1 Thexalaunikes 5:19
Nqe cim:
“ Nej tsis txhob txwv Vaj Ntsujplig tus Dawbhuv” (1 Thexalaunikes 5:19).
Lus nug rau sawvdaws xav:
– Lolus samhwm “Nej tsis txhob txwv Vaj Ntsujplig tus Dawbhuv” qhia Vajtswv cov meyuam yam dab tsi?
– Nuj nqis rau tus neeg “txwv Vaj Ntsujplig” yog dab tsi?
– Peb yuavtsum ua neej li cas kom tsis “txwv Vaj Ntsujplig”?
Vim li cas uas yuav muaj lolus samhwm hais tias “Nej tsis txhob txwv Vaj Ntsujplig tus Dawbhuv” vim tes haujlwm no twb tshwm thiab tabtom tshwm muaj nyob rau hauv pawg ntseeg Thexalaunikes, vim li ntawd cov lus ntuas no yog ntuas cov ntseeg uas tabtom muaj Vaj Ntsujplig nyob rau hauv lawv lub siab. Hauv Vajtswv kev npaj tseg, Vaj Ntsujplig tus uas tau coglus lawm tau nqis los rau hnub ua kevcai Peetekos tom qab uas Tswv Yexus sawv thiab mus saum ntuj lawm, Tswv Yexus cov thwjtim pom lub sijhawm Vaj Ntsujplig nqis los muaj kev zoo siab kawg nkaus thiab muaj Vajtswv tus tshwjchim ci ntsia iab los rau sawvdaws “… zoo li tus nplaim taws los faib pes rhe liab pes vog mus rau lawv txhua tus. Vaj Ntsujplig tus Dawbhuv los kav tagnrho lawv txhua tus lub siab. …” (Tes Haujlwm 2:3-4a).
Lolus “txwv Vaj Ntsujplig” tsis yog peb muaj peevxwm tav tau Vajtswv kev xav, kev npaj tseg nyob rau hauv ntiajteb no, tiamsis yog xav qhia hais tias peb tsis cia cov hluavtaws Ntsujplig cig rau hauv peb lub siab. Txawm li ntawd los Vaj Ntsujplig yeej tseem nyob hauv cov ntseeg Yexus lub siab, tiamsis Vajtswv pub kev ywjpheej rau tibneeg yuav mloog Vajtswv lus thiab tsis mloog los nyob txij ntawm yus. Vim li ntawd, thaum ib tus neeg mloog Vajtswv lus ces nws puv npo Vaj Ntsujplig, tiamsis yog thaum ib tus neeg tsis mloog Vajtswv lus, nws tus kheej sawv los ua tswv rau nws, ces yog nws tabtom “txwv Vaj Ntsujplig” tus neeg ntawd yuav muaj tsis taus kev zoo siab mus li, tsis muaj lub siab xav thov Vajtswv, thiab ua neej yeej tsis paub ua Vajtswv tsaug rau txhua lub sijhawm (1 Thexalaunikes 5:16-18).
Peb txhua tus yuavtsum paub hais tias, Vaj Ntsujplig tau los nyob rau hauv peb txhua tus lub siab, coj peb mus rau Txojlus tseeb, ceebtoom, qhuab ntuas thaum peb ua txhaum tiamsis yog peb tawv ncauj tsis kam lees txim, lossis qaug rau ib yam dab tsi twg uas tsis muaj sijhawm mloog Vajtswv lus, ceevfaj nyob tsam muaj ib lub sijhawm twg peb yuav tsis hnov Vaj Ntsujplig lub suab hais tawm hauv peb lub siab tuaj ntxiv vim peb tabtom “txwv Vaj Ntsujplig”. Timthawj Paulus hais lolus samhwm “txwv Vaj Ntsujplig” tsis yog hais rau pawg ntseeg Thexalaunikes xwb tiamsis yog tagnrho txhua tus uas yog Vajtswv menyuam kom peb paub mloog Vaj Ntsujplig tej lus ntuas hauv peb lub siab tuaj, txawm muaj qee lub sijhawm Vaj Ntsujplig tej lus ntuas ua rau peb tsis nyiam vim tsis mus raws li peb siab xav los peb yuavtsum mloog. Peb yuavtsum nco ntsoov hais tias Vaj Ntsujplig yog Vajtswv, Nws hlub peb, coj peb kev thiab pub hwjchim dag zog rau peb, kom peb txaus siab, rau siab thiab kub siab ua Vajtswv haujlwm, thiab ua neej muaj nqis thaum tseem muaj sia ua neej nyob hauv ntiajteb no. Thov Vajtswv pub Nws txoj kev txawjntse rau peb txhua tus kom peb zeem paub Vaj Ntsujplig yog tus uas tseemceeb kawg nkaus nyob hauv peb lub neej, peb thiaj li tsis “txwv Vaj Ntsujplig ”.
Thov Vajtswv,
Vajtswv, nyuam yaus ua Koj tsaug uas Koj pub Vaj Ntsujplig los nyob rau hauv nyuam yaus lub siab, qhuab ntuas thiab qhia kom nyuam yaus paub ua lub neej raws Koj siab nyiam. Thov pab nyuam yaus zeem paub qhov twg yog Vaj Ntsujplig ntuas kom mloog raws kom tsis ua rau Vaj Ntsujplig tu saib. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb puas tseem tabtom txwv Vaj Ntsujplig tus uas nyob hauv peb lub siab?
Nyeem Vajluskub hauv peb lub xyoos: Mathais 24
Kênh Youtube BHKTHN:
