Pajlug 22:13
Nqe cim zaj kawm:
“Tus neeg tubnkeeg nyob hauv tsev xwb, nws hais tias yog tawm mus nraum zoov tsov ntxhuav yuav tom” (Pajlus 22:13).
Lus nug rau sawvdaws xav:
– “Tus neeg tubnkeeg” muab dabtsi los tav kev tsis kam ua haujlwm?
– Niaj hnub nimno koj muab dabtsi los tav kev tsis kam koom nrog lwm tus ua Vajtswv haujlwm?
– Txoj kev nquag thiab siv zog ua haujlwm yuav zoo li cas rau hauv txoj kev tswj Pawg Ntseeg?
“Tus neeg tubnkeeg hais tias, yog tawm mus nraum zoov tsov ntxhuav yuav tom” ntawd yog ib lolus hais kom zoo luag, yeej tsis muaj ib tus tsov ntxhuav twg yuav nyob rau hauv cov Yixalayees tej nroog li. Tej zaum yog ib lo lus uas tus neeg tubnkeeg xav hais daws nws kev tubnkeeg tsis xav ua haujlwm xwb. “Tus neeg tubnkeeg” kuj yog ib tus uas muaj lub siab yau, nws tsis xav ua haujlwm, nws hais lus dag thiab xav txog zaj ub zaj no los tav tsis kam ua nws tes haujlwm uas yog nws feem xyuam. “Tus neeg tubnkeeg” lam hais dag hais tias ntshai raug tua tuag thaum tawm sab nraum, ntawd yog ib txoj kev ntshai tsis muaj tseeb, tiamsis nws txaus siab ua neej tsis muaj qab haus dab tsi nyob rau hauv vajtse, ntawd thiaj yog yuav raug tua tuag nyob sab hauv lub siab thiab yog txoj kev puastsuaj tiag tiag.
Txoj kev tubnkeeg, tej zaum kuj muaj nyob rau hauv kev ua Vajtswv tes haujlwm, qee tus ua neej tsis muaj qab hau vim ntshai cov “tsov ntxuav uas saib tsis pom”, xws li ntshai poob dag zog, ntshai poob sijhawm, ntshai lwm tus hais, ntshai tab kaum, ntshai tsis muaj txaus peevxwm, ntshai ua tsis tiav… Cov “tsov ntxhuav” no tua tsis tau peb tuag tiamsis yog tsis kam ua Vajtswv tes haujlwm vim tej ntawd xwb ces peb yuav raug tuag. Hauv peb lub siab yuav txeev muaj kev chim, kev xav phem rau lwm tus ntau zuj zus, peb yuav qaug zog ua Vajtswv haujlwm, yuav tsis muaj kev sib raug zoo nrog cov ntseeg sawvdaws, yuav ua rau peb ua tsis tau Vajtswv haujlwm ntxiv lawm.
Yuav muaj qee yam hem kom peb ntshai li ntawd tiag, ib yam li zaj xwm kaum ob tus tubtxib mus soj tebchaws Kana-as rov los. Lawv ntshai cov neeg loj, siab thiab muaj zog hauv tebchaws Kana-as heev, lawv hais tias peb yeej tsis muaj txaus zog tua yeej cov neeg Kana-as. Kalej kuj pom ib yam li lawv pom tiamsis nws hais txawv lawv hais tias, “peb yeej muaj zog txaus yuav tua yeej xwb” (Teev Npe 13:30-33). Cov tubtxib mus soj tebchaws no tsis nco qab lawm hais tias, Vajtswv twb pab lawv dim nram tebchaws Iziv los thiab muab lub tebchaws Kana-as rau lawv lawm, yog li ntawd lawv tsuas hais li lawv pom thiab lawv xav zoo li tus neeg uas tsis tau paub Vajtswv xwb. Peb muaj ntau tus tej zaum twb ntsib ntau yam hauv lub neej dhau los lawm, ua rau peb kov tsis yeej lossis ntau yam kev nyuaj nyob rau hauv kev ua Vajtswv haujlwm,… peb pom hais tias tej nyuag “tsov ntxhuav” uas hem peb yeej muaj tseeb tiag, txawm li ntawd los txhob hnov qab hais tias peb tus Vajtswv yeej muaj tseeb tiag tiag thiab, Vajtswv yog tus tabtom tswj tagnrho txhua yam thiab nrog tus uas Nws twb hu lawm mus ua ke.
Hauv kev tswj Pawg Ntseeg, yam tseemceeb yog peb ib leeg yuavtsum txhawb ib leeg lub zog, txawm yog yuav muaj teebmeem lossis nyob zoo, peb yuavtsum tas siab ua raws li Vajtswv siab nyiam, nquag thiab siv zog ua Vajtswv haujlwm li Vajtswv Txojlus qhia, cia siab rau Vajtswv ua tus pab, kom peb nthuav dav Vajtswv lub tebchaws nyob rau hauv lub ntiajteb no, mus pab coob tus paub Vajtswv thiab los ntseeg Nws.
Thov Vajtswv
Vajtswv, thov pab nyuam yaus ncaj ncees rau tes haujlwm uas koj muab tso rau nyuam yaus lawm, kom nyuam yaus nquag plias ua haujlwm pub rau Vajtswv Koj thiab Pawg Ntseeg. Thov pab kom nyuam yaus tiv taus txhua yam kev sim siab hauv txhua lub sijhawm kom rhais tau ruam mus ua Koj tes haujlwm. Nyuam yaus tuav Tswv Yexus Khetos lub npe thov, Amees.
Peb puas rau siab thiab siv zog ua txhua tes haujlwm uas Vajtswv muab tso rau peb lawm tau?
Nyeem Vajluskub hauv peb lub xyoos: I Kauleethaus 11:2-34
Kênh Youtube BHKTHN:
