Mathais 1:18-24
Nqe cim
“Yauxej uas yog Daviv tus xeebntxwv, koj tsis txhob nyuaj siab. Koj cia li mus yuav Malis los ua koj pojniam. Rau qhov twb yog Vaj Ntsujplig tus Dawbhuv ua rau Malis xeeb tub.” (Mathais 1:20b).
Lus nug rau sawvdaws xav:
– Yauxej ntsib yam dabtsi thaum nws hnov hais tias nws tus pojniam qhaib muaj menyuam lawm?
– Qhov vimchiv twg ua rau Yauxej tsis txajmuag yuav Malis los ua nws pojniam?
– Peb kawm tau dabtsi dhau qhov uas Yauxej tiv kev txajmuag vim tus Tswv?
Qhov uas Malis muaj tus Metub Yexus yog los ntawm Vaj Ntsujplig lub hwjchim, yog ib qhov uas xav tsis thoob thiab muaj kev xav. Yauxej tabtom ntsib raug qhov teebmeem zoo li no. Nws yeej hlub Malis heev tiamsis tsis paub yuav ua li cas? Yauxej ntsib raug qhov uas nyuaj xaiv kawg nkaus li. Tim ib, yog yuav Malis los ua pojniam, nws yuav raug kev txajmuag vim tus menyuam hauv plab tsis yog nws tug. Tim ob, yog xav hais tias yus raug dag, nws yuav coj Malis mus rau cov neeg tu plaub ntug kom lawv muab pobzeb txawb Malis tuag mus (II Kevcai 22:23-24). Tim peb, vim yog ib tug neeg kub siab lug ua raws li txoj kevcai qhia, Yauxej ua twjywm tsis yuav Malis (nqe 19). Tej zaus Yauxej pom qhov kev txiav txim siab no zoo nws thiaj “xav twjywm li ntawd”.
Yauxej ua tib zoo xav thiab xaiv qhov uas tso Malis twjywm tseg, vim Malis tsis ua raws li tej lus cog tseg, muaj menyuam hauv plab tsis yog Yauxej tus, yog li nws tsis muaj feem xyuam rau tus menyuam no. Tiamsis Vajtswv twb qhia paub qhov kev xaiv zoo tshaj qhov uas peb xav tsis txog. Thaum “Yauxej tseem xav txog zaj ntawd, Yauxej txawm ua npau suav pom tus Tswv ib tug timtswv los hais rau nws hais tias, Yauxej uas yog Daviv tus xeebntxwv, koj tsis txhob nyuaj siab. Koj cia li mus yuav Malis los ua koj pojniam. Rau qhov twb yog Vaj Ntsujplig tus Dawbhuv ua rau Malis xeeb tub” (nqe 20). Qhov vimchiv uas timtswv los hais rau Yauxej kom tsis txhob nyuaj siab cia li yuav Malis los ua pojniam, yog Vajtswv txojkev xav tseg. Timtswv yeej qhia meej tias tus menyuam uas xeeb hauv Malis plab yog Vaj Ntsujplig lub hwjchim ua rau nws xeeb, tsis yog tibneeg nqaij tawv ua rau xeeb. Timtswv tseem qhia paub lub homphiaj tus Metub Yexus los yug yog “cawm nws haivneeg kom lawv dim lawv lub txim” (nqe 21). Thaum zeem paub Malis tseem ua raws li tej lus cog tseg, thiab tus Metub Yexus yog tus cawmseej uas cov cevlus twb cevlus hais ua ntej 700 xyoo lawm (nqe 23, Yaxayas 7:14), Yauxej ua raws li tus Tswv tej lus hais, “nws txawm mus coj Malis los ua nws pojniam raws li tus Tswv tus timtswv tau hais rau nws lawm” (nqe 24). Thaum twb paub tus Tswv lub siab lawm, Yauxej txaus siab hlo tiv txomnyem vim tus Tswv.
Nimno lub neej nrog tus Tswv mus, peb kuj ntsib ntau yam kev thuam, saib tsis taus ntawm tej neeg ibncig. Qeezaus yuav raug quaj lub kua muag los tus Tswv tes haujlwm thiaj loj hlob. Muaj tej lub sijhawm hauv cov kwvtij ntseeg ib leeg hais tsis zoo rau ib leeg, cem, hais lus tsis ncaj… Muab Yauxej tus qauv los txhawb peb lub zog thaum peb raug kev txomnyem vim tus Tswv. Cia li ncaj ncees kawm tus Tswv Txojlus kom paub Nws tus dej siab. Hauv txhua yam, cia li ntseeg thiab mloog lus kom tus Tswv txojkev npaj ua tiav dhau los ntawm peb lub neej.
Thov Vajtswv,
Tus Tswv koj yog tus uas tsis hloov, thov Koj pub lub zog rau nyuam yaus ua Koj tes haujlwm, zoo siab hlo tiv txomnyem vim Koj. Thov Vaj Ntsujplig pub txojkev kaj siab rau tej uas nyuam yaus ua. Nyuam yuas tuav Tswv Yexus lub npe thov. Amees.
Ib tsoom cov mloog uas hmov thiab tshua,
Peb tau kev txhawb zog dabtsi thaum peb tabtom tiv txomnyem vim tus Tswv?
Nyeem Vajluskub hauv peb lub xyoo: Tshwmsim 10-11
Kênh Youtube BHKTHN:
