Klei Aê Diê Blŭ: Y‑Mathiơ 1:18-24
Êlan kliăng: “Ơ Y‑Yôsep, anak čô Y‑Đawit, đăm huĭ ôh mă H’Mari jing mô̆ ih, kyuadah gơ̆ ba tian kơ anak anăn hŏng Yang Mngăt Jăk.” (Y‑Mathiơ 1:20b)
Klei êmuh ksiêm mĭn: Ya klei Y‑Yôsep tuôm tơdah thâo mô̆ ƀuăn pô ba tian leh ? Ya ngă ñu amâo huĭ ôh mă H’Mari jing mô̆ ? Ya klei hriăm diih mâo mơ̆ng klei Y‑Yôsep tŭ klei dleh dlan kyua Khua Yang ?
Bruă H’Mari ba tian hđeh điêt Yêsu mơ̆ng klei myang Yang Mngăt Jăk jing sa klei bŏ hŏng klei myang leh anăn mâo lu klei êmuh. Pô tlă anăp hŏng klei anei kjham hĭn jing Y‑Yôsep. Ñu khăp snăk kơ gơ̆ ƀiădah si srăng ngă anei? Ñu tlă anăp hŏng klei hrŏng ruah dleh dlan snăk. Tal sa, tơdah mă H’Mari jing mô̆, ñu srăng tŭ klei hêñ kyua hđeh điêt amâo djŏ jing anak ñu pô ôh. Tal dua, tơdah ngêñ kyua mĭndah gơ̆ mplư pô, năng ai ñu srăng ba H’Mari ti anăp sang phat kđi kơ arăng kbhĭr boh tâo tơl djiê (Klei Mtô Mñă Klei Bhiăn 22:23-24). Tal tlâo, kyua jing mnuih hur har hlue ngă klei bhiăn anăn ñu mĭn čiăng bi lui hŏng klei hgăm (êlan 19). Năng ai ñu ƀuh klei anei jing dưi ngă hĭn anăn ñu “bi mĭn kơ klei anăn”.
Y‑Yôsep brei bi mklă ruah lui kyua H’Mari amâo djă pioh klei ƀuăn, hđeh điêt amâo djŏ jing anak ñu, anăn ñu kăn guôn klam rei klei anei. Ƀiădah Aê Diê ƀuh mâo klei ruah jăk hĭn kơ drei bi mĭn. Hlăk êjai “ñu mĭn snăn, nĕ anei mâo sa čô dĭng buăl jăk Khua Yang bi êdah kơ ñu hlăm klei êpei, lač, “Ơ Y‑Yôsep, anak čô Y‑Đawit, đăm huĭ ôh mă H’Mari jing mô̆ ih, kyuadah gơ̆ ba tian kơ anak anăn hŏng Yang Mngăt Jăk” (êlan 20). Mta phŭn dĭng buăl jăk Aê Diê lač kơ Y‑Yôsep đăm huĭ ôh mă H’Mari jing mô̆ kyua anăn jing klei Aê Diê čiăng. Dĭng buăl jăk bi mklă, Hđeh điêt Yêsu H’Mari dôk ba tian jing kyua klei myang Yang Mngăt Jăk amâo djŏ kyua klei bi mguôp mơ̆ng kđeh asăr asei mlei ôh. Dĭng buăl jăk lŏ brei thâo hdră kñăm klei kkiêng kơ Hđeh điêt Yêsu jing čiăng “bi mtlaih phung ƀuôn sang Ñu mơ̆ng klei soh digơ̆” (êlan 21). Thâo kral H’Mari ăt dôk djă pioh klei ƀuăn, leh anăn Hđeh điêt Yêsu jing Pô Bi Mtlaih mơ̆ng klei ƀuăn mơ̆ng êbeh 700 thŭn êlâo (êlan 23, Y‑ Êsai 7:14), Y‑Yôsep gưt asăp Aê Diê, “ñu ngă tui si klei dĭng buăl jăk Khua Yang mtă leh kơ ñu, ñu ngă klei bi kuôl hŏng H’Mari” (êlan 24). Tơdah thâo klă klei Aê Diê čiăng, Y‑Yôsep mprăp klam klei dleh dlan kyua Khua Yang.
Hruê anei đăo kơ Khua Yang, drei ăt kăn tlaih mơh tlă anăp hŏng klei arăng mưč mač. Tăp năng bi ti gŭ pô hlăm êa ală čiăng kơ bruă Khua Yang dưi đĭ kyar. Tăp năng ti krah ayŏng amai adei hlăm Khua Yang ăt bi yăl dliê jhat, ƀuah ăl, mčeh luar… Klei bi hmô mơ̆ng Y‑Yôsep mđĭ ai drei đăm hŭi ôh kơ klei dleh dlan kyua Khua Yang. Brei sĭt suôr hriăm Klei Aê Diê Blŭ čiăng thâo klei Ñu čiăng. Hlăm djăp mta klei, brei knang gưt asăp čiăng kơ hdră Khua Yang jing tŭ dưn hlăm klei hdĭp drei.
Ya klei mđĭ ai drei tơdah dôk tŭ klei dleh dlan kyua Khua Yang?
Wah lač: Ơ Khua Yang jing Pô amâo mlih, akâo kơ Ih brei thiăm ai ktang kơ kâo čiăng hlăm djăp bruă mă, kâo mơak srăng tŭ klei dleh dlan kyua Ih. Akâo kơ Yang Mngăt Jăk brei klei êđăp ênang hlăm djăp bruă kâo ngă. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Êdah 10-11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
