Klei Aê Diê Blŭ: I Têsalônik 5:19
Êlan kliăng: “Đăm bi ram Yang Mngăt Jăk ôh” (I Têsalônik 5:19)
Klei êmuh ksiêm mĭn: Ya klei mtô kơ phung ƀuôn sang Aê Diê mơ̆ng klei mtă “Đăm bi ram Yang Mngăt Jăk ôh”? Ya boh jhat kơ pô “bi ram Yang Mngăt Jăk”? Si ngă drei hdĭp čiăng đăm “bi ram Yang Mngăt Jăk ôh”?
Mâo hĕ asăp mtrŭn “Đăm bi ram Yang Mngăt Jăk ôh” kyua bruă bi ram Yang Mngăt Jăk jing bruă ngă leh leh anăn dôk mâo hlăm Sang Aê Diê Têsalônik, anăn phung kơ klei mtô anei jing phung đăo dôk mâo Yang Mngăt Jăk kiă kriê hlăm ai tiê. Hlăm hdră Aê Diê, Yang Mngăt Jăk mâo Aê Diê ƀuăn brei trŭn hriê hlăm hruê Knăm Pantơkôt tal êlâo leh Khua Yang Yêsu kbiă lŏ hdĭp leh anăn đĭ wĭt kơ adiê, phung ƀĭng kna ƀuh klei jăk mơak leh anăn bŏ hŏng guh kơang mơ̆ng Aê Diê tơdah Yang Mngăt Jăk trŭn hŏng rup “Leh anăn diñu ƀuh êlah msĕ si êlah pui bi êdah, nao dôk ti dlông grăp čô diñu. Jih jang diñu bŏ hŏng Yang Mngăt Jăk …” (Bruă Phung Khua Ƀĭng Kna 2:3-4a).
Pruê̆ blŭ “bi ram Yang Mngăt Jăk” amâo djŏ jing drei mâo klei dưi gang mkhư̆ hdră leh anăn klei mĭn Aê Diê ti lăn ôh ƀiădah čiăng lač drei amâo brei pui Yang Mngăt Jăk trơ̆ng hlăm ai tiê pô ôh. Wăt tơdah Yang Mngăt Jăk ăt dôk hlăm phung đăo kơ Aê Diê, ƀiădah anak mnuih mâo Aê Diê brei klei êngiê čiăng gưt amâodah hngah kơ klei Ñu mtă. Kyua anăn tơdah sa čô gưt asăp Aê Diê snăn dưi bŏ hŏng Yang Mngăt Jăk, ƀiădah tơdah ai tiê mgao ngă khua, amâo gưt kơ Aê Diê, pô anăn dôk bi ram Yang Mngăt Jăk, amâo lŏ bŏ hŏng Yang Mngăt Jăk ôh. Boh jhat mơ̆ng klei hdĭp “bi ram Yang Mngăt Jăk” jing pô anăn amâo dưi mâo klei hơ̆k mơak nanao ôh, amâo lŏ mâo ai tiê wah lač amâo mdei ôh, leh anăn klei hdĭp amâo thâo bi mni kơ Aê Diê hlăm djăp boh klei (I Têsalônik 5:16-18).
Grăp čô drei brei thâo săng Yang Mngăt Jăk dưi brei čiăng Ñu dôk hlăm ai tiê drei, atăt drei hlăm klei sĭt nik, ƀuah mkra drei tơdah ngă soh, ƀiădah tơdah drei mâo ai tiê khăng amâo kmhal klei soh, amâodah tuh êyuh hlăm bruă knuă tơl amâo lŏ mâo mmông mđing hmư̆ asăp Khua Yang, kăp răng truh mmông, asăp blŭ Yang Mngăt Jăk amâo lŏ kwang hlăm ai tiê drei ôh kyua drei dôk “bi ram Yang Mngăt Jăk”. Khua ƀĭng kna Y- Pôl lač “Đăm bi ram Yang Mngăt Jăk ôh” amâo djŏ knŏng kơ Sang Aê Diê Têsalônik ôh ƀiădah kơ jih jang phung ƀuôn sang Aê Diê čiăng kơ drei gưt asăp mtô mñă mơ̆ng Yang Mngăt Jăk hlăm ai tiê, wăt tơdah lu blư̆ asăp Yang Mngăt Jăk ƀuah ăl ngă kơ drei ƀuh amâo mơak ôh kyua amâo djŏ hŏng klei drei čiăng. Brei drei hdơr Yang Mngăt Jăk jing Aê Diê, Ñu khăp atăt gai leh anăn brei klei thâo čiăng kơ klei hdĭp drei tui hlue Khua Yang jăk mơak, hur har mă bruă Khua Yang, leh anăn hdĭp tŭ dưn hlăm dŭm hruê adôk ti lăn. Akâo kơ Khua Yang brei klei thâo mĭn kơ grăp čô drei čiăng thâo hnơ̆ng yuôm bhăn mơ̆ng Yang Mngăt Jăk hlăm klei hdĭp mă bruă čiăng kơ drei amâo “bi ram ôh Yang Mngăt Jăk”.
Drei dôk bi ram Yang Mngăt Jăk hlăm pô mơ̆?
Wah lač: Ơ Aê Diê! Bi mni kơ Ih kyua Ih brei leh Yang Mngăt Jăk dôk hlăm ai tiê kâo. Akâo kơ Ih đru kâo pral hŏng klei mñă, klei Yang Mngăt Jăk ƀuah mkra čiăng kơ kâo mâo knuih hdĭp hlue si klei sĭt nik, bi mơak Aê Diê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Mathiơ 24
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
