Nehemis 1:4-11
Nqe cim:
“Nimno thov koj mloog kuv tej lus thov thiab lwm tus uas yog koj cov tubtxib uas hwm koj tej lus thov” (Nehemis 1:11a)
Lus nug rau sawvdaws xav:
– Nehemis ua li cas thaum hnov tej xwm mob siab txog yus haivneeg?
– Nws tej lus thov Vajtswv pab muaj tej yam tshwjxeeb twg?
– Peb muaj lub siab thiab tus cwjpwm li cas thaum thov Vajtswv pab lwm tus?
Nehemis yog neeg Yudas tiam tim ob nyob hauv tebchaws Npanpiloos. Nws tabtom ua tus ce cawv txiv hmab rau huabtais haus. Txawm yog yug thiab loj hlob lwm lub tebchaws tiamsis Nehemis lub siab yeej nco ntsoov nws qub tebchaws. Thaum uas muaj neeg tuaj hauv Yeluxalees tuaj, nws nug thiaj paub txog cov neeg uas seem tseem ciaj ua neej nyob txomnyem ntsuav raug luag saib tsis taus thiab tus ntsa yeej pob puas tas. Nehemis nyuaj siab thiab quaj tau ob peb hnub nws yoo mov mus cuag Vajtswv thiab thov Vajtswv pab.
Txawm yog siab kub heev txog lub neej txomnyem ntawm yus haivneeg los, Nehemis tsis maj ua raws li yus lub siab tiamsis ua ntej nws mus cuag Vajtswv. Lolus qhib thawj thov Vajtswv nws qhuas Vajtswv thiab zeem paub Vajtswv yog leejtwg? Nws taij thov Vajtswv mloog nws tej lus thov (nqe 5-6). Txuas ntxiv, nws lees nws haivneeg thiab nws tej kev txhaum. Thiab hais txog Vajtswv tej lus cogtseg (nqe 7-9). Nws kuj hais qhov koob hmoov kev cawmdim uas Vajtswv tseg pub rau cov Yixalayees. Thiab qhov kawg nws thov Vajtswv mloog tus ua hwm Vajtswv tej lus thov (nqe 10-11).
Nehemi tej lus thov Vajtswv zoo kawg nkaus, nws piav txog Vajtswv tus loj tus siab, lees kev txhaum, hloov siab, thiab xaus quaj thov kev pab. Qhov uas tsimnyog nco yog cov lus thov Vajtswv ntawm Nehemis nws tsis pib kiag lolus thov kev pab, tiamsis ua ntej huv tibsis nws qhia tawm Vajtswv yog tus loj tus siab thiab yog tus tsimnyog hwm. Thiab nws kuj qhia hais tias Vajtswv yeej ua li Nws coglus tseg thiab Vajtswv ua siab ntev rau tus ua hlub Vajtswv. Tsis tas li ntawd, nws lees nws haivneeg thiab nws tej kev txhaum. Nov yog tus cai ntawm tus neeg hwm Vajtswv tej lus thov.
Niaj hnub nim no thaum peb thov Vajtswv pab, peb yuavtsum zeem paub meej hais tias Tus uas peb thov tsis yog ib tug mlom uas tsis paub dabtsi, Nws yog Vajtswv tus ua muaj hwjchim, ncaj ncees, muaj kev hlub thiab zeem paub peb tej kev txhaum lees txim rau Vajtswv. Dua li ntawd, peb tsis tau muab Vajtswv tej lus cogtseg hauv Vajluskub los thiab thov kom Vajtswv ua tiav rau peb. Vajtswv ncaj ncees Nws yeej tsis hnov qab Nws tej lus cogtseg li tiamsis thaum hais txog dua thiab thov pab yog peb qhia tshwm peb lub siab ntseeg ruaj khov rau Tus uas peb taij thov. Ntawd yog yam uas haum Vajtswv siab. Thov Vajtswv pab kom peb ntseeg Vajtswv kawg siab ntsws thiab nrhiav kev pab ntawm Vajtswv hauv peb tej lus taij thov ua ntej uas yuav pib ua ib yam dab tsi twg.
Thov Vajtswv,
Tus Tswv, thov Koj pab kom nyuam yaus txawj kawm Yelemis tus qauv los ntawm kev thov Vajtswv pab rau lwm tus. Thov qhia kom nyuam yaus nco ntsoov tias Koj yog tus Tswv uas muaj hwjchim thiab txaus ntshai kom nyuam yaus tag siab los thov Koj, thiab ntseeg tias Koj yuav teb nyuam yaus tej lus thov. Nyuam yaus tuav Yexus Khetos lub npe thov, Amees.
Peb puas thov Vajtswv pab rau peb tej kwvtij thiab?
Nyeem Vajluskub hauv peb lub xyoo: 2 Xamuyees 3
Kênh Youtube BHKTHN:
