ kơ Khôi Juăt păng nơ̆r hơtă đơ̆ng Kră Yang ‘Bok Kei-Dei (II Hơ’mon 31:20-21) mă lei dêh Juđa đei ‘bơm lăm tơdrong hơnat hơnot. Mă khan lăm Sơ̆p hla bơar Pah So păng lăm Sơ̆p Hla bơar Hơ’mon đei pơma pran khan lăm tơdrong pơm kiơ̆ nơ̆r ‘Bok Kei-Dei gô đei tơdrong pŭn hiôk păng hiôk hơđơ̆ng, mă lei ưh kơ trŏ khan lu bơngai pơm kiơ̆ nơ̆r ‘Bok Kei-Dei ưh kơ đei la yơ đei tơ’bơ̆p tơdrong hơnat hơnot, tơdrong pơlong lăng ôh. ‘‘Bok Jop jơ̆ minh ‘nu bơngai “sư đei đon ‘lơ̆ng tơpăt, băt hli yom kơ Kră Yang ‘Bok Kei-Dei păng weh ataih đơ̆ng tơdrong kơnê̆.” (Jop 1:1) mă lei sư đei tơ’bơ̆p tơdrong hơnat hơnot. Mă khan sư ưh kơ băt yua kơ kiơ sư tơbơ̆p tơdrong hơnat hơnot noh, mă lei sư đei khan kơ dih : “Mă Kră Yang pơlôch inh , inh oei gơnang kơ Sư” (Jop 13:15). Pơtao Hesekia kŭm thoi noh, mă khan đĭ jơhngơ̆m chă ‘Bok Kei-Dei oei đei tơ’bơ̆p tơdrong hơnat hơnot, tơdrong pơlong lăng pơm ăn kơ pơtao lui gơnang kơ Kră Yang hloh loi, đơ̆ng noh sư đei athei kon pơlei pơla “’“Athei chơ̆n jơhngơ̆m nuih pran, ‘nĕ kơ hli” (II Hơ’mon 32:7).
Chăl arih kiơ̆ Kră Yang ưh kơ trŏ chăl arih ưh kơ đei tơdrong pơlong lăng ôh mă lei đei tơdrong pơlong wă tơgŭm bơ̆n thim đon lui gơnang kơ Kră Yang. Kră Yang ưh kơ pơkă kơ bơ̆n ưh kơ đei tơdrong pơlong lăng ôh mă lei Sư đei pơkă Sư gô oei hơdai bơ̆n lăm tơdrong pơlong lăng. Phŏ lơ wơ̆t lu bơ̆n chă Kră Yang đĭ jơhngơ̆m, ling lang kơ kơkuh kơ Sư, krao khan, păng đŏk Nơ̆r Sư rim năr, đĭ jơhngơ̆m bơ̆jang kơ Sư…mă lei tơplih kơ tơdrong hiôk hơđơ̆ng na tă kơ đei tơ’bơ̆p tă kơ tơdrong hơnat hơnot. Phŏ kơnh lăm tơdrong jên tơmam, tơdrong jang sa, phŏ kơnh ‘bơm kơ jơhngơ̆m lăm akâu jăn bơ̆n hăm hnam dơnŏ bơ̆n kơdih…’‘Bok Pôl đei bơtho thoi âu, “Mă bơ̆n đei tơdrong gleh pơmat-tat bơ̆n kư̆m hiôk chơt, yua kơ tơdrong pơmat-tat noh wă hơmet tơdrong lui bơ̆n kơjăp khŏm khŏm. Tơdah bơ̆n adrin tơpă tơdrong lui, lei tơdrong lui bơ̆n rai kơjăp. Tơdrong lui noh ăn kơ bơ̆n chang gô khŏm khŏm.” (Rôm 5:3-4). Kơplah đei tơbơ̆p tơdrong hơnat hơnot, apinh Kră Yang tơgŭm bơ̆n nĕ kơ ưh kơ ngeh kơ tơdrong ‘mêm Sư, mă lei chu iŏk tơdrong Kră Yang wă păng lui gơnang kơ Kră Yang Sư gô ăn tơdrong ‘lơ̆ng hloh kơ lu bơ̆n lăm tơdrong pơlong lăng đon lui lu bơ̆n wă kơ bơ̆n rai wơ̆ tơ̆l lăm Kră Yang hloh loi.
Bĕ bơ̆n pôm jơhngơ̆m đon krao khan,
Ơ Kră Yang, apinh ih mơnat ăn kơ dôm tơdrong yoch kiơ oei đei lăm inh, apinh ih tơgŭm inh đei tơdrong sơng iŏk tơdrong hơnat hơnot păng ling lang lui gơnang kơ Ih lăm dôm tơdrong păng lui kơ Ih ăn tơdrong ‘lơ̆ng hloh kơ inh. Yua anăn Kră Yang Yêsu Krist. Amen
Ơ đĭ đăng bơngai mơ̆ng mă ‘mêm kơeng,
Lu bơ̆n hăm đei sơng iŏk tơdrong pơlong lăng păng lui gơnang kơ Kră Yang ưh kơ tơplih ưh?
Tơ’bơ̆p tơdrong hơnat hơnot tăp dăr kơ bơ̆n
Kră Yang ăn tơdrong lui wơ̆ pran
Gơnang kơ tơdrong pŭn hiôk Kră Yang ăn
Arih bơ̆jang kơ Kră Yang, ‘bĕnh bla kơ tơdrong chơt hiôk.
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: II Hơ’mon 5-6
Kênh Youtube BHKTHN:
