Klei Aê Diê Blŭ: Klei Kbiă 32:1-6
Êlan kliăng: “Đăm ih lŏ mâo yang mkăn ôh ti anăp Kâo” (Klei Kbiă 20:3)
Klei êmuh ksiêm mĭn: Ya klei soh Y-Arôn leh anăn phung ƀuôn sang Israel ngă? Mơ̆ng phŭn knhal atăt diñu truh kơ klei soh anei? Si klei truh drei tuôm lĕ leh lĕ hlăm klei soh?
Leh tlâo mlan kbiă mơ̆ng čar Êjip, hŏng lu klei thâo kral kơ klei bi mtlaih yuôm bhăn Khua Yang ngă leh, phung ƀuôn sang Aê Diê ngă leh sa klei bi mguôp, ƀuăn rơ̆ng gưt hlue Aê Diê wăt jih jang klei Aê Diê mtă hŏng jih ai tiê (Klei Kbiă 24:3-8). Ƀiădah lĕ, klei jhat kjham kjhuê̆ phung ƀuôn sang ngă tơdah diñu “ƀuh Y-Môis sui trŭn mơ̆ng čư̆” kyuadah Y-Môis đĭ ti dlông čư̆ Sinai hlăm 40 hruê mlam čiăng mă tŭ pŏk mdhă klei bhiăn. Phung ƀuôn sang akâo kơ Y-Arôn “Ngă brei kơ drei sa čô yang srăng nao ti anăp drei”, “leh anăn diñu myơr mnơ̆ng myơr čuh leh anăn mnơ̆ng myơr kơ klei êđăp ênang. Phung ƀuôn sang dôk gŭ čiăng ƀơ̆ng huă mnăm, leh anăn diñu kgŭ čiăng hlăp” (êlan 1, 6). Hlăm klei blŭ Hêbrơ, boh blŭ “hlăp” čiăng lač kơ klei ngă phưi tha leh anăn jing rup sa knăm huă ƀơ̆ng mnăm kpiê ruă kdŏ mmuñ ngă klei knhông čhŏ mrŏ mtŭk mtŭl (Klei Kbiă 32:25). Kyuanăn, phung ƀuôn sang Israel hlăm sa blư̆ ngă soh leh hŏng klei bhiăn tal 1, 2, leh anăn 7 hlăm Pluh Mta Klei Bhiăn.
Phŭn knhal ti anăp ală atăt phung ƀuôn sang Israel ngă klei soh kyuadah diñu mâo dưi gĭr dôk guôn Y-Môis trŭn mơ̆ng čư̆ ôh. Klei anei mñă kơ drei, lu blư̆ kyua klei truh kpĭ ktư̆ mtrŭt drei mâo klei čuăn ngă ruăt kuăt leh anăn soh čhuai. Ƀiădah lĕ, phŭn knhal êlam hĭn kơ klei phung ƀuôn sang Israel ngă soh, anăn jing kyua amâo dôk kjăp hlăm klei đăo kơ Khua Yang yơh. Hlăm klei phung ƀuôn sang dlăng ƀuh, Aê Diê amâo djŏ jing knŏng sa hjăn ôh, tơdah diñu lač kơ Y-Arôn, “Ngă brei kơ drei sa čô yang srăng nao ti anăp drei; kyuadah Y-Môis anăn, pô bi kbiă leh drei mơ̆ng čar Êjip, …” (êlan 1). Klă nik leh, klei đăo diñu mâo djŏ knŏng hjăn kơ Aê Diê ôh, ƀiădah wăt kơ “phung yang” mkăn, leh anăn tơl wăt kơ Y-Môis mơh, kyuanăn tơdah amâo mâo Y-Môis dôk mbĭt snăn klei đăo diñu kơ Aê Diê ăt dlưh rai djăl pral mơh. Anei mta klei đăo lu phung đăo hruê anei dôk mâo, jing klei đăo kƀah klei bi mguôp hjăn hŏng Khua Yang. Lu phung đăo ngă soh, amâo djŏ kyua diñu amâo mâo klei đăo kơ Khua Yang ôh, ƀiădah êngao kơ Aê Diê, diñu ăt adôk dưm klei đăo diñu kơ lu yang mkăn, hlăm anăn wăt kơ diñu pô msĕ mơh.
Tinei, Y-Arôn ăt tŭ bruă klam klei soh phung ƀuôn sang ngă mơh, kyuadah ñu ư ai mbĭt hŏng diñu, hlăk ñu brei phung ƀuôn sang toh ruh hĕ jih kdrăp mah pioh tuh mjing sa boh rup êđai êmô hŏng mah. Hruê anei, drei ăt lĕ hlăm klei mplư mơh tơdah čuăn ruah êlan hdră ư ai mbĭt hŏng lăn ala, čiăng duah klei ênưih leh anăn klei tŭ ư mơ̆ng ƀuôn sang leh anăn mơ̆ng mnuih mkăn. Brei drei hdơr jih klei drei găn leh hlăm klei hdĭp myang, wăt tơdah jăk siam snăk dưn mơh, ăt kăn klei anăn dưi jing atur klei đăo drei kơ Khua Yang rei, klei ư ai mbĭt hŏng lăn ala srăng atăt truh kơ klei soh ƀrư̆ hruê kjham hĭn, khua kiă kriê mbĭt hŏng phung ƀuôn sang Aê Diê brei dôk gĭr gưt ngă tui si Klei Aê Diê Blŭ.
Si ngă drei tuôm ư ai mbĭt hŏng lăn ala čiăng kơ ƀuôn sang leh anăn mnuih mkăn tŭ ư mơ̆?
Wah lač: Ơ Khua Yang, akâo Khua Yang pap brei kơ kâo kyuadah lu blư̆ kâo awăt êdu, dưm klei đăo kâo kơ lu klei mkăn hĭn kơ Khua Yang pô. Akâo Khua Yang đru kâo hdĭp grăp hruê hŏng klei huĭ mpŭ kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Hriêng 25
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
