Mathais 15:29-31
Nqe cim
“Muaj neeg coob coob tuaj cuag nws, lawv coj tej neeg uas qhuav tes qhuav taw, digmuag, cegtawv, hais tsis tau lus thiab cov neeg uas muaj mob ntau leej tuaj tso rau ntawm Yexus kotaw; thiab Yexus kho lawv txhua tus zoo huv tibsi.” (Mathais 15:30).
Lus nug rau sawvdaws xav:
– Cov neeg coob coob tuaj cuag tus Tswv yog cov neeg twg?
– Lub homphiaj lawv tuaj cuag tus Tswv yog dabtsi?
– Qhov uas tus Tswv kho lawv tej mob zoo qhia tawm tus Tswv yog tus zoo li cas?
– Peb siv zaj kawm no rau yus thiab Pawg Ntseeg zoo li cas?
Tomqab uas Tswv Yexus kho tus pojniam Kana-as tus ntxhais zoo lawm, Nws taug ntug Hiavtxwv Kalilais mus rau pem roob thiab zaum qhov ntawd, lub sijhawm ntawd muaj neeg coob coob tuaj cuag Nws. Raws li Malakaus 7:31 qhia paub cheebtsam av uas tus Tswv mus no yog cheebtsam Dekapaulis uas yog cheebtsam lwm haivneeg nyob, yog li cov neeg coob coob tuaj cuag Tswv Yexus yog lwm haivneeg. Thaum lawv tuaj cuag tus Tswv, “lawv coj tej neeg uas qhuav tes qhuav taw, digmuag, cegtawv, hais tsis tau lus thiab cov neeg uas muaj mob ntau leej tuaj tso rau ntawm Yexus kotaw.” (nqe 30), lawv xav tau tus Tswv kho lawv tej mob kom zoo ib yam li Nws twb kho tus pojniam Kana-as tus ntxhais zoo thiab.
Txawm yog Tswv Yexus hais tias qhov uas Nws los ua haujlwm tsis yog ua rau lwm haivneeg, yog ua rau haivneeg Yudais, los Nws yeej hmov tshua, hlub thiab kho lwm haivneeg uas tsis yog cov neeg Yudais thiab. Tus Tswv lub siab hlub tau Timthawj Mathais qhia tawm: “Yexus kho lawv txhua tus zoo huv tibsi.” (nqe 30). Ib qho uas xav tsis thoob yog tom qab uas pom cov neeg muaj mob tau tus Tswv kho zoo, cov neeg coob coob uas yog lwm haivneeg puavleej ua cov Yixalayees tus Vajtswv tsaug. Qhov uas tus Tswv kho lwm haivneeg tej mob qhia paub tus Tswv lub siab hlub thiab qhia tshwm Nws txoj koob hmoov pub dawb tsis muaj nrim, nws tsis yog hauv cov Yixalayees xwb tiamsis thoob qab ntuj.
Tswv Yexus twb qhia txog txojkev txiav txim thaum kawg hauv Mathais 25:3-46 hais tias cov neeg uas ntseeg tus Tswv tseeb, tau muab piv zoo ib yam li cov yaj, lawv muaj lub siab hlub thiab pab cov neeg nyob ibncig xws li txomnyem, pluag, rau qhov thaum ua li ntawd kuj yog ua rau tus Tswv. Cov neeg qia dub, siab nqaim, tsis hlub lwm tus, tsis muaj kev ntseeg tus Tswv, tau muab piv zoo ib yam li cov tshis, lawv niaj hnub nrhiav vimchiv hais daws lawv zaj uas hlub tsis tau lwm tus nyob ibncig. Ua tej haujlwm zoo tsis yog qhov uas yuav pab tau kom dim, tiamsis tus neeg muaj kev ntseeg tus Tswv yuav tsum ua lub neej qhia tswm lub siab hlub txhua tus (Yakaunpaus 2:14-26). Nimno, lub siab hlub, hmov tshua thiab pab cov tibneeg txomnyem cheemtsum muaj nyob hauv Vajtswv Pawg Ntseeg. Peb tsis yog hlub tshua cov neeg uas txheebze peb xwb, tiamsis yuav tsum qhia tshwm txojkev hlub txhua tus uas tabtom raug kev nyuaj siab, txomnyem, muaj mob, tsis muaj noj haus thiab ua li ntawd yog pab kom lawv zeem paub tus Tswv txojkev hlub thiab ua Vajtswv tsaug.
Thov Vajtswv,
Tus Tswv, thov Koj pab kom nyuam yaus paub hlub Koj thiab hlub txhua tus. Thov Koj pab kom nyuam yaus ua tau lub neej qhia tawm txojkev hlub pab cov neeg txomnyem uas Koj cia nyob ibncig. Nyuam yaus tuav Tswv Yexus lub npe thov, Amees.
Peb puas tseem tabtom qhia tshwm lub siab hlub, pab cov neeg nyob ibncig peb zoo ib yam li Tswv Yexus hlub lawm tau?
Nyeem Vajluskub hauv peb lub xyoo: Khiavdim 26
Kênh Youtube BHKTHN:
