Klei Aê Diê Blŭ: II Y-Timôthê 1:6-10
Êlan kliăng: “Snăn đăm hêñ ôh hưn klei Khua Yang drei, kăn hêñ rei kơ kâo pô jing mnă kyua ñu, ƀiădah tŭ bĕ kdrêč klei knap mñai kyua klei mrâo mrang jăk hlăm klei myang Aê Diê,” (II Y-Timôthê 1:8)
Klei êmuh ksiêm mĭn: Si mblang tŭ klei knap mñai kyua Klei Mrâo Mrang Jăk? Si klei khua ƀĭng kna Y-Pôl mtă mtăn kơ Y-Timôthê brei tŭ klei knap mñai kyua Klei Mrâo Mrang Jăk? Ya klei diih hriăm mơ̆ng khua ƀĭng kna Y-Pôl bi hmô kơ klei tŭ klei knap mñai kyua Klei Mrâo Mrang Jăk?
Hlăm knhuang êlan tui hlue Khua Yang leh anăn hdĭp kyua Klei Mrâo Mrang Jăk, phung đăo kơ Krist srăng tlă anăp hŏng lu klei dleh dlan leh anăn klei bi kdơ̆ng. Ƀiădah lĕ, Klei Aê Diê Blŭ brei drei thâo, klei tŭ klei knap mñai kyua Klei Mrâo Mrang Jăk jing sa mta klei yuôm bhăn kyuadah “Aê Diê bi mtlaih leh anăn iêô leh drei hŏng klei iêô doh jăk” (êlan 9). Hlăk čih hră kơ anak ñu hlăm mngăt, khua ƀĭng kna Y-Pôl mtă mtăn kơ Y-Timôthê “tŭ bĕ kdrêč klei knap mñai kyua Klei Mrâo Mrang Jăk” (êlan 8).
Tŭ klei knap mñai kyua Klei Mrâo Mrang Jăk čiăng lač, srăng găn klei truh dleh dlan knap mñai êjai kah mbha Klei Mrâo Mrang Jăk, leh anăn hdĭp bi êdah klei sĭt nik Klei Mrâo Mrang Jăk. Ti krah lăn ala hdĭp tui si klei tluh čiăng hjăn pô dê leh anăn dôk ti gŭ klei myang klei mmăt, phung đăo dôk sĭt suôr hŏng klei Khua Yang Yêsu mtô lač, hiu hưn klei sĭt nik Ñu, khăng tlă anăp hŏng lu mnêč êlan klei bi kdơ̆ng mdê mdê. Năng ai jing klei lui dôk hjăn păn, klei hngah, klei mưč mač; amâodah klei arăng ngă jhat, mă mnă, krư̆ kđăl, tơl truh kơ klei bi mdjiê.
Khua ƀĭng kna Y-Pôl mtă mtăn kơ Y-Timôthê tŭ klei knap mñai kyua Klei Mrâo Mrang Jăk hŏng hdră êlan “lŏ bi mrâo klei Aê Diê brei” čiăng dưi mâo sa “mngăt ktang” (êlan 6-7). Hŏng mngăt ktang, drei amâo srăng huĭ amâodah đăo đing kơ Khua Yang tơdah tŭ klei knap mñai, ƀiădah srăng jhŏng dôk kjăp hlăm klei sĭt nik, čiăng ăt ngă nanao bruă Aê Diê jao. Mđrăm mbĭt anăn drei “hlăm klei myang Aê Diê” čiăng dôk hdĭp kyua Klei Mrâo Mrang Jăk Ñu (êlan 8). Khua Yang yơh srăng thiăm brei klei ktang leh anăn kơrŭ drei dưi hgao jih klei lông dlăng klei đăo.
Khua ƀĭng kna Y-Pôl pô, tơdah čih klei mtă mtăn kơ anak ñu hlăm mngăt jing Y-Timôthê, tŭ klei knap mñai kyua Klei Mrâo Mrang Jăk, ñu pô ăt dôk tŭ klei arăng krư̆ kđăl hlăm mnă kyua Klei Mrâo Mrang Jăk mơh (êlan 8). Rup bi hmô kơ klei tŭ klei knap mñai kyua Klei Mrâo Mrang Jăk mơ̆ng khua ƀĭng kna Y-Pôl ba kơ drei lu klei hriăm yuôm bhăn. Ñu brei ƀuh, tŭ klei knap mñai kyua Klei Mrâo Mrang Jăk amâo djŏ jing klei hêñ ôh, ƀiădah jing sa klei pap, sa klei jăk jĭn kyua klei yuôm bhăn Klei Mrâo Mrang Jăk. Wăt tơdah tŭ lu klei arăng ngă jhat ƀiădah khua ƀĭng kna Y-Pôl ăt dôk sĭt suôr leh anăn gĭr nanao hŏng klei iêô kơ bruă Klei Mrâo Mrang Jăk, tơl tuč klei hdĭp ñu dưi lač hŏng klei klă snei, “Kâo bi blah leh klei bi blah jăk, anôk kâo êran tuč leh, kâo djă pioh leh klei đăo.” (II Y-Timôthê 4:7). Hmăng hmưi kơ grăp čô phung đăo drei ăt hŏng klei mơak tơdah dưi tŭ klei knap mñai kyua Klei Mrâo Mrang Jăk, leh anăn čuăn ai tiê dôk sĭt suôr tơl knhal tuč hlăm bruă hiu hưn Klei Mrâo Mrang Jăk kơ jih jang mnuih hlăm jih jang boh klei truh.
Si knuih drei dôk bi êdah tơdah tŭ klei knap mñai kyua Klei Mrâo Mrang Jăk?
Wah lač: Ơ Khua Yang, lač jăk kơ Khua Yang kyua klei pap dưi mă bruă kơ Ih, leh anăn mâo kdrêč hlăm bruă Klei Mrâo Mrang Jăk. Đru kâo jing phung hưn bi sĭt klei jhŏng kah mbha Klei Mrâo Mrang Jăk, wăt tơdah tŭ klei knap mñai leh anăn dôk sĭt suôr nanao hŏng klei iêô kơ bruă Klei Mrâo Mrang Jăk tơl truh knhal tuč. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
