Klei Aê Diê Blŭ: Klei Bi Hriêng 22:13
Êlan kliăng: “Mnuih alah lač, “Mâo sa drei êmông gu ti tač! Tơdah kâo kbiă, ñu srăng bi mdjiê kâo ti êlan.”” (Klei Bi Hriêng 22:13)
Klei êmuh ksiêm mĭn: Ya klei “Mnuih alah” lač čiăng hngah ngă bruă? Hruê anei ya klei ih hưn mdah čiăng hngah đru hlăm bruă Aê Diê? Tui si ih, ya bruă klam klei kriăng leh anăn klei gĭr hlăm bruă kiă kriê Phung Sang Aê Diê?
“Mâo sa drei êmông gu ti tač” năng ai jing sa klei mdưm pioh hngah čiăng tlao êdi kơ sa čô mâo klei mĭn snăn, kyuadah amâo mâo êmông gu mă mnuih ôh hlăm djăp ƀuôn prŏng Israel. Dưi lač, bi mĭn lu mta klei dleh mdê mdê jing klei phung alah khăp ngă. “Mnuih alah” ăt khăng jing mnuih blao mơh. Mnuih anăn amâo mơak ôh hŏng bruă ñu kyuanăn mplư ñu pô nanao, duah mčeh luar djăp mta klei mơal čiăng bi hgăm hĕ klei ñu amâo ngă bi leh ôh bruă ñu. Jing klei tlao djik djak êdi, êjai “mnuih alah” huĭ srăng djiê ti tač, sa klei huĭ amâo sĭt, ƀiădah čiăng hdĭp sa klei hdĭp amâo tŭ yua, anăn jing klei djiê mơ̆ng lam, sa klei ram rai sĭt nik.
Klei alah čiăng lač tinei ăt dưi mă yua hlăm klei mă bruă kơ Aê Diê mơh, lu mnuih dôk hdĭp leh sa klei hdĭp amâo tŭ yua kyuadah huĭ kơ phung “êmông gu hơăi mang” msĕ si, huĭ kơ êmăn, huĭ luč mmông, huĭ arăng blŭ, huĭ kpăk gun, huĭ amâo dưi bi mơak, huĭ amâo dưi ngă, huĭ dluh lĕ… Jih jang “êmông gu” anăn amâo bi mdjiê drei ôh, ƀiădah klei hngah mă bruă kơ Aê Diê msĕ snăn srăng bi mdjiê drei. Anăn jing klei phĭ hlăm ai tiê, klei phat kđi arăng ƀrư̆ hruê ƀrư̆ đĭ, klei êăt kba ƀrư̆ sui hruê hlăm bruă Aê Diê leh anăn hlăm klei bi mguôp hŏng phung ayŏng amai adei, srăng ngă kơ drei dleh hĭn êjai lŏ wĭt.
Mâo klei huĭ hyưt sĭt, msĕ si phung knuă nao ksiêm dlăng čar Kanaan lŏ wĭt. Diñu huĭ krưp kơ phung mnuih prŏng dlông, dleh dưi mblah, bi Y‑Kalep, ăt ƀuh ya klei phung knuă mkăn ƀuh mơh, ƀiădah ñu lač “sĭt drei dưi mă čar anăn” (Klei Yap 13:30-33). Phung knuă mkăn wơr bĭt hĕ Aê Diê yơh jing Pô bi kbiă diñu mơ̆ng čar Êjip leh anăn brei kơ diñu čar Kanaan kyuanăn diñu dlăng leh ksiêm mĭn jih jang bruă tui si klei mĭn mnuih amâo thâo kral Aê Diê. Lu mnuih găn gao lu klei dluh lĕ hlăm thŭn mlan êgao amâodah klei dleh dlan hlăm bruă mă,… phung “êmông gu” jing mâo sĭt, ƀiădah lĕ, đăm wơr bĭt ôh Aê Diê drei ăt mâo sĭt mơh, Ñu dôk kiă kriê jih jang leh anăn jing Pô êbat mbĭt hŏng drei tơdah drei tui hlue klei Ñu iêô.
Hlăm bruă kiă kriê Phung Sang Aê Diê, mta klei yuôm jing bi mđĭ ai hdơ̆ng găp, thâodah mâo klei dleh dlan amâodah hơăi, drei ăt hŏng jih ai tiê gưt hlue klei Khua Yang čiăng, kriăng kreh, gĭr ktưn ngă hlue si Klei Ñu Blŭ leh anăn đăo kjăp kơ klei ktang myang Khua Yang čiăng dưi đru mguôp rŭ mdơ̆ng leh anăn bi mđĭ Ƀuôn Ala Mtao Aê Diê ti lăn ala, đru lu mnuih ƀuh Khua Yang, thâo kral Khua Yang leh anăn đăo kơ Ñu.
Si ngă drei kriăng kreh leh anăn gĭr ktưn ngă bruă Khua Yang jao mơ̆?
Wah lač: Ơ Khua Yang, akâo Ih đru kâo sĭt suôr hŏng jih bruă Khua Yang jao, jih ai tiê hlăm klei mă bruă kơ Khua Yang leh anăn kơ ayŏng adei. Akâo Khua Yang brei kâo hlăk êjai găn klei dleh dlan, ktang hĭn êjai mơh knang kơ klei ktang myang Khua Yang, čiăng êbat nanao phă anăp mbĭt hŏng Khua Yang. Kâo wah lač hlăm anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Kôrantô 11:2-34
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
