Tes Haujlwm 1:4-11
Nqe cim:
“Cov neeg Kalilais, nej sawv saib saum ntuj ua dabtsi? Yexus tus uas Vajtswv nyuam qhuav coj mus saum ntuj lawm, nws yeej yuav rov qab los ib yam nkaus li uas nej pom nws mus ntag.” (Tes Haujlwm 1:11)
Lus nug rau sawvdaws xav:
- Phau Tes Haujlwm piav txog Tswv Yexus kev mus saum ntuj li cas?
- Cov thwjtim tau qhuab ntuas tsis txhob sawv ntsia saum ntuj tiamsis yuav tsum ua dabtsi?
- Niaj hnub nimno, peb yuav tsum ua tus Tswv tes haujlwm ntxiv mus licas?
Tswv Yexus tau los rau hauv lub ntiajteb, raug ntsia saum ntoo khaub lig, thiab raug muab faus rau hauv lub ntxa tau peb hnub. Tiamsis hnub peb, Nws sawv rov qab los thiab tau tshwm rau coob leej pom nyob hauv plaub caug hnub. Tus Tswv txoj haujlwm cawm tibneeg ntiajteb twb tiav lawm. Plaub caug hnub tom qab uas sawv rov los, Tswv Yexus tau ntsib cov thwjtim thiab qhia tej lus tseem ceeb kawg rau lawv, tomqab ntawd Nws ya mus saum ntuj, muaj ib tauv huab los roos ua rau cov thwjtim tsis pom Nws lawm. Thaum cov thwjtim tseem sawv ntsia ntsoov, txawm muaj ob tug txiv neej hnav tsoos dawb tshwm los thiab hais rau lawv tias: “Cov neeg Kalilais, nej sawv saib saum ntuj ua dabtsi? Yexus tus uas Vajtswv nyuam qhuav coj mus saum ntuj lawm, nws yeej yuav rov qab los ib yam nkaus li uas nej pom nws mus ntag” (nqe 11).
Lo lus “saib” lossis “ntsia ntsoov” txhais tau hais tias ntsia nrog kev xav tsis thoob thiab zoo li tseem tos tej yam tshwm sim ntxiv. Thaum cov thwjtim tseem sawv ntsia ntsoov, ob tug timtswv tau los txhawb lawv lub zog hais tias Tswv Yexus mus saum ntuj lawm, tiamsis Nws yuav rov qab los tos lawv mus nrog Nws nyob (Yauhas 14:1-3). Thaum tseem tos Tswv Yexus rov qab los, peb tsis txhob tsuas sawv ntsia ntuj xwb, tiamsis yuav tsum tig los saib tej neeg nyob ib ncig, ua tus Tswv tes haujlwm txuas ntxiv, ua timkhawv rau lawv txog tus Tswv hauv Vaj Ntsujplig lub hwjchim. Thaum Tswv Yexus ya mus saum ntuj lawm, yog lub sijhawm tus Tswv cov menyuam txhua tus pib txais lub luag haujlwm coj tus Tswv txoj kev hlub cawmdim mus rau txhua haivneeg, tseb txojkev cia siab tau txojsia ibtxhis rau txhua tus. Vim peb lub neej hauv ntiajteb no tsuas yog ib ntus xwb, peb yuav tsum ntsia ntsoov lub neej uas Vajtswv npaj tseg rau saum ntuj ceeb tsheej, thiab qhia rau sawvdaws paub txog qhov zoo no.
Nco txog Tswv Yexus mus saum ntuj, peb txhua tus yuav tsum ua Nws tes haujlwm txuas ntxiv mus, tsis yog tsuas “saib saum ntuj” xwb, tiamsis yuav tsum ua Vajtswv tes haujlwm raws li Nws samhwm hais tias: “Tiamsis thaum Vaj Ntsujplig tus Dawbhuv los nrog nej nyob lawm, nws yuav pub hwjchim rau nej, thiab nej yuav ua timkhawv qhia kuv zaj mus thoob plaws hauv lub nroog Yeluxalees, hauv lub xeev Yudas, hauv lub xeev Xamalis thiab mus txog qab ntuj kawg.” (nqe 8). Tswv Yexus mus saum ntuj kuj yog ib lub zog loj heev pab peb ua neej tsis vamkhom tej khoom ntiajteb yog tej yam uas yuav ploj mus raws caijnyoog, tiamsis ntsia ntsoov mus rau qhov chaw uas tus Tswv npaj tseg rau peb. Thov Vajtswv pab peb ua tiav lub luag haujlwm no thaum peb tseem ua neej nyob hauv ntiajteb mus txog hnub tus Tswv rov qab los, peb yuav tau nrog Nws nyob mus ib txhis hauv qhov chaw tau zoo.
Thov Vajtswv,
Tswv Yexus, nyuam yaus ua Koj tsaug uas Koj tau tuag theej nyuam yaus tej kev txhaum, thiab Koj twb mus saum ntuj tu chaw tseg rau nyuam yaus lawm. Thov Koj pab kom nyuam yaus tsis txhob ntshaw lub ntiajteb tiamsis tas siab saib ntsoov mus rau lubneej ibtxhis, tshajtawm Koj lub npe kom coob leej los txais kev cawmdim. Nyuam yaus tuav Yexus Khetos lub npe thov, Amees.
Kev nco txog Tswv Yexus mus saum ntuj puas pab peb dim ntawm tej kev khi hauv ntiajteb? Peb tabtom ua raws li Tswv Yexus tej lus samhwm licas?
Nyeem Vajluskub hauv peb lub xyoos: Yaxayas 27
Kênh Youtube BHKTHN:
