Klei Aê Diê Blŭ: Bruă Phung Khua Ƀĭng Kna 1:4-11
Êlan kliăng: “Ơ phung mnuih čar Galilê, si ngă diih dôk dơ̆ng dlăng kơ adiê lĕ? Yêsu anei, Pô Aê Diê pŭ ba leh kơ adiê mơ̆ng diih, srăng lŏ hriê msĕ si diih ƀuh Ñu đĭ kơ adiê mơh.”” (Bruă Phung Khua Ƀĭng Kna 1:11)
Klei êmuh ksiêm mĭn: Si Hdruôm hră Bruă Phung Khua Ƀĭng Kna čih kơ klei Khua Yang Yêsu đĭ wĭt kơ adiê? Hrô kơ dôk dlăng amâo kƀreh ală kơ Yêsu đĭ phă adiê, si klei mñă brei phung ƀĭng kna ngă? Si grăp čô drei hruê anei brei lŏ dơ̆ng čuê bruă klam Khua Yang?
Khua Yang Yêsu hriê ti lăn ala, tŭ klei djiê ti kyâo bi kal, arăng dơr Ñu hlăm msat tlâo hruê, ƀiădah truh hruê tal tlâo Ñu kbiă lŏ hdĭp leh anăn bi êdah kơ lu mnuih ƀuh hlăm pă pluh hruê. Bruă klam Ñu bi mtlaih anak mnuih ti lăn ala dưi bi leh, hruê tal pă pluh leh kbiă lŏ hdĭp, Khua Yang Yêsu mâo leh klei bi tuôm čiăng mtă mtăn phung ƀĭng kna klei blŭ knhal tuč, leh anăn Khua Yang đĭ wĭt kơ adiê, mâo knam guôm Ñu mơ̆ng phung ƀĭng kna. Hlăk êjai diñu dôk tui dlăng, mâo dua čô êkei hơô ao jhung kô̆ dôk dơ̆ng giăm diñu lač: “Ơ phung mnuih čar Galilê, si ngă diih dôk dơ̆ng dlăng kơ adiê lĕ? Yêsu anei, Pô Aê Diê pŭ ba leh kơ adiê mơ̆ng diih, srăng lŏ hriê msĕ si diih ƀuh Ñu đĭ kơ adiê mơh” (êlan 11).
Boh blŭ “dôk dlăng amâo kƀreh ală” jing dlăng kơ sa anôk hŏng klei bi kngăr. Ti anăp klei anăn, dua čô dĭng buăl jăk bi juh diñu snei Khua Yang Yêsu đĭ wĭt kơ adiê ƀiădah Ñu srăng lŏ hriê čiăng drông phung tui hlue Ñu wĭt dôk hŏng Ñu (Y-Yôhan 14:1-3). Hlăk êjai dôk guôn, đăm ôh hmăng kơ dlăng hlăm adiê ƀiădah brei dlăng jŭm dar pô čiăng lŏ čuê bruă Khua Yang Yêsu, jing pô hưn bi sĭt kơ Khua Yang kơ digơ̆ hlăm klei myang Yang Mngăt Jăk msĕ si klei Ñu mtă. Khua Yang đĭ wĭt kơ adiê jing hlăk phung ƀuôn sang Aê Diê mphŭn mă bruă klam hiu hưn ba klei khăp bi mtlaih Aê Diê truh kơ jih jang phung ƀuôn sang, ba rah klei čang hmăng hdĭp kơ grăp čô mnuih kyua klei hdĭp ti lăn ala đuĕ pral, brei drei mđing kơ klei hdĭp Khua Yang mprăp leh hlăm Ƀuôn Ala Mtao dôk lă lar leh anăn hiu hưn kơ jih jang mnuih thâo kơ klei yuôm bhăn anei.
Bi hdơr klei Khua Yang Yêsu đĭ wĭt kơ adiê, grăp čô drei brei lŏ čuê bruă klam Khua Yang, amâo djŏ “dôk dlăng amâo kƀreh ală kơ adiê” ƀiădah brei ngă bruă Khua Yang jao, “Ƀiădah tơdah Yang Mngăt Jăk truh kơ diih; diih srăng mă tŭ klei myang leh anăn diih srăng jing phung hưn bi sĭt kơ kâo hlăm ƀuôn Yêrusalem, hlăm tar čar Yuđa, čar Samari, leh anăn tơl truh ti knhal lăn ala” (êlan 8). Khua Yang đĭ wĭt kơ adiê ăt jing klei mđĭ ai prŏng snăk đru drei amâo knang kơ mnơ̆ng dhơ̆ng hlăm lăn ala anei jing mnơ̆ng djăl pral luč hlue thŭn mlan, ƀiădah mđing kơ klei hdĭp hlŏng lar anôk Khua Yang dôk mprăp brei sa anôk kơ drei. Akâo kơ Khua Yang đru drei bi leh bruă klam hlăm dŭm hruê adôk ti lăn ala truh kơ hruê Khua Yang lŏ hriê drei dưi nao dôk mbĭt hŏng Ñu jăk mơak hlŏng lar.
Bi hdơr klei Khua Yang Yêsu đĭ wĭt kơ adiê đru drei tlaih mơ̆ mơ̆ng klei kă kơ̆ng hơăi mang ti lăn ala anei? Si Drei dôk ngă bruă klam Aê Diê jao?
Wah lač: Ơ Khua Yang Yêsu, kâo bi mni kơ Ih djiê hrô leh čiăng bi tui kâo, Ih ăt đĭ wĭt leh kơ adiê čiăng mprăp sa anôk hlŏng lar kơ kâo. Akâo kơ Ih đru kâo amâo khăp kơ mnơ̆ng dhơ̆ng, klei hing ang lăn ala anei ƀiădah jih ai tiê mđing kơ klei hdĭp lă lar hiu hưn Anăn Ih čiăng ƀrư̆ hruê mâo lu hĭn mnuih mă tŭ klei Khua Yang bi mtlaih. Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 27
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
