I Petus 3:1-7
Nqe cim:
“Vim nej yog cov uas hwm Yexus Khetos, nej ib tug yuav tsum mloog ib tug lus” (Efexus 5:21).
Lus nug rau sawvdaws xav:
– Nyob hauv Phau Txhais Tshiab, qhibthawj ntawm tej lus qhuab ntuas cov pojniam (nqe 1) thiab cov txiv (nqe 7) muaj lo lus twg zoo sibthooj?
– Lo lus no qhia rau peb paub yam dabtsi thiaj yog lub plag ntawm cov ntseeg Yexus kev sib yuav?
– Peb tau qhuab ntuas licas txog kev tseg sijhawm los txhim kho tus kheej lub neej txij nkawm?
Nyob hauv nqe 1 thiab nqe 7 Phau Txhais Tshiab, puavleej muaj ib lo lus qhib thawj zoo sib thooj, ntawd yog lo lus: “kuj ib yam nkaus”, muaj lub ntsiab hais tias “zoo li hais lo saud”. Timthawj Petus xav qhia ob niamtxiv txog yam zoo sib thooj twg? Ntawd yog kev zoo thooj Tswv Yexus tus qauv uas hais hauv I Petus 2:21-24. Yog tus qauv tiv kev txomnyem, ua raws Vajtswv lub siab nyiam txhua lub sijhawm, thiab tsuas xav ua kom muaj nqis rau lwm tus. Yog li ntawd, Tswv Yexus tus qauv yog lub plag ntawm cov ntseeg kev sib yuav. Txawm yog tus txiv thiab tus pojniam nyias muaj nyias lub luag haujlwm sib txawv hauv lub cuabyig, los nkawd yuav tsum ua neej raws li Tswv Yexus tus qauv.
Tswv Yexus tus qauv (I Petus 2:21-24) tau muab los siv rau hauv lub cuabyig licas? Ib yam li Tswv Yexus hwm Vaj Leej Txiv, tus pojniam thiab tus txiv yuav tsum hwm txojcai hauv lub cuabyig uas tus Tswv tau teeb tseg lawm. Ib yam li Tswv Yexus hlub peb, tus pojniam thiab tus txiv yuav tsum ua lub neej sib hlub. Ib yam li Tswv Yexus tau tuag txhiv kom peb tau zoo, tus pojniam thiab tus txiv yuav nrhiav kev ua yam muaj nqis rau yus tus txij tus nkawm. Ib yam li Tswv Yexus txo hwjchim nqis los ntiajteb, tus pojniam thiab tus txiv yuav tsum sib txo hwjchim thiab ib tug saib taus ib tug. Ib yam li Tswv Yexus nyob ntsiag to thaum ntsib kev txomnyem thiab kev tsis ncajncees, tus pojniam thiab tus txiv yuav tsum ua lub neej ntsiag to thiab sib zam txim.
Vim licas ua neej raws Tswv Yexus tus qauv tseemceeb nyob hauv lub cuabyig? Vim yog tsis ua raws li tus qauv no, ces lub cuabyig yuav raug poob mus rau kev sib ntaus nqi saib leejtwg tseemceeb dua, loj dua, muaj hwjchim dua nyob hauv lub cuabyig,… thiab thaum ntawd nkawm niamtxiv tsuas muaj yuav ua neej raws “txojcai” xwb, tsis ua los ntawm kev hlub. Lub cuabyig yuav puv npo koob hmoov thaum tus pojniam thiab tus txiv tas siab tas ntsws nrhiav kev ua zoo rau tus txij tus nkawm, tiamsis lub neej txijnkawm yuav ntsib teebmeem yog hais tias ob niamtxiv ua neej qia dub, tsuas xav kom tus txij tus nkawm ua raws li yus hais thiab ua nqig yus lub siab.
Niaj hnub nimno, cov ntseeg lub neej txij nkawm thiab lub cuabyig yim hnub yim tsis ruaj khov vim cov ntseeg tsis paub txog lub plag tseemceeb hais los saud. Coob tug pojniam txaus siab vim tus txiv txawj khwv noj, tsis twv txiaj yuam pov, tsis mus noj haus nrog phoojywg; coob tug txiv los kuj txaus siab vim tau tus pojniam zoo nkauj, nquag, paub saibxyuas lub cuabyig; tiamsis tsuas muaj tsawg leej quavntsej txog tus txij tus nkawm lub neej ntseeg. Yam xub ua nyob hauv kev txhim kho lub neej txijnkawm yog txhim kho txhua tus hauv lub cuabyig ntsujplig kom txhua tus yim hnub yim zoo thooj tus Tswv.
Thov Vajtswv,
Vajtswv, nyuam yaus ua Koj tsaug vim lub neej txijnkawm uas Koj pub rau nyuam yaus. Thov pab nyuam yaus paub hlub Koj, nrhiav Koj, yim hnub yim zoo thooj Koj, thiab ua qhia tshwm tej ntawd hauv nyuam yaus lub neej txijnkawm. Amees.
Nej tabtom xav txog yam dabtsi nyob hauv lub neej txijnkawm?
Nyeem Vajluskub hauv peb lub xyoos: Mathais 6:5-7:12
Kênh Youtube BHKTHN:
