Klei Aê Diê Blŭ: Klei Bi Hriêng 22:1-2
Êlan kliăng: “Phung mdrŏng leh anăn phung ƀun ƀin bi mâo sa klei mbĭt: Yêhôwa mjing jih diñu dua” (Klei Bi Hriêng 22:2)
Klei êmuh ksiêm mĭn: Mtao Y‑Salômôn brei thâo, ya sa klei phung mdrŏng leh anăn phung ƀun ƀin mâo mbĭt? Ya klei soh čhuai srăng mâo hlăm klei dôk dơ̆ng ƀơ̆ng huă hŏng arăng tơdah amâo thâo săng ôh klei anei? Si êlan Klei Bi Hriêng anei đru ih hlăm bruă kiă kriê Phung Sang Aê Diê?
Mtao Y‑Salômôn bi msĕ dua mta êlan klei mĭn arăng khăng yua čiăng mkă yap sa čô mnuih tui si hnơ̆ng êlâo êdei, klei anăn jing “klei hing ang jăk” êlâo hĭn, êdei anăn kơh truh kơ “lu ngăn drăp” (êlan 1), ƀiădah lĕ, hlăm êlan 2, ñu amâo lač ôh kơ “ngăn drăp” jing msĕ si hnơ̆ng čuăn pioh mkă, kyuadah ñu lač snei “phung mdrŏng” amâodah “phung ƀun ƀin” mâo ênoh yuôm msĕ sơăi, jih dua jing mnơ̆ng Aê Diê hrih mjing sơăi. Snăn, atur kơ klei mpŭ leh anăn klei mtăp mđơr dôk hlăm klei hrih mjing, leh anăn kyua amâo thâo săng ôh klei anei snăn hlăm ƀuôn sang amâo tuôm dưi lăm lui ôh klei amâo mtăp mđơr.
Wăt mtao Y‑Salômôn leh anăn khua ƀĭng kna Y‑Pôl lač msĕ, tĭng kơ klei hdĭp hlăm ƀuôn sang, mâo yơh klei mdê ti krah phung mdrŏng leh anăn phung ƀun ƀin (Klei Bi Hriêng 22:7; Êphêsô 6:9) ƀiădah ti anăp Aê Diê, jih jang mnuih jing msĕ sơăi leh anăn brei mâo klei mpŭ msĕ sơăi. Thâo săng klei anei, đru phung mdrŏng amâo mâo mgao ôh kyua klei mdrŏng sah ñu, leh anăn phung ƀun ƀin kăn hêñ rei kyua klei ñu ƀun ƀin. Brei drei hdơr snei, Aê Diê amâo yap mnuih tui si mnơ̆ng mnuă drei mâo ti lăn ala anei ôh, ƀiădah tui si knhuah hdĭp drei hŏng Ñu leh anăn hŏng Klei Aê Diê Blŭ (Y‑Mathiơ 7:24-27).
Êlâo kơnăn, hlăm Klei Bi Hriêng 14:31, mtao Y‑Salômôn ăt lŏ mñă mơh tơdah drei ktư̆ juă leh anăn mưč mač phung ƀun ƀin jing drei dôk dlao wač kơ Aê Diê, Pô hrih mjing leh digơ̆, ƀiădah tơdah drei dôk dơ̆ng ƀơ̆ng huă jăk hŏng phung ƀun ƀin, klei anăn jing drei dôk ngă jăk hŏng Khua Yang pô yơh.
Y‑Yakơ ăt lač ktang mơh kơ klei dôk dơ̆ng ƀơ̆ng huă amâo mtăp mđơr leh anăn amâo mâo klei bi mpŭ hlăm Sang Aê Diê kna hlue si klei mdrŏng klei ƀun amâodah hlue si boh klei jing hlăm ƀuôn sang, ñu lač snei knhuah hdĭp dlăng kơ mnuih mdê mdê jing klei ngă soh (Y‑Yakơ 2:1-13). Klei Y‑Yakơ mtô lač brei ƀuh dlăng mdê mdê hlăm hdơ̆ng phung đăo jing mâo êdi, kyuanăn brei lăm lui hĕ klei anăn. Boh klei sĭt, lu Sang Aê Diê adôk dlăng kơ phung mdrŏng, hriăm lu, mâo anôk bruă dlông hlăm ƀuôn sang jing yuôm hĭn, mpŭ hĭn kơ phung ƀun ƀin mâo thâo hră mơar, amâodah mă bruă jơ̆ng kngan. Khua Yang yua grăp čô mâo anôk bruă mdê mdê hlăm Phung Sang Aê Diê tui si talăng Aê Diê brei, ƀiădah čiăng kiă kriê jăk Phung Sang Aê Diê snăn klei mpŭ kơ jih jang mnuih jing sa mta klei amâo dưi kƀah ôh.
Brei drei ksiêm dlăng wĭt ai tiê drei pô, drei mpŭ kơ jih jang mnuih hlăm Sang Aê Diê msĕ mđơr sơăi mơ̆ hŏng klei êmuh drei pô: si ngă kâo dlăng kơ phung đăo ƀun ƀin, dôk hdĭp hlăm pưk tĭ jing klei gui ktrŏ kơ Sang Aê Diê drei mơ̆? Dôk ti anăp sa klei akâo êmuh msĕ mơ̆ng sa čô đăo mdrŏng hŏng sa čô đăo ƀun, kơ hlei pô kâo wĭt lač êlâo hĭn? Si ngă kâo êmuh čhưn pô kiă dlăng Sang Aê Diê hŏng khua pô mtô kiă Sang Aê Diê msĕ sơăi mơ̆? …
Si ngă drei mpŭ kơ jih jang mnuih msĕ mđơr sơăi mơ̆?
Wah lač: Ơ Khua Yang, bi mni lač jăk kơ Khua Yang hrih mjing leh grăp čô hmei tui si rup Ih pô. Akâo Khua Yang brei kâo dôk hdĭp thâo khăp leh anăn mpŭ kơ ayŏng amai adei pô. Kâo wah lač hlăm anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Kôrantô 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
