Klei Aê Diê Blŭ: I Y-Pêtrôs 3:1-7
Êlan kliăng: “Brei diih bi gưt hdơ̆ng diih hlăm klei huĭ mpŭ kơ Krist.” (Êphêsô 5:21)
Klei êmuh ksiêm mĭn: Hlăm hră čih mkra, kčưm mŭt hŏng klei mtô kơ phung mô̆ (êlan 1) leh anăn kơ phung ung (êlan 7) mâo mơ̆ boh blŭ msĕ? Klei mblang kơ boh blŭ anei brei ƀuh ti anôk jing tur klei bi dôk ung mô̆ hlăm Krist? Ya klei mñă kơ drei klei tal êlâo hĭn hlăm klei mkŏ mdơ̆ng klei bi dôk ung mô̆ drei pô?
Hlăm êlan 1 leh anăn êlan 7 tui si hră čih mkra, tui tluôn klei kčưm blŭ mtô kơ phung mô̆ leh anăn kơ phung ung mâo sơăi boh blŭ msĕ, anăn jing: “Msĕ mơh”, čiăng lač “msĕ si kdrêč lač leh”. Khua ƀĭng kna Y-Pêtrôs čiăng mtô kơ jih dua ung mô̆ ya mta klei msĕ? Anăn jing klei, msĕ si Khua Yang Yêsu bi hmô hlăm I Y-Pêtrôs 2:21-24. Bi hmô kơ klei săn asei mlei, tŭ gĭr, đup gưt tui si klei Aê Diê čiăng hlăm djăp mta boh klei, leh anăn mĭn klei tŭ dưn kơ pô mkăn. Snăn, klei Khua Yang Yêsu bi hmô yơh jing tur kơ klei bi dôk ung mô̆ hlăm Krist. Wăt tơdah ung leh anăn mô̆ mâo bruă klam leh anăn anôk bruă mdê mdê hlăm gŏ sang, ƀiădah jih dua brei dôk hdĭp tui hlue klei Khua Yang Yêsu bi hmô.
Si mă yua hlăm gŏ sang klei Khua Yang Yêsu bi hmô (I Y-Pêtrôs 2:21-24)? Msĕ si klei Khua Yang Yêsu đup gưt kơ klei dưi Aê Diê Ama, jih dua ung mô̆ brei đup gưt sơăi kơ klei dưi leh anăn pruê̆ êruei hlăm gŏ sang Aê Diê mkŏ mjing leh. Msĕ si Khua Yang Yêsu khăp leh kơ drei, jih dua ung mô̆ brei dôk dơ̆ng ƀơ̆ng huă hdơ̆ng pô hŏng klei khăp. Msĕ si Khua Yang Yêsu săn asei mlei kyua klei tŭ dưn kơ drei, jih dua ung mô̆ brei săn asei mlei kơ hdơ̆ng pô, tui duah klei tŭ dưn kơ pô drei dôk. Msĕ si Khua Yang Yêsu luă gŭ, bi ti gŭ ñu pô, jih dua ung mô̆ brei bi luă gŭ leh anăn bi mpŭ hdơ̆ng pô. Msĕ si Khua Yang Yêsu dôk kriêp ñăt êjai tlă anăp hŏng klei dleh knap leh anăn klei amâo mtăp mđơr, jih dua ung mô̆ brei hriăm hdĭp kriêp ñăt, thâo bi pap brei hdơ̆ng pô.
Si ngă dôk hdĭp tui hlue klei Khua Yang Yêsu bi hmô jing yuôm kơ klei hdĭp gŏ sang? Kyuadah tơdah amâo tui hlue ôh jar bi hmô anei, gŏ sang srăng lĕ hlăm boh klei hlei pô yuôm, hlei pô prŏng, hlei pô mâo klei dưi hĭn hlăm gŏ sang…, hlăk anăn ung mô̆ srăng dôk hdĭp mbĭt knŏng hŏng klei bhiăn ƀiădah amâo mâo hŏng klei khăp ôh. Klei hdĭp gŏ sang bŏ hŏng klei jăk mơak tơdah jih dua ung mô̆ hŏng jih ai tiê tui duah klei jăk mơak kơ pô drei dôk, ƀiădah klei hdĭp ung mô̆ srăng jing huĭ hyưt tơdah jih dua ung mô̆ dôk hdĭp čuôt klih, knŏng čiăng kơ pô drei dôk kăp bi hrăp bi mơak hjăn tĭng kơ drei pô hyuôt.
Hruê anei, klei bi dôk ung mô̆ leh anăn gŏ sang hlăm Krist ƀrư̆ hruê ƀrư̆ êdu awăt hĭn êjai kyuadah lu phung đăo amâo thâo kral ôh tur yuôm ti dlông anei. Lu phung mô̆ hưn ktưn kơ ung diñu uêñ mĭn mă bruă knuă, amâo hlăp in jin; hlăp mƀul kpiê êsei; lu phung ung hưn ktưn mơh kyua mâo mô̆ siam mniê, thâo mbruă, uêñ mĭn prăp êmiêt răng kriê gŏ sang, ƀiădah amâo mâo pô uêñ mĭn ôh kơ si klei đăo hdơ̆ng pô jing. Klei brei dưm tal êlâo hĭn hlăm klei hdĭp ung mô̆ amâo mâo klei mkăn mdê hĭn ôh jing klei mkŏ mjing klei hdĭp myang kơ grăp čô hlăm gŏ sang, čiăng kơ grăp čô ƀrư̆ hruê msĕ si Khua Yang Yêsu hĭn.
Ya mta klei diih uêñ mĭn hĭn hlăm klei hdĭp ung mô̆ diih?
Wah lač: Bi mni kơ Khua Yang kyua klei hdĭp ung mô̆ Khua Yang brei kơ kâo. Akâo Khua Yang đru kâo khăp, tui duah Khua Yang, grăp hruê jing msĕ si Khua Yang hĭn, leh anăn bi êdah klei anăn hlăm klei hdĭp ung mô̆ kâo.
Dlăng Klei Aê Diê Blŭ hlăm tlâo thŭn: Y-Mathiơ 6:5-7:12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
