II Kevcai 34:1-12
Nqe cim:
“Txij thaum ntawd los cov Yixalayees tsis muaj ib tug cev Vajtswv lus zoo npaum li Mauxes uas tus TSWV nrog nws tham tim ntsej tim muag li lawm.” (II Kevcai 34:10)
Lus nug rau sawvdaws xav:
- Ua ntej Mauxes tuag, Vajtswv pub rau nws pom dabtsi?
- Vim licas Mauxes thiaj tau hu ua tus cevlus tshwj xeeb ntawm Vajtswv?
- Yam dabtsi ua rau peb ntseeg Vajtswv txojkev tswj kav txhua yam?
Thaum peb nyeem txog tshooj kawg ntawm phau II Kevcai, peb yuav hnov tu siab heev rau Mauxes vim nws siv tagnrho lubneej tiv kev txomnyem los coj cov Yixalayees taug kev mus rau lub Tebchaws Coglus Tseg, tiamsis thaum kawg nws tus kheej ho tsis tau mus nyob rau hauv, nws tsuas tau sawv saum lub roob Pinkas saib deb mus rau lub tebchaws ntawd xwb. Yog peb tsuas xav txog qhov no xwb, peb yuav tsis pom ib yam tseemceeb tshaj qhov ntawd – uas yog Mauxes tau hu ua tus Cevlus tshwjxeeb ntawm Vajtswv thiab yog ib tug thawjcoj uas tshwjxeeb heev ntawm haivneeg Yixalayees. Qhov no tau tabpov dhau ntawm qhov uas tsis muaj ib tug thawjcoj Yixalayees twg tau Vajtswv tus kheej muab faus, tsis muaj lwm tus cevlus twg uas tau ntsib Vajtswv tim ntsej tim muag, thiab tsis muaj ib tug twg tomqab uas ua tau tej haujlwm loj thiab txaus ntshai li tej uas Vajtswv pub rau Mauxes ua rau cov neeg Yixalayees.
Hais tau hais tias, Mauxes yog ib tug uas muaj hmoo heev thaum tau Vajtswv pub ua tau tej yam tshwjxeeb li ntawd. Mauxes tsis yog tsuas tau Vajtswv nyiam xwb, tiamsis nws kuj yog ib tug thawjcoj uas tshwjxeeb heev nyob hauv cov Yixalayees lub siab, nws lub koobmeej loj txog qib uas Vajtswv tsis pub kom leejtwg paub qhov chaw uas faus Mauxes, nyob tsam cov neeg uas hlub Mauxes tuaj pehawm nws lub ntxa zoo li pe ib tug vajtswv.
Peb xav hais tias yog Mauxes tau mus hauv lub Tebchaws Coglus Tseg, ces nws lub neej haj yam yuav zoo dua. Tiamsis qhov ntawd tsuas yog tibneeg txojkev xav xwb, vim Vajtswv txojkev xav siab dua peb txojkev xav ntau kawg li (Yaxayas 55:8-9). Ua ib tug ntseeg, peb yuav tsum xyaum txais yuav txhua yam uas tshwmsim rau hauv peb lub neej, txawm peb yuav totaub thiab tsis totaub, los txhua yam yeej nyob hauv Vajtswv txojkev npaj tseg uas zoo rau peb txhua tus uas yog Nws cov menyuam, vim Vajtswv yog tus tswj kav txhua yam tshwmsim saum nruab ntug thiab hauv ntiajteb. Muaj ntau zaus, peb hais tias peb ntseeg Vajtswv txojkev tswjkav txhua yam, tiamsis thaum ib yam dabtsi tshwmsim uas tsis raws li peb xav, ces peb ho pib ua xyem xyav txog Vajtswv txojkev hlub thiab kev tswjhwm! Yog tias peb ntsib lub tsamthawj zoo ntawd, cia li xav txog Mauxes lub neej, nco ntsoov tias nws yog Vajtswv tus Cevlus uas tshwjxeeb, qhov uas nws tsis tau mus hauv lub Tebchaws Coglus Tseg yeej nyob hauv Vajtswv kev tswjhwm, thiab qhov ntawd yeej tsis cuam tshuam rau Vajtswv txojkev hlub pub rau nws.
Thov Vajtswv,
Vajtswv, thov ua tsaug rau Mauxes tus qauv zoo hauv kev ncaj ncees ua Koj tes haujlwm. Thov pab nyuam yaus ua tau lub neej muab siab npuab Koj txawm tias ntau zaus nyuam yaus tsis nkag siab qee yam uas Koj pub tshwmsim hauv nyuam yaus lub neej. Thov pab nyuam yaus ntseeg tias tej ntawd puavleej nyob hauv Koj txojkev npaj tseg uas zoo. Nyuam yaus tuav Yexus Khetos lub npe thov, Amees.
Puas muaj ib yam dabtsi nyob hauv peb lub neej uas ua rau peb tsis txaus siab rau Vajtswv?
Nyeem Vajluskub hauv peb lub xyoos: Yaxayas 51
Kênh Youtube BHKTHN:
