Klei Aê Diê Blŭ: Klei Mtô Mñă Klei Bhiăn 34:1-12
Êlan kliăng: “Leh anăn mơ̆ng hruê anăn amâo lŏ mâo ôh hlăm Israel sa čô khua pô hưn êlâo msĕ si Y-Môis, pô Yêhôwa tuôm blŭ hrăm bi tlă anăp” (Klei Mtô Mñă Klei Bhiăn 34:10)
Klei êmuh ksiêm mĭn: Ya klei Aê Diê brei Y-Môis dưi ƀuh êlâo kơ djiê? Ya ngă iêô Y-Môis jing Khua Pô Hưn Êlâo Mdê Hjăn kơ Aê Diê? Ya klei brei drei đăo kơ klei Aê Diê kiă kriê?
Tơdah drei dlăng kdrêč knhal tuč hdruôm hră Klei Mtô Mñă Klei Bhiăn, drei ăt ƀuh sơăi năng hơưi kơ Y-Môis kyua jih klei hdĭp dleh dlan gĭt gai phung ƀuôn sang Israel nao ti krĭng lăn Aê Diê ƀuăn, ƀiădah ñu pô amâo dưi mŭt ôh hlăm krĭng anăn čiăng dưi dưn, knŏng dưi dôk ti čŏng čư̆ Pisga dlăng kơ krĭng anăn mơ̆ng kbưi. Tơdah knŏng ksiêm mĭn hlăm klei anei snăn drei amâo srăng ƀuh ôh sa klei yuôm bhăn hĭn, anăn jing arăng iêô Y-Môis jing Khua Pô Hưn Êlâo Mdê Hjăn kơ Aê Diê leh anăn jing pô gĭt gai yuôm bhăn hŏng phung ƀuôn sang Israel. Klei anei mâo bi mklă hlăm bruă amâo mâo ôh khua gĭt gai mkăn hlăm phung ƀuôn sang Israel mâo kngan Aê Diê Pô dơr, ăt kăn mâo mơh sa čô khua pô hưn êlâo êdei anăn dưi bi tuôm ƀô̆ mta tlă anăp hŏng Aê Diê, leh anăn ăt kăn mâo mơh hlei pô êdei anei ngă bruă yuôm bhăn leh anăn năng huĭ msĕ si klei Aê Diê brei Y-Môis ngă leh ti anăp phung ƀuôn sang Israel.
Năng ai dưi lač, jăk mơak snăk kơ Y-Môis kyua Aê Diê brei klei yuôm bhăn anăn. Y-Môis amâo djŏ knŏng bi mơak kơ Aê Diê ôh ƀiădah ñu lŏ jing sa čô khua gĭt gai mdê hjăn hlăm ai tiê phung ƀuôn sang Israel mơh, klei ñu hmăi hlăm phung ƀuôn sang prŏng snăk tơl Aê Diê amâo brei ôh hlei pô thâo anôk Ñu dơr Y-Môis kñăm ñĕ kơ klei phung ƀuôn sang khăp čiăng đei kơ Y-Môis srăng nao kkuh ti msat gơ̆ msĕ si sa čô yang.
Drei bi mĭn tơdah Y-Môis dưi mŭt hlăm krĭng Lăn Aê Diê Ƀuăn snăn klei hdĭp ñu knư̆ jăk mơak hĭn. Ƀiădah anăn knŏng jing klei mĭn anak mnuih, kyua klei mĭn Aê Diê prŏng hĭn kơ klei drei bi mĭn (Y-Êsai 55:8-9). Jing Phung Đăo Kơ Krist, brei drei hriăm tŭ ư kơ djăp klei mâo wăt tơdah mâo si klei truh dưn, wăt tơdah drei thâo săng amâodah amâo thâo săng, snăn jih jang dôk hlăm hdră jăk Aê Diê brei kơ klei hdĭp phung ƀuôn sang Ñu sơăi, kyua Aê Diê jing Pô ksiêm dlăng jih jang bruă mâo ti lăn ăt msĕ mơh hlăm adiê. Lu blư̆ drei khăng lač drei đăo kơ klei Aê Diê kiă kriê, ƀiădah tơdah mâo ya bruă truh amâo msĕ si klei pô čiăng, drei lŏ đing kơ klei kiă kriê leh anăn klei khăp Aê Diê brei kơ drei! Tơdah mâo mmông drei lĕ hlăm boh klei snăn, brei dlăng kơ klei hdĭp Y-Môis, brei hdơr ñu jing sa čô Khua Pô Hưn Êlâo Mdê Hjăn kơ Aê Diê, bruă ñu amâo dưi mŭt hlăm krĭng Lăn Aê Diê Ƀuăn ăt adôk hlăm klei Ñu kiă kriê, leh anăn klei anăn amâo hmăi ôh kơ klei khăp Aê Diê brei kơ gơ̆.
Ya klei truh hlăm klei hdĭp drei ngă kơ drei ƀuh amâo mơak ôh kơ Aê Diê?
Wah lač: Ơ Khua Yang, bi mni kơ Ih kơ klei Y-Môis bi hmô mă bruă sĭt suôr kơ Ih. Akâo kơ Ih đru kâo hdĭp sĭt suôr hŏng Ih, wăt tơdah mâo lu klei kâo amâo thâo săng ôh ya ngă Ih brei truh hlăm klei hdĭp kâo. Akâo kơ Ih đru kâo đăo djăp mta klei truh hlăm klei hdĭp kâo dôk hlăm hdră jăk Ih brei kơ kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 51
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
