Klei Aê Diê Blŭ: Klei Mtô Mñă Klei Bhiăn 33:1-5
Êlan kliăng: “Sĭt nik Yêhôwa khăp kơ phung ƀuôn sang; jih jang phung doh jăk dôk hlăm kngan ih; snăn digơ̆ buôn ti gŭ jơ̆ng ih, mă tŭ klei gai mơ̆ng ih” (Klei Mtô Mñă Klei Bhiăn 33:3)
Klei êmuh ksiêm mĭn: Mơ̆ng čư̆ Sinai, Y-Môis mñă kơ phung ƀuôn sang kơ ya knuih Aê Diê? Ya ngă ñu lŏ mñă kơ knuih anei mơ̆ng Aê Diê? Hriăm kơ Aê Diê khăp amâo bi mlih, si klei mđĭ ai drei hdĭp?
Kdrêč 33 mphŭn pŏk leh anăn mjưh hŏng klei Y-Môis mpŭ mni Aê Diê. Dưi lač, hlăm jih thŭn mlan ngă bruă atăt gai phung ƀuôn sang Aê Diê mŭt hlăm krĭng lăn Aê Diê Ƀuăn, Y-Môis klă sĭt thâo kơ knuih Aê Diê mdê mdê. Ƀiădah klei ñu čiăng mñă êlâo kơ ñu đĭ čư̆ Abarim leh anăn djiê tinăn, jing knuih klei khăp Aê Diê. Drei buh klei anăn hlăm klei mphŭn kčưm, “Yêhôwa hriê leh mơ̆ng čư̆ Sinai” (êlan 2). Čư̆ Sinai mâo lač jing anôk Aê Diê iêô phung ƀuôn sang Israel jing sa ƀuôn sang doh jăk kơ Ñu, mbĭt anăn mtrŭn klei bhiăn kơ diñu (Klei Kbiă 19:5-6; 20:1-17). Lŏ mblang, čư̆ Sinai jing anôk kruăk klei bi mguôp yuôm bhăn plah wah Aê Diê hŏng phung ƀuôn sang Israel, leh anăn tur kơ klei bi mguôp anăn jing klei khăp Aê Diê amâo mâo mlih ôh.
Klei Y-Môis mñă kơ knuih klei khăp Aê Diê jing klei yuôm bhăn phung ƀuôn sang Israel brei hdơr. Kyua hlăm hdră mơ̆ng hlăk plah mmiă krĭng Kanaan truh kơ nao dôk hlăm krĭng lăn Aê Diê Ƀuăn, srăng mâo mmông phung ƀuôn sang êdu awăt, arăng mplư, tuôm hŏng klei dleh dlan…Hlăk anăn, klei hdơr Aê Diê jing pô khăp nanao kơ diñu jing klei čiăng snăk. Đăo sĭt klei bi mklă Aê Diê khăp kơ phung ƀuôn sang Ñu amâo djŏ jing klei hriăm hŏng klei blŭ Y-Môis čiăng mñă kơ phung ƀuôn sang Aê Diê ôh, ƀiădah anei ăt jing klei ñu pô thâo leh klei hdĭp mă bruă kơ Aê Diê.
Hlăm klei hdĭp tui hlue Aê Diê, klă sĭt grăp čô phung đăo thâo leh sơăi klei khăp Aê Diê prŏng prĭn kơ phung soh jhat msĕ si drei. Kyua klei thâo kơ klei khăp leh anăn klei pap yuôm bhăn anăn, đru drei hdĭp hlăm ai tiê hdơr knga leh anăn hdĭp djŏ jing phung ƀuôn sang doh jăk Ñu. Anak mnuih kđeh asăr, drei ăt adôk êdu awăt, ngă soh, ƀiădah brei drei hdĭp hlăm klei thâo săng Aê Diê ăt khăp kơ phung êdu awăt msĕ si drei, leh anăn Ñu tŭ ư pap brei tơdah drei kmhal jih klei soh pô hlăm klei hdĭp. Đăm drei dlăng ôh kơ klei soh pô prŏng đei, bi mĭn klei khăp Aê Diê amâo djăp ôh čiăng dưi pap brei kơ klei jih klei soh anăn, knhal tuč ngă kơ drei đuĕ dăp kơ Aê Diê. Djăp klei soh klă sĭt mâo sơăi boh jhat ñu, ƀiădah mâo sa klei amâo bi mlih ôh jing Aê Diê khăp nanao kơ anak mnuih soh jhat. Brei drei êran nao kơ Khua Yang, jao pô hlăm klei khăp Ñu amâo mâo mlih ôh.
Ya klei hlăm klei hdĭp đru drei thâo kơ klei khăp prŏng prĭn Aê Diê brei kơ pô?
Wah lač: Ơ Khua Yang, jing Pô khăp kâo hŏng sa klei khăp amâo mâo mlih ôh. Akâo kơ Ih đru kâo thâo kơ klei khăp Khua Yang, hdĭp thâo khăp leh anăn hdĭp djŏ hŏng bruă jing anak doh jăk Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Bruă Mtao 17
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
