Klei Aê Diê Blŭ: Y‑Nêhêmi 1:4-11
Êlan kliăng: “Ơ Yêhôwa, brei knga Ih mđing kơ klei dĭng buăl Ih wah lač, leh anăn kơ klei phung dĭng buăl Ih wah lač phung khăp huĭ mpŭ kơ anăn Ih; …” (Y‑Nêhêmi 1:11a)
Klei êmuh ksiêm mĭn: Ya klei Y‑Nêhêmi ngă leh tơdah hmư̆ klei hưn ênguôt hnĭng kơ phung ƀuôn sang pô? Ya klei bi knăl hlăm klei ñu wah lač? Hŏng si ai tiê klei mĭn leh anăn knhuah drei khăng wah lač brei kơ mnuih mkăn?
Y‑Nêhêmi jing sa čô Israel ênuk tal dua hdĭp ti čar Ƀaƀilôn. Ñu dôk jing pô djă kčok kơ mtao. Wăt tơdah kkiêng leh anăn đĭ hriê kơ prŏng ti čar tue, ƀiădah ai tiê ñu ăt hung mĭn phă ƀuôn sang pô. Tơdah mâo mnuih hriê mơ̆ng ƀuôn Yêrusalem, ñu êmuh čhưn mtam leh anăn thâo kơ phung Israel adôk dôk hdĭp hlăm klei knap mñai leh anăn hêñ mlâo, mnư̆ ƀuôn prŏng dlưh rai. Ñu ruă ai tiê snăk, hnĭng ênguôt leh anăn hia kơŭ kyăm êjai lu hruê, leh anăn dơ̆ng kăm bơ̆ng huă nao ti anăp Khua Yang hlăm klei wah lač brei.
Wăt tơdah hlơr ai tiê kơ klei truh kơ phung găp djuê ƀuôn sang, Y‑Nêhêmi amâo ruăt kuăt ngă tui si klei mĭn ñu pô ôh, ƀiădah êlâo hĭn ñu nao kơ Khua Yang. Kčưm dơ̆ng klei ñu wah lač, ñu mpŭ mni klei jăk siam Khua Yang leh anăn thâo kral hlei Ñu jing. Ñu ik uêñ Khua Yang mđing hmư̆ klei ñu kwưh akâo (êlan 5-6). Lŏ čuê, ñu hưn klei soh găp djuê ƀuôn sang ñu leh anăn ñu pô. Leh anăn ñu lŏ mñă klei Khua Yang ƀuăn (êlan 7-9). Ñu lŏ mñă mơh klei pap bi mtlaih Khua Yang pioh brei kơ phung ƀuôn sang Israel. Leh anăn ti knhal tuč, lŏ sa blư̆ ñu akâo kơ Khua Yang dôk mđing hmư̆ klei sa čô huĭ mpŭ kơ Ñu wah lač (êlan 10-11).
Klei Y‑Nêhêmi wah lač jing sa klei čih mkra siam tloh ênoh hưn kơ klei prŏng prĭn Aê Diê, hưn klei soh leh anăn kmhal kơ klei soh, leh anăn bi ruê̆ hŏng sa klei kwưh akâo đru brei. Klei năng mđing êdi jing klei ñu wah lač amâo kčưm dơ̆ng mtam hŏng klei kwưh akâo đru ôh, ƀiădah êlâo hĭn ñu hưn mdah kơ Aê Diê Yêhôwa jing Pô prŏng hĭn leh anăn năng huĭ êdimi. Ñu ăt bi êdah mơh snei, Aê Diê djă pioh klei Ñu bi mguôp leh anăn ngă jăk kơ hlei pô khăp kơ Ñu. Êngao kơnăn, ñu mdah klei soh phung ƀuôn sang Israel leh anăn ñu pô. Anei jing jar klei wah lač mơ̆ng sa čô mnuih huĭ mpŭ sĭt kơ Aê Diê.
Hruê anei tơdah wah lač, wah lač brei, brei drei thâo klă kơ Pô drei dôk kwưh akâo amâo djŏ jing rup yang hơăi mang ôh, Ñu jing Aê Diê ktang myang, kpă ênô, bŏ hŏng klei khăp, mbĭt hŏng klei anăn brei thâo kral klei soh pô čiăng kmhal hŏng Khua Yang. Êngao kơnăn, drei knang kơ klei Aê Diê ƀuăn hlăm Klei Aê Diê Blŭ leh anăn kwưh akâo kơ Ñu bi truh sĭt. Khua Yang sĭt suôr amâo tuôm wơr bĭt ôh klei Ñu ƀuăn, ƀiădah tơdah lŏ mñă leh anăn kwưh akâo, jing hlăk anăn drei bi êdah ai tiê đăo sĭt kơ Pô drei wah lač, wah lač brei. Anăn jing klei bi mơak kơ Khua Yang. Akâo Khua Yang brei drei hŏng jih ai tiê đăo knang leh anăn tui duah klei đru bi mtlaih mơ̆ng Khua Yang hlăm klei drei wah lač brei, êlâo kơ drei dơ̆ng ngă ya mta klei.
Si ngă drei khăng wah lač brei kơ phung ayŏng adei drei mơ̆?
Wah lač: Ơ Khua Yang, akâo Ih đru kâo hriăm tui klei Y‑Nêhêmi bi hmô hlăm klei wah lač brei kơ pô mkăn. Akâo Ih mñă brei kâo thâo kral nanao Khua Yang jing Pô ktang myang leh anăn năng huĭ mpŭ čiăng kơ kâo hŏng jih ai tiê wah lač, wah lač brei hŏng klei đăo sĭt kơ Khua Yang srăng hmư̆ klei kâo wah lač. Kâo wah lač hlăm Anăn Khua Yang Yêsu Krist, Amen.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Dlăng Klei Aê Diê Blŭ hlăm tlâo thŭn: II Y-Samuel 3
Kênh Youtube BHKTHN:
