Pajlus 22:1-2
Nqe cim zaj kawm:
“Tus npluanuj thiab tus pluag qhov uas zoo sib thooj yog li no: nkawd puavleej yog tus TSWV tsim huv tibsi” (Pajlus 22:2).
Lus nug rau sawvdaws xav:
– Vajntxwv Xalumoos qhia paub txog tus npluanuj thiab tus pluag muaj yam dabtsi sib thooj?
– Tsis zeem paub yam no, peb yuav yoojyim ua txhaum li cas rau lwm tus?
– Nqe Pajlug no pab tau koj li cas hauv tes haujlwm saib xyuas Pawg Ntseeg?
Vajntxwv Xalumoos muab ob yam uas neeg ntshaw los sib piv thiab qhia hais tias tsimnyog yuav xaiv yam twg ua ntej, yam tsimnyog xaiv ua ntej yog “koob meej” tom qab mam txog “kev npluanuj” (nqe 1), txawm li ntawd los hauv nqe 2, vajntxwv Xalumoos tsis hais txog “kev npluanuj” los ntau nqi rau ib tus tibneeg vim nws hais tias “tus npluanuj” thiab “tus pluag” puavleej muaj nqis ib yam xwb, ob tug puavleej yog Vajtswv tsim huv tibsi. Yog li ntawd, qhov uas sib hwm thiab ib tug ua ncaj ncees rau ib tug yog los ntawm qhov uas Vajtswv tsim sawvdaws zoo tib yam, vim tsis paub li no, tibneeg ib leeg thiaj saib tsis taus ib leeg.
Vajntxwv Xalumoos thiab Timthawj Paulus puavleej qhia hais tias, ntawm seem tibneeg ntiajteb kev xav, cov neeg npluanuj thiab cov neeg pluag muaj meejmom sib txawv (Pajlus 22:7; Efexus 6:9) tiamsis ntawm Vajtswv lub xub ntiag txhua tus puavleej sib txig sib luag thiab yuavtsum tau sib hwm. Yog paub li no tus npluanuj yuav tsis khav theeb rau nws txoj kev npluanuj thiab tus pluag los yuav tsis txaj muag rau nws txoj kev pluag. Cia li nco ntsoov hais tias, Vajtswv tsis ntaus nqi rau txhua yam uas peb muaj tiamsis Vajtswv yuav ntaus nqi rau peb tus cwjpwm uas ua rau Vajtswv thiab puas mloog raws li Nws Txojlus qhia xwb (Mathais 7:24-27).
Ua ntej ntawd, nyob rau hauv Pajlus 14:31, vajntxwv Xalumoos qhia tseeb hais tias, yog peb caij tsuj cov neeg pluag ces yog peb ua saib tsis taus Vajtswv tus uas tsim lawv, tiamsis yog peb ua siab dawb siab zoo rau cov neeg pluag ces yog peb tabtom ua zoo rau Vajtswv ntag.
Yakaunpaus kuj qhia ib yam li ntawd thiab, yog peb muaj txoj kev tsis ncaj ncees thiab tsis sib hwm nyob rau hauv Pawg Ntseeg, nyob rau lub tebchaws ntawm kev npluanuj thiab kev pluag, ces yog xaiv ntsej muag thiab yog ua kev txhaum lawm (Yakaunpaus 2:1-13). Yakaunpaus tej lus qhia ua rau peb pom hais tias, hauv Pawg Ntseeg yog muaj txoj kev xaiv ntsej muag ces yuav tau tso tseg tus cwjpwm zoo li ntawd. Niaj hnub nimno, muaj ntau Pawg Ntseeg hwm tus uas npluanuj, tus txawjntse, tus muaj meejmom siab heev dua li cov neeg pluag txomnyem, cov tsis muaj kev txawj thiab cov neeg ua liajteb. Vajtswv siv peb txhua tus nyias muaj nyias meejmom rau hauv Pawg Ntseeg raws li cov choj nyiaj uas tus Tswv pub, tiamsis yog yuav cia kom Pawg Ntseeg nyob muaj quas ces yuav tsum muaj kev sib hwm nyob hauv kev ua neej.
Peb cia li tshuaj xyuas saib peb puas tau hwm txhua tus hauv Pawg Ntseeg sib txig sib luag lawm los tsis tau? Tig los nug yus tus kheej: Kuv saib cov ntseeg pluag txomnyem hauv Pawg Ntseeg puas yog lub nra hnyav rau Pawg Ntseeg? Yog tus ntseeg npluanuj thiab tus ntseeg pluag puavleej muaj kev cheemtsum zoo thooj tib yam, kuv yuav pab leejtwg ua ntej? Kuv puas saib taus Xibhwb thiab tus tu lub tuam tsev li cas?
Thov Vajtswv
Vajtswv, Nyuam yaus ua Koj tsaug uas Koj tsim peb raws li Koj tus yam ntxwv. Thov pab nyuam yaus ua neej paub hlub lwm tus thiab paub hwm txhua tus huv tibsi. Nyuam yaus tuav Tswv Yexus Khetos lub npe thov, Amees.
Peb puas hwm txhua tus huv tibsi zoo ib yam lawm tsis tau?
Nyeem Vajluskub hauv peb xyoos: 1Kauleethaus 7
Kênh Youtube BHKTHN:
https://www.youtube.com/c/bhkthn
