Lukas 10:38-42
Nqe cim
“Tus Tswv teb hais tias: Mathas, Mathas! Koj txhawj thiab ntxhov siab rau ntau yam haujlwm kawg li, tiamsis tsuas muaj ib yam zoo xwb” (Lukas 10:41-42).
Lus nug rau sawvdaws xav:
– Ob viv ncaus uas yog Mathas thiab Malis tau ua dabtsi thaum Tswv Yexus los so hauv nkawd tsev?
– Vim licas Mathas yws thiab Tswv Yexus teb licas?
– Tus Tswv lo lus teb qhia rau koj paub yam dabtsi thiaj yog yam cheemtsum tshajplaws ntawm tus ntseeg?
Muaj ib hnub, Tswv Yexus thiab cov thwjtim mus txog hauv lub zos Npethanis, nws mus hauv ob viv ncaus uas yog Mathas thiab Malis tsev. Tus niam hluas Malis “los zaum ntawm Yexus kotaw thiab mloog Yexus qhia” (nqe 39). Tiamsis tus niam laus Mathas ntxhov siab ntsuav rau tej haujlwm txais qhua. Tej zaug nws tabtom npaj zaub mov noj lossis tu chaw pw rau sawvdaws nws thiaj tsis muaj sijhawm los mloog Tswv Yexus qhia.
Thaum ua tsis yeej haujlwm, pom niam hluas Malis tsuas zaum mloog Tswv Yexus qhia xwb tsis los pab nws, ua rau Mathas hnov chim heev, nws thiaj yws rau Tswv Yexus hais tias: “Tus Tswv, koj tsis paub hais tias kuv tus niamhluas cia kuv tib leeg ua haujlwm xwb los? Koj hais kom nws cia li los pab kuv ua haujlwm!” (nqe 40). Nyob hauv tej lus no, tsis yog Mathas tsuas yws nws tus niam hluas tsis pab nws xwb, tiamsis tseem yws Tswv Yexus tsis quavntsej txog nws tej haujlwm uas tabtom ntxhov hnyo. Tiamsis Tswv Yexus teb hais tias: “Mathas, Mathas! Koj txhawj thiab ntxhov siab rau ntau yam haujlwm kawg li, tiamsis tsuas muaj ib yam zoo xwb. Malis twb xaiv yam zoo ntawd lawm, tsis muaj leejtwg yuav txeeb tau yam uas nws muaj ntawd mus li” (nqe 41-42).
Nyob hauv Tswv Yexus lo lus teb, peb pom hais tias tus Tswv yeej koob zeem tej nqi zog uas Mathas ua. Tiamsis Nws kuj qhia rau Mathas paub hais tias tsis yog txhua yam puavleej muaj nqis tib yam. Muaj tej haujlwm zoo tiamsis kuj muaj tej yam haujlwm zoo heev dua, yuav tsum xub ua tej haujlwm cheemtsum ntawd ua ntej. Ntawd yog tseg sijhawm los sib txuas lus nrog tus Tswv thiab ua tib zoo mloog Nws tej lus qhia.
Tig saib ib lub xyoo dhau los, tej zaug peb kuj “txhawj thiab ntxhov siab rau ntau yam haujlwm kawg li”. Peb siv zog khwv kom muaj nyiaj txiag, siv zog ua tiav yus feemxyuam rau tsevneeg, rau tej menyuam, rau tej txheeb ze, rau tej phoojywg; siv zog txhim kho yus tus kheej kom zoo, thiab tseem ntxhov siab rau lwm yam haujlwm. Tagnrho tej uas peb ua ntawd puavleej tsimnyog qhuas. Qhov tseemceeb yog peb puas cia tej yam nyob ibvuag ntawd plooj tej yam nyob mus ibtxhis, uas yog kev sib txuas nrog tus Tswv thiab Nws Txojlus? Zaj kawm hnub no qhuab ntuas peb hais tias, tsis muaj ib yam haujlwm twg yuav tseemceeb dua, cheemtsum ua heev dua kev sib raug zoo nrog Leej Txiv tus uas nyob saum Ntuj Ceebtsheej. Xav kom nyob rau lub xyoo tshiab Yeeb lij no, thaum npaj siab rau kev ua haujlwm yav tomntej, ces feem cheemtsum tshaj ntawm peb yuav yog nrhiav kev sib raug zoo nrog tus Tswv thiab Nws Txojlus, nrhiav kev ua rau kev ntseeg loj hlob thiab ua tau lubneej haum tus Tswv siab.
Thov Vajtswv
Tus Tswv, nyuam yaus ua Koj tsaug vim Koj tau qhuab ntuas nyuam yaus nco txog yam cheemtsum tshaj yog kev sib txuas nrog Koj thiab Koj Txojlus. Thaum ntxhov siab ntsuav rau tej haujlwm, thov Koj qhia nyuam yaus paub tseg sijhawm los cuag Koj, nrhiav Koj ua ntej txhua yam, kom lub xyoo tshiab no nyuam yaus tau txais Koj tej koob hmoov. Nyuam yaus tuav Cawmseej Yexus lub npe thov, Amees.
Peb tabtom npaj siab licas kom tseg tau sijhawm rau tus Tswv nyob hauv xyoo tshiab no?
Nyeem Vajluskub hauv peb lub xyoo: Chivkeeb 42
Kênh Youtube BHKTHN:
