Khiavdim 32:1-6
Nqe cim:
“Tsis txhob pe lwm tus vajtswv, tiamsis pe kuv tib leeg xwb” (Khiavdim 20:3)
Lus nug rau sawvdaws xav:
– Aloos thiab cov Yixalayees ua txhaum li cas?
– Qhov vimchiv twg lawv thiaj ua txhaum li ntawd?
– Peb tau poob rau tej lub tsamthawj ua txhaum li cas?
Tom qab peb lub hlis tawm hauv tebchaws Iziv los, vim qhov uas tau pom tus Tswv lub hwjchim pab cawm, tus Tswv haiv neeg tau coglug hais tias lawv yuav mloog lus thiab ua raws nraim li tus Tswv tej lus samhwm (Khiavdim 24:3-8). Tiamsis , yam uas phem kawg nkaus tau tshwm thaum lawv “pom tias Mauxes mus saum roob thiab tsis txawj los” vim Mauxes mus saum roob Xinais plaub caug hnub plaub caug hmo txais Kaum Nqe Kevcai. Lawv kom Aloos “ua ib tus vajtswv coj lawv kev”, thiab lawv twb “fij khoom ua kev sib raug zoo thiab tua tsiaj hlawv theej txhoj, noj tsau haus qaug, sib daj sib deev” (nqe 1, 6). Hauv lus Henplais, lo lus “sib deev” hais txog tes haujlwm tsis tswj tus kheej thiab yog tus duab ntawm ib rooj kev cai lom zem noj tsaus haus qaug, seev cev thiab ua kev nkauj nraug (Khiavdim 32:25). Vim qhov ntawd, tib lub sijhawm cov Yixalayees tau ua txhaum tus Tswv cov nqe Kevcai 1, 2, thiab 7 ntawm Kaum Nqe Kevcai.
Qhov vimchiv ua rau cov Yixalayees ua txhaum vim yog lawv tsis ua siab ntev tos Mauxes nqis saum roob los. Qhov no ntuas peb ntau lub sijhawm uas maj, tsis ua siab ntev yuav yog ib qhov kev txiav txim siab yuam kev loj. Tiamsis, qhov vimchiv uas loj ua rau cov Yixalayees ua txhaum yog lawv tsis muaj kev ntseeg txaus rau ntawm tus Tswv. Lawv txoj kev pom, tsis yog muaj Vajtswv tib leeg xwb vim lawv tseem hais rau Aloos, “Peb tsis paub xyov muaj xwm dabtsi rau Mauxes tus uas coj peb nram tebchaws Iziv los lawm; yog li ntawd, koj cia li nchuav ib tug vajtswvv los ua tus coj peb” (nqe 1). Tseeb tiag, lawv txoj kev ntseeg tsis yog cog rau ntawm Vajtswv tib leeg xwb tiamsis tseem tshuav “lwm tus vajtswv” thiab Mauxes, vim li no thaum Mauxes tsis nrog lawv nyob ces lawv txoj kev ntseeg uas cog rau ntawm Vajtswv cia li puastsuaj tas lawm. Ntawm no yog txoj kev ntseeg uas coob tus ntseeg nim no tab tom muaj, yog txoj kev ntseeg uas tsis muaj kev sib txuas rau ntawm Vajtswv. Ntau tus ntseeg ua txhaum tsis yog tsis muaj kev ntseeg rau ntawm Vajtswv vim sab nraum Vajtswv lawd, lawv tseem ntseeg lwm tus vajtswv thiab lawv tus kheej.
Ntawm no, Aloos yuavtsum muaj feem xyuam ris cov pejxeem tej kev txhaum vim nws tau koom siab nrog lawv thiab nqua hu kom lawv hle tej qhwsntsej kub tuaj nws muab ncuav ua ib tug mlom nyuj kub. Niaj hnub no, peb raug dag ntxias kom koom nrog lub ntiajteb kom muaj kev yoojyim thiab tau lub teb lub chaw txais yuav. Yuav tsum nco ntsoov tej uas twb tshwm dhau los txawm yuav zoo npaum twg los yeej tsis yog lub plag rau peb txoj kev ntseeg ntawm Vajtswv, kev koom nrog lub ntiajteb yuav ua rau txoj kev txhaum loj zuj zus tuaj xwb, tus thawj coj thiab cov ntseeg yuav tsum txiav txim siab ua raws li Vajtswv Txojlus.
Thov Vajtswv,
Tus Tswv, thov zam txim rau nyuam yaus vim ntau zaus nyuam yaus tsawg kev ntseeg, cia siab rau ntau yam tshaj li Koj lawm. Thov pab kom nyuam yaus ua neej txhua hnub paub hwm Koj. Nyuam yaus tuav Tswv Yexus Khetos lub npe thov. Amees.
Peb puas koom nrog lub ntiajteb kom tau lub teb lub chaw thiab lwm tus txais yuav peb?
Nyeem Vajluskub hauv peb lub xyoos: Pajlug 25
Kênh Youtube BHKTHN:
