Ntawv Nkauj 127:3-5
Nqe cim
“Menyuam yog tej uas tus Tswv pub dawb rau neeg; menyuam yog koob hmoov los ntawm tus Tswv” (Ntawv Nkauj 127:3).
Lus nug rau sawvdaws xav:
– Ntawv Nkauj 127 qhia paub menyuam yog tej uas tus Tswv pub, muaj lub ntsiab licas?
– Niam txiv muaj feemxyuam licas rau menyuam?
– Peb tabtom tu qhia peb tej menyuam zoo licas?
Ntawv Nkauj 127 hais meej hais tias: “Menyuam yog tej uas tus Tswv pub dawb rau neeg; menyuam yog koob hmoov los ntawm tus Tswv” (nqe 3). Lwm phau txhais hais tias: “Tej tub ki yog qub txeeg qub teg ntawm Yawmsaub, tej menyuam uas yug hauv lub plab los yog tshav ntuj.” Menyuam yog qub txeeg qub teg muaj nqis uas tus Tswv pub rau txhua lub cuabyig. Thiab thaum tus Tswv pub qub txeeg qub teg, Nws kuj xav kom peb saib hlob, khaws ntshis thiab muaj feemxyuam tu, saibxyuas kom zoo. Vim li ntawd, qhov uas tu qhia menyuam raws li tus Tswv txojkev thiab homphiaj ke yog kev sim siab, ke yog feemxyuam thiab kuj yog “tshav ntuj” rau nkawm niam txiv.
Tus sau muab cov menyuam hauv lub cuabyig piv li “rab xub hauv tus tub rog txhais tes” (nqe 4 HMOWSV). Feemxyuam ntawm niam txiv yog tu qhia, rawv tej “xub” nkhaus raws li tus Tswv lub siabnyiam kom Nws tau siv hauv pluav rog sab ntsujplig. Leejtwg muaj “xub hneev” ntau hauv nws lub raj tau koobhmoov kawg li! Tus ntawd yuav tsis txajmuag tabmeeg nws cov yeebncuab (nqe 5). Tiamsis yuav kom cov xub hneev ntawd muaj nqis ces kev tu, cob qhia yog niam txiv li feemxyuam, lawv yog cov uas tus Tswv muab cob ua tes haujlwm ntawd.
Vajtswv muab feemxyuam tu qhia menyuam rau niam txiv zoo li lawv yog cov sawv cev muaj hwjchim qhia tshwm tus Tswv tej kevcai rau lawv cov menyuam. Tus Tswv tsis cob haujlwm tas tseg tsis quavntsej, tiamsis Nws pub Vaj Ntsujplig nyob nrog nraim thiab Vajtswv Txojlus yog yam taw qhia niam txiv (Pajlug 22:6; II Kevcai 6:6-9; Efexus 6:4).
Peb tej menyuam tabtom nyob rau tiam uas puv npo kev txhaum, ua phem ua qias, tsis paub ua zoo thiab tsis muaj kev ntseeg. Cuabyig yog thawj lub tsev kawm muaj nqis heev rau menyuam, thiab niam txiv yog cov xibhwb uas menyuam ntseeg siab tshajplaws. Yog cov niam txiv ntseeg Yexus, peb yuav tsum tu qhia menyuam raws li Vajluskub thiab pab lawv txais yuav Cawmseej Yexus ua lawv tus Tswv. Tsis txhob yog tsuas txhawj nrhiav nyiaj pab menyuam kev cheemtsum sab nqaij tawv xwb es ho hnov qab siv sijhawm los nyob ze thiab qhia lawv paub Vajtswv Txojlus, coj lawv ua lubneej ntseeg thiab hlub tus Tswv.
Yog niam yog txiv, leejtwg los yeej ntshaw tu qhia menyuam ua tau neeg zoo, ua neej muaj nqis thiab ua rau tsevneeg tau ntsejmuag. Tiamsis yog cov niam txiv uas ntseeg Yexus, peb yuav tsum muaj kev ntshaw siab dua, peb tu qhia menyuam rau Vajtswv thiab peb raug ris lub nra txog nyias tej menyuam tabmeeg Vajtswv. Thov tus Tswv pab txhua nkawm niam txiv zeem paub qhov no thiab vamkhom tus Tswv txhua hnub kom TU thiab QHIA menyuam loj hlob hauv tus Tswv txojkev, pab menyuam zeem paub tus Tswv lub homphiaj rau nws lubneej kom nws dhau los ua cov neeg muaj nqis rau tus Tswv.
Thov Vajtswv,
Tus Tswv, thov qhuab ntuas nyuam yaus txog feemxyuam tseemceeb ntawm kev tu qhia menyuam rau Koj. Thov pub rau nyuam yaus muaj tswvyim qhia menyuam raws Koj txojkev thiab dhau los ua cov “xub hneev” muaj nqis rau Koj. Nyuam yaus tuav Yexus Khetos lub npe thov, Amees.
Peb tabtom tu qhia menyuam rau tus kheej los yog tu qhia rau Vajtswv?
Nyeem Vajluskub hauv peb lub xyoo: Mathais 25
Kênh Youtube BHKTHN:
