Klei Aê Diê Blŭ: Klei Mmuñ Hđăp 127:3-5
Êlan kliăng: “Nĕ anei, phung anak jing ngăn dưn mơ̆ng Yêhôwa; leh anăn boh mơ̆ng tian prôč jing klei mưn.” (Klei Mmuñ Hđăp 127:3)
Klei êmuh ksiêm mĭn: Klei Mmuñ Hđăp 127 brei thâo kơ phung anak jing ngăn dưn, ya čiăng lač? Si bruă klam brei amĭ ama bi mâo hŏng phung anak? Si drei dôk čiêm rông mtô phung anak drei?
Klei Mmuñ Hđăp 127 lač klă: “Nĕ anei, phung anak jing ngăn dưn mơ̆ng Yêhôwa; leh anăn boh mơ̆ng tian prôč jing klei mưn.” (êlan 3). Phung anak yơh jing ngăn dưn yuôm bhăn Aê Diê brei kơ grăp boh gŏ sang. Leh anăn tơdah Khua Yang jao brei ngăn dưn, Ñu ăt čiăng kơ drei thâo mpŭ bi yuôm djă pioh, leh anăn mâo bruă klam dlăng ba, kiă kriê bi jăk. Kyuanăn, čiêm rông mtô phung anak tui si êlan leh anăn hdră Aê Diê kñăm čiăng, jing klei lông dlăng wăt bruă klam leh anăn ăt jing “klei mưn” kơ amĭ ama mơh.
Pô čih hră bi hmô phung anak hlăm gŏ sang msĕ si “ƀrăm hlăm kngan sa čô kahan” (êlan 4). Bruă klam kơ amĭ ama jing čiêm rông mtô lač, ƀư̆ mgô phung “ƀrăm” djŏ tui si klei Pô brei čiăng kơ Ñu yua pioh bi blah hlăm kdrăn blah klei hdĭp mngăt. Hlei pô mâo lu “ƀrăm” hlăm đĭng tiông ñu mâo klei jăk mơak êdi yơh! Pô anăn amâo srăng hêñ ôh dôk ti anăp phung roh ñu (êlan 5). Ƀiădah čiăng kơ ƀrăm anăn jing tŭ dưn, snăn bruă klam kiă kriê, mtô lač jing bruă amĭ ama kơ phung Aê Diê jao leh bruă. Aê Diê mdưm bruă klam čiêm rông mtô anak kơ amĭ ama, jing msĕ si phung bi ala mâo klei dưi pioh bi êdah hnơ̆ng čuăn Aê Diê kơ phung anak diñu pô. Ƀiădah lĕ, amâo djŏ ôh leh jao bruă klam Aê Diê phưi lui, ƀiădah Ñu brei Yang Mngăt Jăk nao mbĭt hrăm leh anăn Klei Aê Diê Blŭ jing giê ktrâo atăt êlan kơ amĭ ama (Klei Bi Hriêng 22:6; Klei Mtô Mñă Klei Bhiăn 6:6-9; Êphêsô 6:4).
Phung anak drei dôk hdĭp hlăm ênuk ƀuôn sang bŏ hŏng klei soh, hroh trŭn leh anăn kƀah hnơ̆ng čuăn ai tiê kpă wăt klei huĭ mpŭ kơ Aê Diê. Gŏ sang yơh jing sang hriăm tal êlâo hĭn mâo klei bi hmăi prŏng kơ phung anak, leh anăn amĭ ama yơh jing phung nai kơ phung anak đăo knang hĭn. Jing amĭ ama phung đăo kơ Krist, brei drei čiêm rông mtô anak kna ti dlông hnơ̆ng čuăn Klei Aê Diê Blŭ leh anăn đru digơ̆ thâo kral Khua Yang Yêsu Pô Bi Mtlaih jing Khua kơ klei hdĭp digơ̆ pô. Đăm ôh kyua gun kpăk đei hŏng klei duah mnơ̆ng ƀơ̆ng huă prăk kăk yua čiăng čiêm rông mtô anak, tơl hlŏng wơr bĭt hĕ pioh hruê mmông mjĕ giăm leh anăn mtô lač kơ phung anak thâo Klei Aê Diê Blŭ, atăt digơ̆ mâo klei hdĭp huĭ mpŭ leh anăn khăp kơ Khua Yang.
Jing amĭ ama, jih jang mnuih hmăng hmưi sơăi čiêm rông mtô anak drei pô dưi jing mnuih jăk, hdĭp tŭ dưn leh anăn jing klei bi mơak kơ gŏ sang. Ƀiădah jing amĭ ama phung đăo kơ Krist, drei lŏ mâo klei hmăng hmưi kdlưn hĭn mơh, drei dôk čiêm rông mtô anak brei kơ Aê Diê, leh anăn drei tŭ bruă klam kơ phung anak drei ti anăp Khua Yang. Akâo Khua Yang đru grăp čô amĭ ama thâo săng klei anei, leh anăn knang kơ Khua Yang grăp hruê čiăng dưi ČIÊM RÔNG leh anăn MTÔ anak hriê kơ prŏng hlăm êlan Khua Yang, đru anak thâo kral hdră kñăm Aê Diê pioh kơ klei hdĭp gơ̆ pô, čiăng kơ anak srăng jing phung mnuih tŭ dưn kơ Khua Yang.
Si ngă drei dôk čiêm rông mtô anak pioh kơ hjăn drei pô amâodah kơ Aê Diê?
Wah lač: Ơ Khua Yang, akâo Ih bi mñă brei kâo hdơr bruă klam yuôm bhăn hlăm klei čiêm rông mtô anak kơ Khua Yang. Akâo Ih brei kơ kâo mâo djăp klei pap čiăng dưi atăt gai anak đĭ hriê kơ prŏng tui hlue êlan Khua Yang leh anăn jing “ƀrăm” tŭ dưn kơ Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Mathiơ 25
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
