Klei Aê Diê Blŭ: I Y-Pêtrôs 3:13-14
Êlan kliăng: “Ƀiădah wăt tơdah diih tŭ klei knap mñai kyua klei kpă, diih srăng mâo klei jăk jĭn. Đăm huĭ kơ klei diñu huĭ ôh, kăn rŭng răng rei.” (I Y-Pêtrôs 3:14)
Klei êmuh ksiêm mĭn: Ya klei khua ƀĭng kna Y-Pêtrôs čiăng lač tơdah ñu mtă mtăn kơ phung đăo “Tơdah diih hur har kơ klei jăk, hlei pô srăng ngă jhat kơ diih”? Si ngă tŭ klei knap mñai kyua klei kpă jing mâo klei jăk jĭn? Si diih ngă čiăng đăm mâo klei huĭ ôh tơdah hdĭp kơ Khua Yang?
Čih hră kơ phung đăo hlăm gưl ênuk tal êlâo hĭn, dôk tlă anăp hŏng lu klei arăng ngă jhat, klei dleh dlan, khua ƀĭng kna Y-Pêtrôs mtă mtăn kơ diñu: “Tơdah diih hur har kơ klei jăk, hlei pô srăng ngă jhat kơ diih?” (êlan 13). “Hur har” mblang jing khăp čiăng êdi mi, êpa mhao, jih ai tiê. Pô đăo kơ Khua Yang mâo klei iêô mthưr brei săn asei kơ klei kpă, gưt ngă tui si Klei Blŭ Khua Yang mtô leh anăn hdĭp mpŭ mni kơ Ñu. Tơdah lač “hlei pô srăng ngă jhat kơ diih?”, khua ƀĭng kna Y-Pêtrôs amâo lui ôh klei boh sĭt phung đăo dôk tŭ klei arăng dôk dơ̆ng ƀơ̆ng huă amâo kpă. Klei khua ƀĭng kna čiăng lač tinei jing, wăt tơdah anak mnuih dôk dơ̆ng ƀơ̆ng huă hŏng phung anak ƀuôn sang Aê Diê jhat snăk dưn, ăt kăn mâo pô dưi ngă jhat kơ drei rei tơdah Khua Yang amâo brei klei dưi kơ diñu, “Tơdah Aê Diê dôk tĭng kơ drei, hlei pô dưi bi kdơ̆ng hŏng drei?” (Rôm 8:31b). Hlăm klei dưi dlông hĭn leh anăn tui si klei čiăng jăk mơ̆ng Khua Yang, “Snăn, drei thâo Aê Diê mjing jih jang klei jing jăk kơ phung khăp kơ Aê Diê,” (Rôm 8:28a).
Phung ƀuôn sang Aê Diê mâo klei rơ̆ng, tơdah kyua klei kpă ƀiădah tŭ klei knap mñai snăn srăng mâo klei jăk jĭn. Klei jăk jĭn tinei amâo djŏ jing klei jăk mơak hlăm kđeh ôh ƀiădah jing klei pap Aê Diê msĕ si jih klei Khua Yang Yêsu mtô kơ klei jăk jĭn hlăm klei mtô ti dlông čư̆ (Y-Mathiơ 5:1-10). Anăn jing klei pap leh anăn klei KhuaYang dôk mbĭt čiăng đru kơrŭ leh anăn bi juh drei hlăm klei lông dlăng. Tơdah tŭ klei knap mñai kyua klei kpă, drei dưi mâo kdrêč mbĭt hŏng Yang Krist hlăm klei Ñu tŭ klei knap mñai, leh anăn dưi djiêl klei khăp prŏng êlam Ñu săn asei mlei pioh brei kơ drei.
Tơdah dôk bi mĭn kơ dŭm klei dleh dlan, hŏng ai tiê klei jing mnuih yang đar năng ai drei srăng huĭ. Ƀiădah brei drei kjăp ai tiê tơdah thâo mâo Khua Yang dôk mă bruă kyua klei tŭ dưn kơ drei leh anăn kyua klei guh kơang Ñu. Drei amâo lŏ huĭ amâodah rŭng răng ôh ti anăp phung anak mnuih, kyuadah klei jhat kjham kjhuê̆ hĭn diñu dưi ngă kơ drei knŏng ngă jhat kơ asei mlei kđeh. Khua Yang Yêsu lač leh, “Đăm huĭ ôh kơ phung dưi bi mdjiê asei mlei ƀiădah amâo dưi bi mdjiê mngăt, ƀiădah huĭ bĕ kơ Pô dưi bi mdjiê mngăt wăt asei mlei hlăm war pui.” (Y-Mathiơ 10:28). Brei drei huĭ kơ Khua Yang hrô kơ huĭ kơ mnuih. Ăt dôk hdĭp bĕ kơ Khua Yang, tui tiŏ klei ngă bi mơak kơ Ñu, amâo uêñ ôh kơ ya klei drei dôk tlă anăp kyuadah klei mưn pioh brei kơ drei jing prŏng snăk.
Ya mta klei drei dưi ngă kơ Khua Yang hruê anei, wăt tơdah thâo mơh năng ai srăng tuôm hŏng klei arăng ngă jhat?
Wah lač: Ơ Khua Yang, bi mni kơ Khua Yang kyua Klei Ih Blŭ mtô, tŭ klei knap mñai kyua klei kpă srăng mâo klei jăk jĭn. Akâo Khua Yang thiăm klei ktang čiăng kơ kâo dưi tlă anăp hŏng klei arăng ngă jhat, leh anăn hmiêt mkăp tŭ klei knap mñai kyua klei kpă. Brei kâo hur har ngă bruă jăk, dôk hdĭp mpŭ mni leh anăn bi êdah klei khăp Ih ti krah jih jang mnuih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
