Klei Aê Diê Blŭ: Y-Luk 10:38-42
Êlan kliăng: “Ƀiădah Khua Yang lŏ wĭt lač kơ gơ̆, “Ơ H’Mart, H’Mart! Ih ênguôt leh anăn rŭng răng kyua lu klei. Mâo sa klei jăk hĭn. H’Mari ruah mă leh klei anăn, leh anăn arăng amâo srăng sua mă mơ̆ng gơ̆ ôh” (Y-Luk 10:41-42)
Klei êmuh ksiêm mĭn: Ya bruă H’Mart leh anăn H’Mari ngă tơdah Khua Yang Yêsu mŭt hlăm sang diñu? Ya ngă H’Mart mâo klei mnhĭt mnhañ leh anăn si ngă Khua Yang lŏ wĭt lač? Klei Khua Yang lŏ wĭt lač brei ih thâo ti klei brei phung đăo kơ Krist dưm mrô sa yuôm hĭn?
Mâo sa hruê, Khua Yang Yêsu leh anăn phung ƀĭng kna Ñu weh ti ƀuôn Ƀêthani, mŭt hlăm sang dua amai adei H’Mart leh anăn H’Mari. H’Mari adei H’Mart “dôk gŭ ti jơ̆ng Khua Yang čiăng hmư̆ klei Ñu mtô” (êlan 39). Bi H’Mart, hlăk anăn mñik mñak hŏng lu bruă. Năng ai ñu dôk mkra mnơ̆ng ƀơ̆ng huă leh anăn prăp êmiêt anôk pĭt kơ phung hiu hưn Klei Mrâo Mrang Jăk, kyuanăn ñu amâo mâo mmông dôk hmư̆ klei Khua Yang mtô ôh.
Mñik mñak hŏng lu bruă, ƀuh adei ñu H’Mari knŏng dôk mđing hmư̆ klei Khua Yang mtô leh anăn amâo đru ñu ôh, snăn H’Mart mâo klei mnhĭt leh anăn lač kơ Khua Yang: “Ơ Khua Yang, Ih amâo uêñ hĕ kơ adei mniê kâo lui hjăn kâo mkra mnơ̆ng ƀơ̆ng huă? Snăn mtă kơ ñu đru kâo đa” (êlan 40). Hlăm klei mnhĭt mnhañ anei, amâo djŏ H’Mart ƀuah knŏng adei mniê ñu amâo đru ñu ôh, ƀiădah ƀuah wăt Khua Yang Yêsu amâo uêñ ôh kơ klei ñu mñik mñak msĕ mơh. Ƀiădah Khua Yang Yêsu lŏ wĭt lač: “Ơ H’Mart, H’Mart! Ih ênguôt leh anăn rŭng răng kyua lu klei. Mâo sa klei jăk hĭn. H’Mari ruah mă leh klei anăn, leh anăn arăng amâo srăng sua mă mơ̆ng gơ̆ ôh” (êlan 41-42).
Hlăm klei Khua Yang Yêsu lŏ wĭt lač, drei ƀuh klă Ñu yap klei suăi H’Mart. Ƀiădah lĕ, Khua Yang ăt brei H’Mart thâo mơh amâo djŏ jih jang bruă jing yuôm sơăi ôh. Mâo bruă jing jăk ƀiădah mâo bruă jing jăk hĭn, brei ngă êlâo hĭn. Bruă anăn jing pioh mmông bi mguôp hŏng Khua Yang leh anăn hmư̆ Klei Ñu Blŭ.
Lŏ dlăng wĭt kơ sa thŭn hđăp êgao leh, năng ai drei ăt “ênguôt leh anăn rŭng răng kyua lu klei.” Drei ktưn hlăm klei duah ƀơ̆ng huă čiăng mâo thiăm prăk kăk, gĭr bi leh bruă klam hŏng gŏ sang, hŏng anak čô, klei bi mguôp hŏng phung găp djuê, hŏng mah jiăng, ktưn hriăm hră mơar čiăng bi mđĭ klei thâo săng, leh anăn mñik mñak hŏng lu bruă mkăn đa đa. Jih jang klei gĭr anăn jing klei năng bi mni sơăi. Ƀiădah klei čiăng lač jing drei tuôm brei dŏ klei hdĭp bhiâo anei hrô kơ klei dôk hlŏng lar, si tô hmô klei drei bi mguôp hŏng Khua Yang leh anăn Klei Ñu Blŭ mơ̆? Klei hriăm hruê anei mñă kơ drei, amâo mâo ôh bruă mkăn jing yuôm hĭn, năng ngă êlâo hĭn kơ klei bi mguôp sĭt suôr hŏng Ama drei ti adiê. Čang hmăng hlăm thŭn mrâo anei, tơdah dăp hdră kơ bruă ti anăp snăn brei drei dăp êlâo hĭn jing klei bi mguôp sĭt suôr hŏng Khua Yang leh anăn Klei Ñu Blŭ, čiăng kơ klei đăo drei đĭ hriê kơ prŏng leh anăn hdĭp bi mơak kơ Khua Yang nanao.
Si ngă drei dôk mkra hdră čiăng kơ thŭn mrâo anei drei pioh mmông bi mguôp hŏng Khua Yang êlâo hĭn?
Wah lač: Ơ Khua Yang, kâo lač jăk kơ Ih kyua Ih mñă leh kơ kâo bruă yuôm brei ngă êlâo hĭn jing klei bi mguôp sĭt suôr hŏng Ih leh anăn Klei Ih Blŭ. Tơdah klei rŭng răng kơ lu mta klei hlăm klei hdĭp anei truh, đru kâo duah nanao mmông ênĕ hriê kơ Ih, tui duah Ih êlâo hĭn leh anăn ti dlông hĭn kơ jih jang, čiăng hlăm thŭn mrâo anei kâo dưi mâo klei jăk jĭn sĭt mơ̆ng Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 42
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
