II Kevcai 33:1-5
Nqe cim:
“Tus TSWV hlub nws haivneeg thiab nws tsomkwm nws cov neeg. Peb thiaj txhos caug ntua ntawm nws kotaw, thiab ua raws li nws tej lus.” (II Kevcai 33:3)
Lus nug rau sawvdaws xav:
– Thaum hais txog lub roob Xinais, Mauxes qhuab ntuas haivneeg Yixalayees txog tus cwjpwm twg ntawm Vajtswv?
– Vim licas nws hais txog tus Tswv tus cwjpwm no?
– Kawm paub txog Vajtswv txojkev hlub tsis pauv hloov, txhawb peb lub zog ua neej licas?
Tshooj 33 qhibthawj thiab xaus lus yog Mauxes tej lus qhuas Vajtswv. Hais tau hais tias, nyob ntu sijhawm coj tus Tswv haivneeg mus hauv lub Tebchaws Coglus Tseg, Mauxes tau paub txog Vajtswv tej cwjpwm. Tiamsis yam tshwjxeeb uas Mauxes xav hais txog ua ntej nws nce mus saum lub roob Anpalees thiab tuag rau saud, yog qhia txog Vajtswv tus cwjpwm lub tshua rau cov pejxeem. Peb saib pom qhov ntawd dhau ntawm lo lus xubthawj, “Tus TSWV nqis saum Roob Xinais los” (nqe 2). Lub roob Xinais yog qhov chaw tus Tswv nqua hu haivneeg Yixalayees los ua ib haivneeg dawbhuv rau Nws, thiab pub txoj kevcai rau lawv coj (Khiavdim 19:5-6; 20:1-17). Hais tau hais tias, lub roob Xinais yog qhov chaw pib txojkev sib raug zoo tshwjxeeb ntawm Vajtswv thiab haivneeg Yixalayees, thiab lub plag ntawm txojkev sib raug zoo ntawd yog tus Tswv txojkev hlub uas tsis pauv hloov.
Mauxes tej lus qhia txog Vajtswv tus cwjpwm hlub tshua yog yam tseemceeb uas haivneeg Yixalayees yuav tsum cim nco. Rau qhov txij thaum lawv mus txeeb lub tebchaws Kana-as mus txog thaum tau mus nyob hauv, yuav muaj tej lub sijhawm cov pejxeem yuav qaug zog, poob rau kev dag ntxias, ntsib kev txomnyem,… Thaum ntawd, qhov uas nco ntsoov hais tias Vajtswv niaj hnub hlub tshua lawv yog yam tseemceeb tshajplaws. Ntseeg hais tias Vajtswv hlub tshua Nws haivneeg tsis yog tej lus hais ntawm ncauj uas Mauxes xav qhia rau tus Tswv haivneeg xwb, tiamsis ntawd yeej yog tej uas Mauxes tus kheej kawm tau thaum siv lubneej ua tus Tswv haujlwm.
Thaum ua lubneej nrog tus Tswv mus, paub tseeb hais tias txhua tus ntseeg puavleej pom txog tus Tswv txojkev hlub uas loj kawg nkaus pub rau cov neeg txhaum zoo li peb. Twb yog vim pom txog tus Tswv txojkev hlub thiab txoj koob hmoov uas loj kawg nkaus ntawd, peb thiaj ua tau lubneej nco tus Tswv txiajntsig thiab ua neej phim lub meejmom ua tus Tswv haivneeg dawbhuv. Yog neeg nqaij tawv, peb tseem qaug zog, ua txhaum, tiamsis peb yuav tsum ua neej los ntawm kev zeem paub hais tias tus Tswv yeej tseem hlub cov neeg qaug zog li peb, thiab Nws txaus siab zam txim thaum peb lees thiab tso kev txhaum tseg. Tsis txhob tsuas saib pom tus kheej tej kev txhaum loj dhau, txog qib uas xav hais tias tus Tswv txojkev hlub tsis txaus los zam tej kev txhaum ntawd, thaum kawg ua rau txav deb tus Tswv. Txhua yam kev txhaum yuav raug txiav txim tiamsis muaj ib qhov tsis hloov ntawd yog Vajtswv niaj hnub hlub tshua tibneeg txhaum. Cia li los cuag tus Tswv, tuav ruaj Nws txojkev hlub uas tsis txawj hloov ibtxhis.
Thov Vajtswv,
Tus Tswv, Koj yog tus hlub tshua nyuam yaus los ntawm txojkev hlub tsis txawj hloov. Thov pab nyuam yaus tomqab uas paub txog Koj txojkev hlub, yuav ua tau lubneej sib hlub thiab ua neej tsimnyog lub meejmom uas yog Koj tus menyuam dawbhuv. Nyuam yaus tuav Yexus Khetos lub npe thov, Amees.
Zaj xwm twg nyob hauv lubneej pab peb tus kheej pom txog tus Tswv txojkev hlub uas loj kawg nkaus?
Nyeem Vajluskub hauv peb lub xyoos: II Vajntxwv 17
Kênh Youtube BHKTHN:
